ମୁମ୍ବାଇ: ବଲିଉଡ୍ ଅଭିନେତା ସୁଶାନ୍ତ ସିଂହ ରାଜପୁତ ମୃତ୍ୟୁ ମାମଲାର ଡ୍ରଗ୍ସ ଲିଙ୍କରେ ଗିରଫ ହୋଇଥିବା ଅଭିନେତ୍ରୀ ରିଆ ଚକ୍ରବର୍ତ୍ତୀ ନିଜ ଜାମିନ୍ ଆବେଦନର ବିସ୍ଫୋରକ ବୟାନ ଦେଇ ପୁଣି ଚର୍ଚ୍ଚାକୁ ଆସିଛନ୍ତି। ଜାମିନ୍ ଆବେଦନରେ ରିଆ କହିଛନ୍ତି ଯେ ତାଙ୍କୁ ଚାପ ପ୍ରୟୋଗ କରି ନିଜ ଭୁଲ ସ୍ୱୀକାର କରିବାକୁ ବାଧ୍ୟ କରାଯାଇଛି। ବିଚାର ବିଭାଗୀୟ ହେପାଜତରେ ତାଙ୍କ ଜୀବନ ପ୍ରତି ବିପଦ ଥିବା ଦର୍ଶାଇ ସୁଶାନ୍ତ ସିଂହଙ୍କ ଏହି ଗର୍ଲଫ୍ରେଣ୍ଡ କହିଛନ୍ତି ଯେ ଏହା ଭିତରେ ତାଙ୍କୁ ହତ୍ୟା ଓ ବଳାତ୍କାର ଭଳି ଧମକ ଆସୁଛି ଏବଂ ଗତ ତିନିଟି ଜେରା ତାଙ୍କ ମାନସିକ ଓ ଶାରୀରିକ ସ୍ୱାସ୍ଥ୍ୟକୁ ଗଭୀର ଭାବେ ପ୍ରଭାବିତ କରିଛି।
ଏହି ଆବେଦନରେ ରିଆ ଆହୁରି ମଧ୍ୟ କହିଛନ୍ତି ଯେ ସୁଶାନ୍ତ ସିଂହଙ୍କ ମୃତ୍ୟୁ ମାମଲାରେ ସେ କୌଣସି ଅପରାଧ କରିନାହାନ୍ତି ଏବଂ ତାଙ୍କୁ ସଂପୂର୍ଣ୍ଣ ଉଦ୍ଦେଶ୍ୟମୂଳକ ଭାବେ ଏକ ମିଥ୍ୟା ମାମଲାର ଫସାଇ ଦିଆଯାଇଛି। ଏପରିକି ବିଚାର ବିଭାଗୀୟ ହେପାଜତରେ ତାଙ୍କୁ ମାନସିକ ଚାପ ପ୍ରୟୋଗ କରି ଦୋଷ ସ୍ୱୀକାର କରିବାକୁ ବାଧ୍ୟ କରାଯାଇଛି। ସେପ୍ଟେମ୍ବର ଆଠ ତାରିଖରେ କରିଥିବା ନିଜ ଜାମିନ ପାଇଁ ଆେବଦନରେ ଏହି ଅଠେଇଶ ବର୍ଷୀୟ ଅଭିନେତ୍ରୀଙ୍କ କହିଛନ୍ତି ଯେ, ଏହି ମାମଲାରେ ବିନା ନୋଟିସରେ ଓ ଅନ୍ୟାୟଭାବେ ତାଙ୍କୁ ଗିରଫ କରାଯାଇଛି। ଏପରିକି ଜେରା ସମୟରେ କୌଣସି ମହିଳା ଅଫିସର ସେଠାରେ ନଥିଲେ କି ଦୀର୍ଘ ଆଠ ଘଣ୍ଟା କାଳ ପୁରୁଷ ଅଫିସରମାନେ ଜେରା କରୁଥିବାବେଳେ ଆଇନଗତ ସହୟତା ନେବାକୁ ତାଙ୍କୁ କୌଣସି ସୁଯୋଗ ଦିଆଯାଇ ନଥିଲା।
ସୂଚନାଯୋଗ୍ୟ, ଡ୍ରଗସ ଲିଙ୍କ ମାମଲାରେ ସୋମବାର ଗିରଫ ହେବା ପରେ ରିଆଙ୍କ ଜାମିନ ଆବେଦନ ଖାରଜ ହୋଇଥିଲା। ବୁଧବାର ରିଆଙ୍କୁ ମୁମ୍ବାଇର ଏକମାତ୍ର ମହିଳା ଜେଲକୁ ସେପ୍ଟେମ୍ବର ବାଇଶ ତାରିଖ ଯାଏ ପଠାଇ ଦିଆଯାଇଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
