ମୁମ୍ବାଇ: କୋର୍ଟ ଗଲେ ବଲିଉଡ ଅଭିନେତ୍ରୀ ଅନୁଷ୍କା ଶର୍ମା। ସେ ବମ୍ବେ ହାଇକୋର୍ଟର ଦ୍ୱାରସ୍ଥ ହୋଇଛନ୍ତି। ମହାରାଷ୍ଟ୍ର ଭାଲ୍ୟୁ ଆଡ୍ ଟ୍ୟାକ୍ସ (ଭ୍ୟାଟ୍) ଅଧିନିୟମ ଅନୁଯାୟୀ ୨୦୧୨-୧୩ ଏବଂ ୨୦୧୩-୧୪ ଆର୍ଥିକ ବର୍ଷ ପାଇଁ ଡେପୁଟି କମିଶନର୍ ଅଫ୍ ସେଲ୍ସ ଟ୍ୟାକ୍ସର ଦୁଇଟି ଆଦେଶକୁ ସେ ଚ୍ୟାଲେଞ୍ଜ କରିଛନ୍ତି। ଜଷ୍ଟିସ ନୀତିନ ଜାମଦାର ଏବଂ ଜଷ୍ଟିସ ଅଭୟ ଅହୁଜାଙ୍କ ଏକ ବେଞ୍ଚ ଗୁରୁବାର ଦିନ ଅଭିନେତ୍ରୀଙ୍କ ନିବେଦନକୁ ଜବାବ ଦେବା ପାଇଁ ବିକ୍ରୟ କର ବିଭାଗକୁ ନିର୍ଦ୍ଦେଶ ଦେଇଛି। ମାମଲାର ପରବର୍ତ୍ତୀ ଶୁଣାଣି ଆସନ୍ତା ଫେବ୍ରୁଆରୀ ୬ ରେ ହେବ।
ବିକ୍ରୟ କର ବିଭାଗ ଦେଇଥିବା ନିର୍ଦ୍ଦେଶକୁ ବାତିଲ କରିବାକୁ ଅନୁଷ୍କା ଶର୍ମା କୋର୍ଟଙ୍କୁ ଅନୁରୋଧ କରିଛନ୍ତି। ୨୦୧୨-୧୩, ୨୦୧୩-୧୪, ୨୦୧୪-୧୫ ଏବଂ ୨୦୧୫-୧୬ ମୂଲ୍ୟାଙ୍କନ ବର୍ଷ ପାଇଁ ସେ ଚାରୋଟି ଆବେଦନ କରିଛନ୍ତି।
ଡିସେମ୍ବର ୨୦୨୨ ରେ ଅନୁଷ୍କା ଶର୍ମାଙ୍କ ଟିକସ ପରାମର୍ଶଦାତା ଶ୍ରୀକାନ୍ତ ଭେଲେକରଙ୍କ ବିକ୍ରୟ କର ବିଭାଗର ଆଦେଶକୁ ଚ୍ୟାଲେଞ୍ଜ କରିଥିବା ଆବଦେନକୁ ବିଚାର କରିବା ପାଇଁ ହାଇକୋର୍ଟ ମନା କରିଦେଇଥିଲେ। ଏହା ପରେ ଅଭିନେତ୍ରୀ ଗତ ସପ୍ତାହରେ ଏକ ପିଟିସନ ଦାଖଲ କରିଥିଲେ, ଯାହା କୋର୍ଟ ଦ୍ୱାରା ଗ୍ରହଣ କରାଯାଇଥିଲା ଏବଂ ଅନ୍ୟ ପକ୍ଷଠାରୁ କୋର୍ଟ ପ୍ରତିକ୍ରିୟା ମାଗିଥିଲେ।
ଅନୁଷ୍କା ଶର୍ମାଙ୍କ ଆବେଦନ ଅନୁଯାୟୀ, ସେ ତ୍ରିପାକ୍ଷିକ ଚୁକ୍ତି ଅଧାରରେ କଳାକାର ଭାବରେ ପୁରସ୍କାର ଏବଂ ପୁରସ୍କାର କାର୍ୟ୍ୟରେ କାମ କରିଥିଲେ। ଏହି ଚୁକ୍ତି ତାଙ୍କ ଏଜେଣ୍ଟ, ୟଶ ରାଜ ଫିଲ୍ମସ୍ ପ୍ରାଇଭେଟ ଲିମିଟେଡ୍ ଏବଂ ନିର୍ମାତା / ଇଭେଣ୍ଟ ଆୟୋଜକଙ୍କ ମଧ୍ୟରେ ହୋଇଥିଲା।
ଆବେଦନରେ ଦର୍ଶାଯାଇଛି ଯେ ମୂଲ୍ୟାଙ୍କନକାରୀ ଅଧିକାରୀ ଫିଲ୍ମକୁ ଧ୍ୟାନରେ ରଖି ନୁହେଁ ବରଂ ଉତ୍ପାଦର ବିଜ୍ଞାପନ ତଥା ପୁରସ୍କାର ସମାରୋହରେ ଏହାର ପ୍ରଦର୍ଶନ ଆଧାରରେ ବିକ୍ରୟ କର ଆଦାୟ କରିଛନ୍ତି। ୨୦୧୨-୧୩ ପାଇଁ ବିଭାଗ ୧୨.୩ କୋଟି ଟଙ୍କାର ବିକ୍ରୟ କର ସ୍ଥିର କରିଛି ଯେଉଁଥିରେ ୧.୨ କୋଟି ଟଙ୍କା ସୁଧ ଥିବାବେଳେ ୨୦୧୩-୧୪ ବର୍ଷ ପାଇଁ ୧୭ କୋଟି ଟଙ୍କା ଉପରେ ପ୍ରାୟ ୧.୬ କୋଟି ଟଙ୍କାର ଟିକସ ଧାର୍ୟ୍ୟ କରାଯାଇଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
