ମୁମ୍ବାଇ: ପୁଣି ବାଜି ମାରିଲେ ଖିଲାଡ଼ି କୁମାର୍। ନିଜ ନାଁରେ ସେ ଏବେ ଏକ ନୂଆ ରେକର୍ଡ୍ ବନେଇ ସାରିଛନ୍ତି। ଗୋଟିଏ ବର୍ଷ ଭିତରେ ରିଲିଜ୍ ହୋଇଥିବା ତାଙ୍କର ତିନିଟି ଫିଲ୍ମ ୨୦୦ କୋଟି କ୍ଲବରେ ସାମିଲ୍ ହୋଇଛି। ‘ମିଶନ ମଙ୍ଗଲ’ ଓ ‘ ହାଉସଫୁଲ୍ ୪’ ପରେ ଏବେ ତାଙ୍କ ଫିଲ୍ମ ‘ଗୁଡ୍ ନ୍ୟୁଜ୍’ ମଧ୍ୟ ୨୦୦ କୋଟି ଟଙ୍କାର ଆୟ କରିସାରିଛି। ଫିଲ୍ମଟି ରିଲିଜ୍ ହେବା ୨୪ ଦିନରେ ୨୦୧.୧୪ କୋଟି ଟଙ୍କା ଆୟ କରିଛି।
https://twitter.com/taran_adarsh/status/1219121396686544896
ଫିଲ୍ମ ସମୀକ୍ଷକ ତରୁଣ ଆଦର୍ଶ ଏ ନେଇ ଟୁଇଟ୍ କରି ସୂଚନା ଦେଇଛନ୍ତି। ତାଙ୍କ ଟ୍ୱିଟ୍ ଅନୁଯାୟୀ ଫିଲ୍ମଟି ବକ୍ସ ଫିସ୍ କଲେକ୍ସନ୍ରେ ୩ ଦିନରେ ୫୦ କୋଟି, ୬ ଦିନରେ ୧୦୦ କୋଟି, ୧୦ ଦିନରେ ୧୫୦ କୋଟି ଓ ୨୪ ଦିନରେ ୨୦୦ କୋଟି ପାର୍ କରିଛି। ଏହା ପୂର୍ବରୁ ୨୦୧୯ ଗଷ୍ଟ ୧୫ରେ ରିଲିଜ୍ ହୋଇଥିବା ତାଙ୍କ ଫିଲ୍ମ ‘ମିଶନ ମଙ୍ଗଲ’ ୨୯୦.୫୯ କୋଟି ଟଙ୍କା ଓ ଅକ୍ଟୋବର ୨୫ରେ ରିଲିଜ୍ ହୋଇଥିବା ଫିଲ୍ମ 'ହାଉସଫୁଲ୍ ୪‘ ମଧ୍ୟ ୨୮୦ କୋଟି ଟଙ୍କାର ବିଜ୍ନେସ୍ କରିଥିଲା।
ସୂଚନାଯୋଗ୍ୟ, ‘ଗୁଡ୍ ନ୍ୟୁଜ୍’ ଫିଲ୍ମରେ ଅକ୍ଷୟ କୁମାର ଓ କରୀନା କପୁର ସ୍ୱାମୀସ୍ତ୍ରୀ ହୋଇଥିବା ବେଳେ କିଆରା ଆଡ଼ଭାନୀ ଓ ଦଲ୍ଜିତ୍ ଦୋସାଞ୍ଝ ବି ସ୍ୱାମୀସ୍ତ୍ରୀ ଭୂମିକାରେ ଅଭିନୟ କରିଛନ୍ତି। ଏଥିରେ ଦେଖିବାକୁ ମିଳିଛି ଯେ ‘ବତ୍ରା’ ଉପନାମ ଥିବା ଦୁଇ ଦମ୍ପତିଙ୍କର ପିଲାଛୁଆ ହେଉ ନଥିବାରୁ ସେମାନେ ଏକ ଘରୋଇ କ୍ଲିନିକ୍କୁ ଆଇଭିଏଫ୍ (ଇନ୍-ଭିଟ୍ରୋ-ଫର୍ଟିଲାଇଜେସନ୍)ର ସାହାଯ୍ୟ ନେବାକୁ ଯାଇଛନ୍ତି। ହେଲେ ସମାନ ଉପନାମ ଥିବା ଯୋଗୁ ଭୁଲ୍ବଶତଃ ଶୁକ୍ରାଣୁ ଅଦଳବଦଳ ହୋଇଯାଇଛି। ଆଉ ଏହା ପରେ ଆରମ୍ଭ ହେଇଯାଉଛି କନ୍ଫ୍ୟୁଜନ୍। କମେଡି ଓ ଇମୋସନ୍ରେ ଭର୍ତ୍ତି ଏହି ଫିଲ୍ମକୁ ଦର୍ଶକ ବେଶ୍ ପସନ୍ଦ କରୁଛନ୍ତି। ଫିଲ୍ମଟିର ନିର୍ଦ୍ଦେଶନା ଦେଇଛନ୍ତି ରାଜ୍ ମେହତା। ଫିଲ୍ମଟି ଡିସେମ୍ବର ୨୭ରେ ରିଲିଜ୍ ହୋଇଥିଲା।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
