ମୁମ୍ବାଇ: ପୁଣି ଦେଖିବାକୁ ମିଳିବ ସଲ୍ଲୁ ଓ ଏସ୍ଆରକେଙ୍କ ଲଢେଇ। ରିଅଲ ଲାଇଫରେ ନୁହେଁ ରିଲ୍ ଲାଇଫ୍ରେ ଦେଖିବାକୁ ମିଳିବ ଏହି ଲଢେଇ। ଚଳିତବର୍ଷ ଜୁଲାଇରେ ଇଦ୍ ଅବସରରେ ଦୁଇ ଷ୍ଟାରଙ୍କ ବହୁ ପ୍ରତିକ୍ଷିତ ଫିଲ୍ମ ‘ରାଇସ୍’ ଓ ‘ସୁଲତାନ’ ପରଦାକୁ ଆସୁଛି। ଦବଙ୍ଗଷ୍ଟାର ସଲମାନ ଖାନ୍ଙ୍କ ଫିଲ୍ମ ‘ସୁଲତାନ୍’ ଜୁଲାଇ ୬ରେ ରିଲିଜ୍ ହେଉଥିବା ବେଳେ କିଙ୍ଗଖାନ୍ଙ୍କ ‘ରାଇସ୍’ ଇଦ୍ର ତିନିଦିନ ପୂର୍ବରୁ ଅର୍ଥାତ୍ ଜୁଲାଇ ୩ରେ ବି-ଟାଉନ୍କୁ ଆସିବ।
ଦୁଇ ସୁପରଷ୍ଟାରଙ୍କ ଫିଲ୍ମ ଗୋଟିଏ ସପ୍ତାହରେ ଆସୁଥିବାରୁ ବକ୍ସ ଅଫିସ୍ରେ ହଙ୍ଗାମା ହେବା ନିଶ୍ଚିତ। ଅନ୍ୟପକ୍ଷେ ଏକା ସଙ୍ଗରେ ରିଲିଜ ହେଉଥିବାରୁ ଏହା ଦୁଇଟି ଯାକ ଫିଲ୍ମ ଉପରେ ପ୍ରଭାବ ପକାଇବା ଆଶଙ୍କା ଦେଖାଦେଇଛି। ଏହାକୁ ନେଇ ବି-ଟାଉନ୍ରେ ଏବେ ଠାରୁ ଚର୍ଚ୍ଚା ଜୋର ଧରିଛି।
ରାଇଜ୍କୁ ରାହୁଲ ଧୋଲକିଆ ନିର୍ଦ୍ଦେଶନା ଦେଇଛନ୍ତି। ସେହିପରି ପ୍ରଯୋଜନା ଦାୟିତ୍ୱରେ ଏସଆରକେଙ୍କ ପତ୍ନୀ ଗୌରୀ ଖାନ୍, ରିତେଶ ଶିଦ୍ଧୱାନୀ ଓ ଫରାନ୍ ଅଖ୍ତାର ରହିଛନ୍ତି। ଏହି ଫିଲ୍ମରେ ବିଭିନ୍ନ ଭୁମିକାରେ ନୱାଜଉଦ୍ଧିନ ସିଦ୍ଧିକି, ମହିରା ଖାନ୍, ଏମ୍ଜେ ଆୟୁବ୍, ରୂପିନ୍ଦର ନଗ୍ରା, ଅନୀଲ ମାଙ୍ଗେ, ଆରୟା ବାବ୍ର ଓ ଗିବିନ୍ଦ ନାମଦେବ ନଜରକୁ ଆସିବେ।
ସେହିପରି ସାଲମାନଙ୍କ ଅଭିନୀତ ସୁଲତାନ୍ ଫିଲ୍ମକୁ ଅଲ୍ଲି ଆବସ୍ ଜାଫର ନିର୍ଦ୍ଦେଶନା ଦେଉଥିବା ବେଳେ ପ୍ରଯୋଜନା ଦାୟିତ୍ୱରେ ରହିଛନ୍ତି ଆଦିତ୍ୟ ଚୋପ୍ରା। ବିଭିନ୍ନ ଭୂମିକାରେ ଅନୁଷ୍କା ଶର୍ମା, ରନଦୀପ ହୁଡା, ଅମିତ ସାନ୍ଦ ଓ ଟାଇରନ୍ ଉଡଲେ ରହିଛନ୍ତି।