ଦକ୍ଷିଣପଶ୍ଚିମ ଚାଇନାର ଗୋଟିଏ ହସ୍ପିଟାଲରେ ଭୟଙ୍କର ଘଟଣା ଘଟିଛି। ଜଣେ ବ୍ୟକ୍ତି ହଠାତ ହସ୍ପିଟାଲରେ ପଶି ଛୁରୀ ମାଡ଼ କରିଛି। ସେ ହସ୍ପିଟାଲରେ ଯାହାକୁ ପାଇଲା, ତା’କୁ ଛୁରୀ ଭୁଷିବାରୁ ଏଯାଏ ୨ ଜଣଙ୍କ ମୃତ୍ୟୁ ଘଟିଛି। ସେହିପରି ୧୦ରୁ ଅଧିକ ଲୋକ ଆହତ ହୋଇଛନ୍ତି। ତେବେ ଏହା ଆତଙ୍କବାଦୀ ଆକ୍ରମଣ କି ନୁହେଁ, ସେକଥା ସ୍ପଷ୍ଟ ହୋଇନି।
ଚାଇନାର ସରକାରୀ ନ୍ୟୁଜ ଏଜେନ୍ସିର ରିପୋର୍ଟରେ କୁହାଯାଇଛି ଯେ ହସ୍ପିଟାଲରେ ହୋଇଥିବା ଆକ୍ରମଣରେ ୧୦ରୁ ଅଧିକ ଲୋକ ମୃତାହତ ହୋଇଛନ୍ତି। ସ୍ଥାନୀୟ ସମୟ ଦିନ ୧.୨୦ରେ ଏପରି ଘଟଣା ଘଟିଥିଲା। ଝେନଜିଓଙ୍ଗ କାଉଣ୍ଟୀରେ ଥିବା ଗୋଟିଏ ହସ୍ପିଟାଲରେ ପୂରା ଘଟଣା ଘଟିଛି। ଏବେ ସ୍ଥାନୀୟ ଅଧିକାରୀମାନେ ଏହାର ତଦନ୍ତ କରୁଛନ୍ତି ବୋଲି ଏହି ରିପୋର୍ଟରେ କୁହାଯାଇଛି।
ଏଜେନ୍ସି ପକ୍ଷରୁ ହସ୍ପିଟାଲ ଭିତିରର ଗୋଟିଏ ଫଟୋ ଜାରି କରାଯାଇଛି। ଏଥିରେ ଜଣେ ବ୍ୟକ୍ତି ଆଉ ଜଣଙ୍କ ଆଡ଼କୁ ଛୁରୀ ଦେଖାଇ ରହିଛନ୍ତି। ଉକ୍ତ ବ୍ୟକ୍ତି ଜଣଙ୍କ ହସ୍ପିଟାଲ ଲବିରେ ବାଡ଼ି ଧରି ଛିଡ଼ା ହୋଇଥିବା ବେଳେ ତାଙ୍କୁ ଆକ୍ରମଣକାରୀ ଛୁରୀ ଦେଖାଇ ରହିଛି। ସେହିପରି ପୁଲିସ ଅଧିକାରୀ ଘଟଣା ସ୍ଥଳରେ ପହଞ୍ଚିବାର ଫଟୋ ମଧ୍ୟ ସାମ୍ନାକୁ ଆସିଛି।
ଆଉ ଏକ ଘରୋଇ ସଂସ୍ଥା ଆକ୍ରମଣ ସମ୍ପର୍କରେ ଭିନ୍ନ ତଥ୍ୟ ଦେଇଛି। ଘରୋଇ ସଂସ୍ଥା ତା’ ରିପୋର୍ଟରେ କହିଛି ଯେ ଆକ୍ରମଣରେ ୧୦ ଜଣଙ୍କ ମୃତ୍ୟୁ ଘଟିଥିବା ବେଳେ ୨୩ ଜଣ ଆହତ ହୋଇଛନ୍ତି। ସେହିପରି ପୁଲିସ୍ ଘଟଣା ସ୍ଥଳରେ ପହଞ୍ଚି ଆକ୍ରମଣକାରୀକୁ କାବୁ କରିଛି। କିନ୍ତୁ ଆକ୍ରମଣ ପଛର କାରଣ ଜଣାପଡ଼ି ନାହିଁ।