ଅଡୁଆରେ ଶାହରୁଖଙ୍କ ପତ୍ନୀ, ଜେରା କରିବ ଇଡି!

ଅଡୁଆରେ ବଲିଉଡର ବାଦ୍‌ଶାହ ଶାହରୁଖ ଖାନ୍‌ଙ୍କ ପତ୍ନୀ ଗୌରୀ ଖାନ୍‌। ତାଙ୍କୁ ପଚରାଉଚରା କରିବ ପ୍ରବର୍ତ୍ତନ ନିର୍ଦ୍ଦେଶାଳୟ। ସେ ୩୦ କୋଟି ଟଙ୍କା ଠକେଇ ମାମଲାରେ ଫସିଛନ୍ତି। ଏଥିପାଇଁ ତାଙ୍କୁ ଇଡି ପକ୍ଷରୁ ଜାରି ହୋଇଛି ନୋଟିସ। ଲକ୍ଷ୍ନୌ ସ୍ଥିତ ରିୟଲ ଇଷ୍ଟେଟ୍‌ କମ୍ପାନୀ ତାଙ୍କ ନାଁରେ ଏହି ଠକେଇ ଅଭିଯୋଗ ଆଣିଥିଲା। ତେବେ ଏହି ଖବରକୁ ଖଣ୍ଡନ କରିଛି ଇଡି। ଏହା ଏକ ଗୁଜବ ବୋଲି କହିଛି। ଗୌରୀ ଖାନଙ୍କୁ ଇଡି ପକ୍ଷରୁ କୌଣସି ନୋଟିସ ଜାରି ହୋଇନଥିବା ନେଇ ସୂଚନା ମିଳିଛି।

ନିକଟରେ ଗୌରୀ ଖାନଙ୍କ ବିଷୟରେ ଏକ ରିପୋର୍ଟ ସାମ୍ନାକୁ ଆସିଥିଲେ। ​​ଯେଉଁଥିରେ ଦାବି କରାଯାଇଥିଲା ଯେ ତାଙ୍କ ବିରୋଧରେ ଇଡି ନୋଟିସ ଜାରି କରିଛି। ଏକ ଠକେଇ ମାମଲାରେ ଇଡି ଗୌରୀଙ୍କୁ ପଚରାଉଚରା କରିବା ପାଇଁ ଅନୁମତି ମାଗିଛି। ତେବେ ଏହି ସମସ୍ତ ଖବର ଏବେ ମିଛ ବୋଲି ସାମ୍ନାକୁ ଆସିଛି।

ଉଲ୍ଲେଖଯୋଗ୍ୟ, ମୁମ୍ବାଇର ବାସିନ୍ଦା କିରିଟ୍ ଜସୱନ୍ତ ଶାହାଙ୍କର ଲକ୍ଷ୍ନୌର ତୁଲସିଆନି ଗ୍ରୁପ୍‌ର ପ୍ରୋଜେକ୍ଟ ସୁଶାନ୍ତ ଗଲ୍ଫ ସିଟିରେ ଏକ ଫ୍ଲାଟ ରହିଛି। ସେ ୨୦୧୫ରେ ସମାନ ଅଟ୍ଟାଳିକାରେ ଫ୍ଲାଟ କିଣିଥିଲେ, କିନ୍ତୁ ବିଲଡର ତାଙ୍କୁ ତାଙ୍କ ସମ୍ପତ୍ତି ଦେଇ ନାହାଁନ୍ତି କି ତାଙ୍କୁ ତାଙ୍କ ୮୫ ଲକ୍ଷ ଟଙ୍କା ଫେରସ୍ତ କରିନାହାଁନ୍ତି। ଏହି କାରଣରୁ ଜସୱନ୍ତ ଶାହା ନିକଟରେ ତୁଲସିଆନି ଗ୍ରୁପ୍ ନିର୍ଦ୍ଦେଶକ ଅନିଲ କୁମାର ତୁଲସିଆନି, ମହେଶ ତୁଲସିଆନି ଏବଂ ଗୌରୀ ଖାନଙ୍କ ବିରୋଧରେ ମାମଲା ଦାୟର କରିଥିଲେ। ଏହି ପ୍ରକଳ୍ପର ବିଜ୍ଞାପନ ଗୌରୀ ଖାନଙ୍କ ଦ୍ୱାରା କରାଯାଇଥିଲା। ସେ ଗୌରୀଙ୍କ ନାମରେ ବିଶ୍ୱାସ କରି ଏହି ପ୍ରକଳ୍ପରେ ଟଙ୍କା ବିନିଯୋଗ କରିଥିଲେ। ସେ ଠକେଇର ଶିକାର ହୋଇଛନ୍ତି ବୋଲି ମାମଲା ରୁଜୁ କରିଥିବା ବ୍ୟକ୍ତି କହିଛନ୍ତି। ଏହି କାରଣରୁ ଗୌରୀଙ୍କ ନାମ ମଧ୍ୟ ଏହି ମାମଲାରେ ସମ୍ପୃକ୍ତ ଥିବା କୁହାଯାଉଥିଲା।