ମୁମ୍ବାଇ(ଓଡ଼ିଶା ରିପୋର୍ଟର): ବଲିଉଡ୍ ଦବଙ୍ଗ ଖାନ୍ ସଲ୍ମାନ୍ଙ୍କ ଫିଲ୍ମ ଅପେକ୍ଷାରେ ଦର୍ଶକ ସବୁବେଳେ ରହିଥାନ୍ତି। ୨୦୧୮ରୁ ସେ ନିଜ ଫିଲ୍ମ ‘ଭାରତ’କୁ ନେଇ ଚର୍ଚ୍ଚାରେ ଅଛନ୍ତି। ସେ ଏବେ ଗୋଆରେ ‘ଭାରତ’ ଫିଲ୍ମର ଶୁଟିଂରେ ବ୍ୟସ୍ତ।
ଆଉ ଏହି ସମୟରେ ଆଉ ଏକ ଖବର ମଧ୍ୟ ଶୁଣିବାକୁ ମିଳୁଛି। ସଲ୍ମାନ୍ ଏଥର କୁଆଡେ ନିର୍ଦ୍ଦେଶକ ରୋହିତ ସେଟ୍ଟୀଙ୍କ ସହ ଏକ ପ୍ରୋଜେକ୍ଟ୍ରେ କାମ କରିବେ।
ଖବର ମୁତାବକ ସଲ୍ମାନ୍ଙ୍କ ସହ କେଉଁ କଣ୍ଟେଣ୍ଟ୍ ଫିଲ୍ମ କରିବେ ସେ ନେଇ ବିଚାର କରିବା ପାଇଁ ରୋହିତ ସେଟ୍ଟୀ ସାଜିଦ୍ ନାଡିୟାୱାଲାଙ୍କୁ ଅନେକ ଥର ସାକ୍ଷାତ କରି ସାରିଛନ୍ତି। ଆଉ ଏହା ଉପରେ ଦୁହେଁ କଥା ହୋଇ କିଛି ଚରିତ୍ର ବାଛିଥିଲେ। ସେଥିମଧ୍ୟରୁ ଗୋଟିଏ ହେଉଛି ‘କିକ୍’ ଫିଲ୍ମରେ ସଲ୍ମାନ୍ ଅଭିନୟ କରିଥିବା ଦେବୀ ଲାଲ୍ ସିଂହଙ୍କ ଚରିତ୍ର। ସେହି ଫିଲ୍ମରେ ସଲ୍ମାନ୍ଙ୍କ ଖାକୀ ବର୍ଦିରେ ନଜର ଆସିଥିଲେ। ଯଦି ଏହି ଆଇଡିଆ ସଠିକ୍ ରୂପରେ କର୍ଯ୍ୟକାରୀ ହେଲା, ତେବେ ସଲ୍ମାନ୍ ରୋହିତ୍ଙ୍କ ଫିଲ୍ମରେ ଜଣେ ପୁଲିସ୍ ଚରିତ୍ରରେ ଅଭିନୟ କରି ପାରନ୍ତି।
୨୦୧୦ରେ ରିଲିଜ୍ ହୋଇଥିବା ଫିଲ୍ମ ‘ଦବଙ୍ଗ’ରେ ପୁଲିସ୍ ଚରିତ୍ରରେ ଅଭିନୟ କରି ସଲ୍ମାନ୍ ସମସ୍ତଙ୍କ ହୃଦୟ ଜିତିଥିଲେ। ଏହାର ଦ୍ୱିତୀୟ ପାର୍ଟ୍ ବି ସଫଳ ରହିଛି। ଏବେ ସଲ୍ମାନ୍ ‘ଭାରତ’ ଫିଲ୍ମର ଶୁଟିଂ କରୁଛନ୍ତି। ଏହାପରେ ସେ ‘ଦବଙ୍ଗ -୩’ର ସୁଟିଂ ଆରମ୍ଭ କରିବେ।
ସୂଚନା ମୁତାବକ ୨୦୧୯ରେ ଶେଷ ଆଡ଼କୁ ସଲ୍ମାନ୍ ରୋହିତ୍ଙ୍କ ସହ ଏହି ପ୍ରୋଜେକ୍ଟରରେ କାମ କରିବା ଆରମ୍ଭ କରିଦେବେ।