ରିଆ ଚକ୍ରବର୍ତ୍ତୀଙ୍କୁ ଆଉ ଏକ ଝଟ୍‌କା

ମୁମ୍ବାଇ: ବଲିଉଡ ଅଭିନେତ୍ରୀ ରିଆ ଚକ୍ରବର୍ତ୍ତୀଙ୍କୁ ମିଳୁଛି ଗୋଟିଏ ପରେ ଗୋଟିଏ ଝଟ୍‌କା। ଦିବଙ୍ଗତ ଅଭିନେତା ସୁଶାନ୍ତ ସିଂ ରାଜପୁତଙ୍କ ମୃତ୍ୟୁ ମାମଲାରେ ଜେଲ ଯିବା ପରେ ଏବେ ତାଙ୍କ ବଲିଉଡ କ୍ୟାରିଅର ବୁଡିବାକୁ ବସିଲାଣି। ତାଙ୍କ କ୍ୟାରିଅର ତଳକୁ ଖସି ଯାଇଛି।  ଏହାର ପ୍ରମାଣ ଏବେ ପୁଣି ଥରେ ଦେଖିବାକୁ ମିଳିଛି।

ନିକଟରେ ଫିଲ୍ମ ‘ଚେହରେ’ର ଆଉ ଏକ ପୋଷ୍ଟର ରିଲିଜ ହୋଇଛି। ଏହି ପୋଷ୍ଟରକୁ ଫିଲ୍ମର ମୁଖ୍ୟ ଭୂମିକାରେ ଥିବା ଇମ୍ରାନ୍ ହାସମୀ ନିଜ ଟ୍ୱିଟର୍ ଆକାଉଣ୍ଟରେ ସେୟାର କରିଛନ୍ତି । ଯେଉଁଥିରେ ପୁଣିଥରେ ଅଭିନେତ୍ରୀ ରିୟା ଚକ୍ରବର୍ତ୍ତୀଙ୍କ ଚେହେରା ଗାୟବ ହୋଇଯାଇଛି। କେବଳ ସେତିକି ନୁହେଁ ତାଙ୍କ ନା’ ମଧ୍ୟ ପୋଷ୍ଟରରୁ ହଟାଇ ଦିଆଯାଇଛି।  ପୋଷ୍ଟରରେ ଇମ୍ରାନ୍ ହାସମୀ ଏବଂ ଅମିତାଭ ବଚ୍ଚନଙ୍କୁ ଆଗରେ ଦେଖିବାକୁ ମିଳିଥିବାବେଳେ ଟିଭି ଅଭିନେତ୍ରୀ କ୍ରିଷ୍ଟଲ୍ ଡିସୁଜା ମଧ୍ୟ ପଛରେ ନଜର ଆସୁଛନ୍ତି । ଏହି ପୋଷ୍ଟରକୁ ବିଗ୍ ବି ମଧ୍ୟ ତାଙ୍କ ସୋସିଆଲ ମିଡିଆ ଆକାଉଣ୍ଟରେ ସେୟାର କରିଛନ୍ତି ।

[caption id="attachment_625922" align="aligncenter" width="650"] Film Chehre Poster[/caption]

ଦୁଇ ବର୍ଷ ପୂର୍ବେ ରୁମି ଜାଫରୀଙ୍କ ନିର୍ଦ୍ଦେଶିତ ଫିଲ୍ମ ‘ଚେହରେ’ରେ ରିୟା ଚକ୍ରବର୍ତ୍ତୀ ଅଭିନୟ କରିବେ ବୋଲି ଚର୍ଚ୍ଚା ହେଉଥିଲା । ରିୟା ନିଜ ଇନଷ୍ଟାଗ୍ରାମ୍ ଆକାଉଣ୍ଟ ଜରିଆରେ ଏନେଇ ସୂଚନା ଦେଇଥିଲେ। କହିଥିଲେ ସେ ଏହି ଫିଲ୍ମର ଏକ ଅଂଶ ହେବେ । ଏଥିସହିତ ସେ ଟ୍ୱିଟରରେ ସମସ୍ତଙ୍କୁ ଟ୍ୟାଗ୍ ମଧ୍ୟ କରିଥିଲେ ।  କିନ୍ତୁ ଏହାରି ଭିତରେ ସୁଶାନ୍ତ ସିଂ ରାଜପୁତ ଆତ୍ମହତ୍ୟା ମାମଲାରେ ରିୟା ଚକ୍ରବର୍ତ୍ତୀ ସମ୍ପୂର୍ଣ୍ଣ ଭାବରେ ଫସି ଯାଇଥିଲେ । ତାଙ୍କୁ ଜେଲ ଯିବାକୁ ପଡିଥିଲା।

ପୂର୍ବରୁ ଅମିତାଭ ବଚ୍ଚନ ମଧ୍ୟ ଫିଲ୍ମ ‘ଚେହରେ’ରଏକ ପୋଷ୍ଟର ସେୟାର କରିଥିଲେ। ଏଥିରେ ବି ରିୟା ଚକ୍ରବର୍ତ୍ତୀଙ୍କ ମଧ୍ୟ ଦେଖା ନଥିଲା। କୁହାଯାଉଛି ଯେ ରିୟାଙ୍କୁ ଫିଲ୍ମରୁ ବାହାର କରି ଦିଆଯାଇଛି । ଏହି ଖବର ପାଇବା ମାତ୍ରେ ସୋସିଆଲ ମିଡିଆରେ ରିୟାଙ୍କୁ ଟ୍ରୋଲ୍ କରାଯାଇଥିଲା ।

ସୂଚନା ଯୋଗ୍ୟ ଯେ, ଫିଲ୍ମ ‘ଚେହରେ’ ଆସନ୍ତା ଏପ୍ରିଲ ୩୦ ରେ ରିଲିଜ୍ ହେବ । ତେବେ ଏହାପୂର୍ବରୁ ୧୧ ମାର୍ଚ୍ଚ ଗୁରୁବାର ଦିନ ଏହାର ଟିଜର୍ ରିଲିଜ୍ ହେବ ।