ମୁମ୍ବାଇ: ଫିଲ୍ମ ‘ଜିରୋ’ ରିଲିଜ୍ ହେବା ପରେ ଆଗାମୀ ଫିଲ୍ମ ‘ଭାରତ’ର ଶୁଟିଂରେ ଜୋର୍ସୋରରେ ଲାଗି ପଡ଼ିଛନ୍ତି ଅଭିନେତ୍ରୀ କ୍ୟାଟ୍ରିନା କୈଫ୍। କିଛି ଦିନ ତଳେ ସେ ଅଭିନେତା ବରୁଣ ଧଓ୍ଵନଙ୍କ ବିପକ୍ଷରେ ଅଭିନୟ କରିବେ ବୋଲି ଶୁଣିବାକୁ ମିଳିଥିଲା। କୋରିଓଗ୍ରାଫର ତଥା ନିର୍ଦ୍ଦେଶକ ରିମୋ ଡି’ସୁଜାଙ୍କ ନିର୍ଦ୍ଦେଶିତ ଏକ ଫିଲ୍ମରେ ସେ ବରୁଣଙ୍କ ସହ ଅନସ୍କ୍ରିନ୍ ରୋମାନ୍ସ କରିବେ ବୋଲି ଖବର ମିଳିଥିଲା। କିନ୍ତୁ ଏବେ ସେ ବରୁଣଙ୍କ ସହ ଫିଲ୍ମ କରିବେ ନାହିଁ ବୋଲି ଜଣାପଡ଼ିଛି। ଆଉ କ୍ୟାଟ୍ରିନା ରିମୋଙ୍କ ଏହି ଫିଲ୍ମ ଛାଡ଼ିବା ପଛର କାରଣ କୁଆଡ଼େ ସଲମାନ୍ ଖାନ୍ ବୋଲି କୁହାଯାଉଛି।
ସୂଚନା ମୁତାବକ, ରିମୋ ନିଜ ଫିଲ୍ମ ‘ଏବିସିଡି’ର ତୃତୀୟ ଭାଗ ତିଆରି କରିବାକୁ ଯାଉଥିବା ବେଳେ ମୁଖ୍ୟ ଭୂମିକାରେ କ୍ୟାଟ୍ରିନା ଏବଂ ବରୁଣ୍ଙ୍କୁ ନେବାକୁ ସ୍ଥିର କରିଥିଲେ। କିନ୍ତୁ ଏବେ କ୍ୟାଟ୍ରିନା ଏହି ଫିଲ୍ମରୁ ଓହରି ଯାଇଛନ୍ତି । କ୍ୟାଟ୍ରିନାଙ୍କ ପ୍ରବକ୍ତାଙ୍କ କହିବା ଅନୁଯାୟୀ, ସଲମାନ୍ଙ୍କ ଫିଲ୍ମ 'ଭାରତ' ପାଇଁ କ୍ୟାଟ୍ରିନା ଏହି ଫିଲ୍ମ ଛାଡ଼ିଛନ୍ତି । 'ଭାରତ'ର ଶୁଟିଂରେ ବ୍ୟସ୍ତତା ଯୋଗୁ ‘ଏବିସିଡି-୩’ର ଶୁଟିଂ ପାଇଁ ସେ ସମୟ ଦେଇ ପାରିବେ ନାହିଁ ।
ଏମିତି ବି ଶୁଣିବାକୁ ମିଳିଛି ଯେ ‘ଜିରୋ' ଫ୍ଲପ୍ ହେବା ପରେ ସେ ତାଙ୍କ ସମସ୍ତ ଧ୍ୟାନ୍ ଫିଲ୍ମ ‘ଭାରତ’ରେ ଦେବାକୁ ଚାହୁଁଛନ୍ତି।