ଗାଁରେ ବ୍ୟାପୁଛି ଝାଡାବାନ୍ତି। ଗତ ତିନି ଦିନରେ ଜଣଙ୍କ ମୃତ୍ୟୁ ଘଟିଥିବା ବେଳେ ୪୭ ଜଣ ଅସୁସ୍ଥ ହୋଇ ମେଡ଼ିକାଲ୍ରେ ଚିକିତ୍ସିତ ହେଉଛନ୍ତି। ଏପରି ଖବର ଆସିଛି ସମ୍ବଲପୁର ଜିଲ୍ଲା ମହମ୍ମଦପୁର ଗାଁରୁ। ଦୂଷିତ ପାଣି ପିଇବା ଯୋଗୁ ଝାଡ଼ାବାନ୍ତି ବ୍ୟାପୁଥିବା ଅନୁମାନ କରାଯାଉଛି।
ହୀରାକୁଦ ଡ୍ୟାମ୍ ଉପକଣ୍ଠ ମହମ୍ମଦପୁର ଗାଁରେ ବ୍ୟାପୁଛି ଝାଡ଼ାବାନ୍ତି। ଏହି ରୋଗ ଏବେ ଘରକୁ ଘର ବ୍ୟାପିବାରେ ଲାଗିଛି। ଏଥିରେ ଜଣଙ୍କ ମୃତ୍ୟୁ ଘଟିଥିବା ବେଳେ ୪୭ ଜଣ ଆକ୍ରାନ୍ତ ହୋଇ ହୀରାକୁଦ ଓ ବୁର୍ଲା ଡାକ୍ତରଖାନାରେ ଭର୍ତ୍ତି ହୋଇଛନ୍ତି। ଦୂଷିତ ପାନୀୟ ଜଳ ପିଇବା ଯୋଗୁ ଗାଁ ଲୋକେ ଝାଡ଼ାବାନ୍ତିରେ ଆକ୍ରନ୍ତ ହେଉଥିବା ଆଲୋଚନା ହେଉଛି।
ଗତ ୧୯ ତାରିଖରେ କେତେକ ଗାଁ ଲୋକ ଝାଡ଼ାବାନ୍ତିରେ ଆକ୍ରାନ୍ତ ହୋଇ ମେଡ଼ିକାଲ୍ରେ ଭର୍ତ୍ତି ହୋଇଥିଲେ। ଏହା ପରେ ପ୍ରଶାସନ ତତ୍ପର ହୋଇଥିଲା। ପ୍ରଭାବିତ ଗାଁକୁ ମେଡ଼ିକାଲ୍ ଟିମ୍ ଯାଇଥିଲା। ଗାଁର ପରିବେଶ ଅନୁଧ୍ୟାନ କରିବା ସହିତ ପାନୀୟ ଜଳର ନମୁନା ସଂଗ୍ରହ କରିଥିଲା। ଏଥିସହ ଗାଁରେ ସଚେତନତା କରାଯାଇଥିଲା। ଝାଡ଼ାବାନ୍ତିରେ ଆକ୍ରାନ୍ତ ହୋଇଥିବା ଲୋକଙ୍କୁ ଔଷଧ ଓ ଓଆର୍ଏସ୍ ବଣ୍ଟନ କରାଯାଉଛି। ବ୍ଲିଂଚିଂ ପାୱଡର ପକାଯାଉଛି। ସମସ୍ତଙ୍କର ସମାନ ଲକ୍ଷଣ ହୋଇଥିବାରୁ ଖାଦ୍ୟ କିମ୍ବା ପାନୀୟ ଜଳ ପ୍ରଦୂଷିତ ହୋଇଥିବା ମେଡ଼ିକାଲ୍ ଟିମ୍ ଅନୁମାନ କରୁଛି।
ଜିଲ୍ଲା ମୁଖ୍ୟ ଚିକିତ୍ସାଧିକାରୀଙ୍କ କହିବା ଅନୁସାରେ ଗାଁ ଲୋକେ ନିକଟରେ ଥିବା କେନାଲ ଜଳ ବ୍ୟବହାର କରୁଛନ୍ତି। ସେଥିପାଇଁ ଝାଡ଼ାବାନ୍ତି ବ୍ୟାପୁଥିବା ଅନୁମାନ କରାଯାଉଛି। ତେଣୁ ଜଳ ନମୁନା ସଂଗ୍ରହ କରାଯାଇ ପରୀକ୍ଷା ପାଇଁ ପଠାଯାଇଛି।