ଏକାଠି ଆସିବେ ପ୍ରଭାସ ଓ ଦୀପିକା

ଚେନ୍ନାଇ: ‘ବାହୁବଳୀ’ ଫେମ୍ ସାଉଥ୍‌ ସୁପରଷ୍ଟାର ପ୍ରଭାସଙ୍କ ଫ୍ୟାନ୍‌ମାନଙ୍କ ପାଇଁ ଖୁସି ଖବର। ଆଗକୁ ତାଙ୍କର ଏକ ବଡ଼ ଫିଲ୍ମ ଆସିବାକୁ ଯାଉଛି। ଏହି ଫିଲ୍ମରେ ସେ ଜଣେ ସୁପର ହିରୋ ଭୂମିକାରେ ନଜର ଆସିବେ। ଆଉ ଏଥିରେ ତାଙ୍କ ସହିତ ବଲିଉଡ୍‌ର ଅନ୍ୟତମ ସଫଳ ନାୟିକା ଦୀପିକା ପାଦୁକୋନ ଅଭିନୟ କରିବେ ବୋଲି ଜଣାପଡ଼ିଛି।

ସୂଚନା ଅନୁୟାୟୀ, ନିର୍ମାତା ନାଗ ଅଶ୍ୱିନ ଏହି ଫିଲ୍ମ କରିବେ। ଫିଲ୍ମ ବିଷୟରେ ଆଉ ବିଶେଷ କିଛି ସୂଚନା ମିଳି ନଥିବା ବେଳେ ଏଥିରେ ଦୀପିକା ବି ଅଭିନୟ କରିବେ ବୋଲି କୁହାଯାଉଛି। ଏଥିରେ ଆଉ କିଛି ବଡ଼ ବଡ଼ ଷ୍ଟାରଙ୍କୁ ଦେଖିବାକୁ ମିଳିପାରେ ବୋଲି କୁହାଯାଉଛି।

‘ବାହୁବଳୀ’ ସିରିଜ୍‌ର ଦୁଇଟି ଯାକ ଫିଲ୍ମ ସୁପର୍‌ହିଟ୍ ହେବା ପରେ ‘ସାହୋ’ ଉପରେ ଦର୍ଶକଙ୍କର ଖୁବ୍ ଭରସା ଥିଲା। ଫିଲ୍ମଟି ବହୁତ ଭଲ ହେବ ବୋଲି ସମସ୍ତେ ଭାବିଥିଲେ। ହେଲେ ଦର୍ଶକଙ୍କ ଆଶାମୁତାବକ ଫିଲ୍ମଟି ହୋଇ ନଥିଲା। ଏହି ଫିଲ୍ମରେ ପ୍ରଭାସଙ୍କ ସହିତ ସ୍କ୍ରିନ୍ ଶେଆର୍ କରିଥିଲେ ଶ୍ରଦ୍ଧା କପୁର। ଏ ଦୁହିଁଙ୍କ ଯୋଡ଼ିକୁ ଦର୍ଶକ ବେଶ୍ ପସନ୍ଦ କରିଥିଲେ। ତେବେ ଖବରଟି ଯଦି ସତ ହୁଏ, ତା’ହେଲେ ଦୀପିକା ଓ ପ୍ରଭାସଙ୍କ ଯୋଡ଼ି ପରଦାରେ କ’ଣ ଯାଦୁ ଚଲାଇବ ଦେଖିବା ବାକି ରହିଲ।

ବର୍ତ୍ତମାନ ପ୍ରଭାସ ଅଭିନେତ୍ରୀ ପୂଜା ହେଗଡ଼େଙ୍କ ସହ ଫିଲ୍ମ ‘ଜାନ୍‌’ର ଶୁଟିଂରେ ବ୍ୟସ୍ତ ଅଛନ୍ତି। ଏହାର ଶୁଟିଂ ଶେଷ ହେଲା ପରେ ସେ ନୂଆ ପ୍ରୋଜେକ୍ଟର କାମ ଆରମ୍ଭ କରିବେ। ଅନ୍ୟପଟେ ଦୀପିକା ପାଦୁକୋନ୍‌ଙ୍କ ଏବେ ‘83’କୁ ନେଇ ବ୍ୟସ୍ତ ଅଛନ୍ତି। ଏହି ଫିଲ୍ମରେ ବାହାଘର ପରେ ସେ ପ୍ରଥମଥର ପାଇଁ ସ୍ୱାମୀ ରଣବୀର ସିଂହଙ୍କ ସହ ସ୍କ୍ରିନ୍‌ ଶେଆର କରୁଛନ୍ତି। ଫିଲ୍ମରେ ସେ ଟିମ୍ ଇଣ୍ଡିଆର ପୂର୍ବତନ ଅଧିନାୟକ କପିଲ୍‌ ଦେବଙ୍କ ପତ୍ନୀ ରୋମି ଭାଟିଆଙ୍କ ଭୂମିକାରେ ଅଭିନୟ କରିଛନ୍ତି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।