ସୋନାଙ୍କ ପାଖରେ ନାହିଁ ଟଙ୍କା!

ମୁମ୍ବାଇ: କରୋନା ମହାମାରୀ ଓ ଲକଡାଉନ ଯୋଗୁଁ ଅନେକ ଲୋକେ ଆର୍ଥିକ ସଙ୍କଟ ଦେଇ ଗତି କରୁଛନ୍ତି । କୋଭିଡ ଯୋଗୁଁ ମନରଞ୍ଜନ ଜଗତ ମଧ୍ୟ ଖରାପ ରୂପେ ପ୍ରଭାବିତ ହୋଇଛି । ଅନେକ ସେଲେବ୍ରିଟି ଆର୍ଥିକ ସଙ୍କଟ ସମ୍ମୁଖୀନ ହୋଇଛନ୍ତି । ଅନେକ ଷ୍ଟାରଙ୍କ ସଞ୍ଚୟ ଟଙ୍କା ସମାପ୍ତ ହୋଇସାରିଛି । ଏହି ମହାମାରୀର ମାଡ ଏବେ ପ୍ରସିଦ୍ଧ ବଲିୁଡ ଗାୟିକା ସୋନା ମହାପାତ୍ରଙ୍କ ଉପରେ ପଡିଛି । ସେ ଏବେ ଆର୍ଥିକ ସମସ୍ୟା ଦେଇ ଗତି କରୁଛନ୍ତି । ଏନେଇ ନିକଟରେ ସୋସାଲ ମିଡିଆରେ ସେ ନିଜେ ନିଜର ଦୁଃଖ ବଖାଣିଛନ୍ତି ।

ସୋନା ମହାପାତ୍ର ଟୁଇଟର୍‌ରେ ଏକ ଫଟୋ ସେଆର କରିଛନ୍ତି । ଏହା ସହ ସେ କ୍ୟାପସନରେ ଲେଖିଛନ୍ତି, “ଯନ୍ତ୍ରଣାରୁ ଦୂରେଇ ରହିବା କଷ୍ଟକର କିନ୍ତୁ ସେଥିପାଇଁ ଚିନ୍ତିତ ରହିବା ଠିକ୍ ନୁହେଁ । ମୁଁ ନିଜକୁ ଖୁସି ରଖିବାକୁ ଚେଷ୍ଟା କରୁଛି । ମୋର ଲାଷ୍ଟ ଫିଲ୍ମ ୰ଝଷଙ୍କଗ୍ଧଟକ୍ଟ୍ରଝକ୍ଟଦ୍ଭବ ବର୍ତ୍ତମାନ ସାରା ବିଶ୍ୱରେ ବୁଲୁଛି ଏବଂ ଅନେକ ଉତ୍ସବରେ ଭାଗ ନେଇ ପୁରସ୍କାର ମଧ୍ୟ ଜିତିଛି । ମୋର ସମସ୍ତ ସଂଚୟ ଏହି ଫିଲ୍ମରେ ସରିଯାଇଛି । ଏବେ ମହାମାରୀ ଆମକୁ ଏପରି ଏକ ଜାଗାରେ ଆଣି ଠିଆ ଦେଇଛି, ଯେଉଁଠି ରୋଜଗାରର କୌଣସି ପନ୍ଥା ନାହିଁ ।”

ସୋନାଙ୍କ ଏହି ଟୁଇଟ ଦେଖି ତାଙ୍କ ପ୍ରଶଂସକମାନେ ଭାବୁକ ହୋଇପଡିଛନ୍ତି । ଟୁଇଟ କରି ସୋନାଙ୍କ ସାହା ବଢ଼ାଇବା ସହ ତାଙ୍କ ସଫଳତା କାମନା କରିଛନ୍ତି । ଖୁବଶୀଘ୍ର ଆପଣ ନିଜର ସୁନ୍ଦର ସ୍ୱର ଭଳି ଅର୍ଥ ମଧ୍ୟ ଅର୍ଜନ କରିପାରିବେ ବୋଲି କହିଛନ୍ତି ।

ଏହାପୂର୍ବରୁ ସୋନା ସୂଚନା ଦେଇଥିଲେ ଯେ ତାଙ୍କ ଡକ୍ୟୁମେଣ୍ଟାରୀ ‘ସଟ୍ ଅପ୍ ସୋନା’ ନ୍ୟୁୟର୍କ ଭାରତୀୟ ଫିଲ୍ମ ଫେଷ୍ଟିଭାଲରେ ବେଷ୍ଟ ଡକ୍ୟୁମେଣ୍ଟାରୀ କ୍ୟାଟେଗୋରୀରେ ମନୋନୀତ ହୋଇଛି। ଏହି ଡକ୍ୟୁମେଣ୍ଟାରୀଟି ଦୀପ୍ତି ଗୁପ୍ତାଙ୍କ ଦ୍ୱାରା ନିର୍ଦ୍ଦେଶିତ ହୋଇଥିବାବେଳେ ନିର୍ମାତା ଦାୟିତ୍ୱରେ ଅଛନ୍ତି ସୋନା । ‘ସଟ୍ ଅପ୍ ସୋନା’ ଡକ୍ୟୁମେଣ୍ଟାରୀଟି ଗାୟିକା ସୋନାଙ୍କ ଜୀବନ ଉପରେ ଆଧାରିତ ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।