ମୁମ୍ୱାଇ: ଏଇ ଡିସେମ୍ବର ୬ ତାରିଖରେ ରିଲିଜ୍ ହେବ ବଲିଉଡ୍ ଫିଲ୍ମ ‘ପାନିପତ’। ଏଥିରେ ସଞ୍ଜୟ ଦତ୍ତ, ଅର୍ଜୁନ କପୁର ଓ କୃତି ସାନନ୍ ପ୍ରମୁଖ ଲିଡ୍ ରୋଲ୍ରେ ଅଭିନୟ କରିଛନ୍ତି। ତେବେ ଟ୍ରେଲର ରିଲିଜ୍ ହେବା ପରଠାରୁ ବିଭିନ୍ନ କାରଣ ପାଇଁ ଫିଲ୍ମଟି ବିବାଦ ଘେରରେ ରହିଛି। ଫିଲ୍ମ ରିଲିଜ୍କୁ ଆଉ ଅଳ୍ପ ଦିନ ବାକି ଥିବା ବେଳେ ଏହା ପୁଣି ଏକ ନୂଆ ବିବାଦରେ ଫସିଛି। ଏଥିପାଇଁ ଫିଲ୍ମର ନିର୍ମାତା ଓ ନିର୍ଦ୍ଦେଶକଙ୍କୁ ନୋଟିସ୍ ମଧ୍ୟ ଜାରି କରାଯାଇଛି।
ସୂଚନା ମୁତାବକ ମଧ୍ୟ ପ୍ରଦେଶର ଭୋପାଳରେ ରହୁଥିବା ପେଶୱା ବାଜୀରାଓଙ୍କ ଅଷ୍ଟମ ପିଢ଼ିର ସଦସ୍ୟ ନୱାବଜାଦା ଶାଦାବ ଅଲୀ ବାହାଦୁର୍ ଫିଲ୍ମର ନିର୍ମାତା ସୁନୀତା ଗୋୱାରିକର୍ ଓ ରୋହିତ ଶେଲତାକରଙ୍କ ସହିତ ନିର୍ଦ୍ଦେଶକ ଆଶୁତୋଷ ଗୋୱାରିକର୍ଙ୍କୁ ‘ପାନିପତ’ରେ ଥିବା ଏକ ବିଶେଷ ଡାଏଲଗ୍କୁ ନେଇ ନୋଟିସ୍ ଜାରି କରିଛନ୍ତି।
ସେ କହିଛନ୍ତି ଯେ ନିର୍ଦ୍ଦେଶକ ଆଶୁତୋଷ ଗୋୱାରିକର୍ ‘ପାନିପତ’ରେ ମହାନ୍ ମରାଠା ସେନାପତି ଓ ତାଙ୍କର ଦ୍ୱିତୀୟ ସ୍ତ୍ରୀ ମସ୍ତାନୀଙ୍କୁ ନେଇ ଅପମାନଜନକ ଶବ୍ଦ ପ୍ରୟୋଗ କରିଛନ୍ତି। ଏହି ଫିଲ୍ମ ବିରୋଧରେ ସେ କୋର୍ଟଙ୍କ ଦ୍ୱାରସ୍ଥ ହେବେ ବୋଲି ମଧ୍ୟ ଚେତାବନୀ ଦେଇଛନ୍ତି।
ଟ୍ରେଲରେ ପାର୍ବତୀ ବାଈ ଭୂମିକାରେ ଅଭିନୟ କରୁଥିବା କୃତି ସାନନ୍ କହିଛନ୍ତି, “ମୁଁ ଶୁଣିଛି, ପେଶୱା ଯେବେ ଏକୁଟିଆ କୌଣସି ଅଭିଯାନରେ ଯା’ନ୍ତି, ଫେରିବା ବେଳେ ଜଣେ ମସ୍ତାନୀକୁ ସାଙ୍ଗରେ ଧରି ଆସନ୍ତି।’’ ଏହି ଡାଏଲଗ୍ଟି ପେଶୱା ବାଜୀରାଓଙ୍କ ପ୍ରତି ଅପମାନ ବୋଲି ନୱାବଜାଦା ଶାଦାବ ଅଲ୍ଲୀ ବାହାଦୁର୍ ଅଭିଯୋଗ କରିଛନ୍ତି।
https://youtu.be/zpXnmy-6w1g
ସୂଚନାଯୋଗ୍ୟ, ‘ପାନିପତ’ରେ ହୋଇଥିବା ତୃତୀୟ ଲଢ଼େଇର କାହାଣୀକୁ ନେଇ ଫିଲ୍ମ ‘ପାନିପତ’ ତିଆରି ହୋଇଛି। ୧୭୬୧ ମସିହାରେ ମରାଠା ଓ ଆଫଗାନ୍ ରାଜା ଅହମ୍ମଦ ଶାହ ଅବ୍ଦାଲୀଙ୍କ ମଧ୍ୟରେ ଏହି ଲଢ଼େଇ ହୋଇଥିଲା।