ଆଜିକାଲି ଚାରିଆଡେ ଆର୍ଟିଫିସିଆଲ ଇଣ୍ଟେଲିଜେନ୍ସ ବା 'ଏଆଇ'କୁ ନେଇ ଚର୍ଚ୍ଚା। ବିଭିନ୍ନ କାମକୁ ଏହା ସରଳ କରିବା ସହ ବିଶ୍ୱ ଅଭିବୃଦ୍ଧିରେ ବିପୁଳ ସୁଯୋଗ ପ୍ରଦାନ କରୁଛି। କିନ୍ତୁ ଏହି ସମାନ ସମୟରେ ଏଆଇ ବିଶ୍ୱବ୍ୟାପୀ ଚାକିରି ସୁରକ୍ଷା ପାଇଁ ବିପଦ ମଧ୍ୟ ସୃଷ୍ଟି କରୁଛି। ଆନ୍ତର୍ଜାତୀୟ ମୁଦ୍ରା ପାଣ୍ଠି ବା ଆଇଏମ୍ଏଫ ମୁଖ୍ୟ କ୍ରିଷ୍ଟାଲିନା ଜର୍ଜିଭା ଏଭଳି କିଛି କହିଛନ୍ତି। ଏଆଇ ବିକଶିତ ଦେଶ ଗୁଡ଼ିକରେ ପ୍ରାୟ ୬୦% ଚାକିରି ପ୍ରଭାବିତ କରିବ ବୋଲି ସେ ଚତାଇ ଦେଇଛନ୍ତି।
ଆଇଏମ୍ଏଫ୍ର ଏକ ନୂଆ ରିପୋର୍ଟ ଅନୁଯାୟୀ, ବିକଶିତ ଦେଶଗୁଡିକରେ ଏଆଇର ପ୍ରଭାବ କମ ହେବା ନେଇ ଆଶା କରାଯାଉଛି। କିନ୍ତୁ ବିଶ୍ୱସ୍ତରରେ ପ୍ରାୟ ୪୦% ଚାକିରି ଉପରେ ଏହାର ପ୍ରଭାବ ପଡ଼ିବା ସମ୍ଭାବନା ରହିଛି। ଆପଣଙ୍କ ପାଖରେ ଯେତେ ଅଧିକ ଉଚ୍ଚ-କୁଶଳୀ ଚାକିରି ଅଛି, ଏହାର ପ୍ରଭାବ ସେତେ ଅଧିକ ହେବ ବୋଲି ଆଇଏମ୍ଏଫ୍ ମୁଖ୍ୟ ଏକ ସାକ୍ଷାତକାର୍ରେ କହିଛନ୍ତି।
ଆର୍ଟିଫିସିଆଲ ଇଣ୍ଟେଲିଜେନ୍ସ ଆପଣଙ୍କ ଚାକିରି ଉପରେ ପ୍ରଭାବ ପକାଇପାରେ। ଏହା ଆପଣଙ୍କ ଚାକିରି ଖାଇ ଯାଇପାରେ କିମ୍ବା ଏହା ଆଣପଙ୍କ ଚାକିରି ସୁଯୋଗକୁ ବଢ଼ାଇ ପାରେ। ଆଇଏମ୍ଏଫ୍ ରିପୋର୍ଟରେ ଦର୍ଶାଯାଇଛି ଯେ ଏଆଇ ଦ୍ୱାରା ପ୍ରଭାବିତ ହୋଇଥିବା ଚାକିରିର ଅଧା ଅଂଶ ନକାରାତ୍ମକ ଭାବେ ପ୍ରଭାବିତ ହେବ। ବାକିଗୁଡିକ ପ୍ରକୃତରେ ଏଆଇ ହେତୁ ବର୍ଦ୍ଧିତ ଉତ୍ପାଦନ ଲାଭରୁ ଉପକୃତ ହୋଇପାରନ୍ତି।
ଉଦୀୟମାନ ବଜାର ଏବଂ ବିକାଶଶୀଳ ଅର୍ଥବ୍ୟବସ୍ଥାରେ ଶ୍ରମ ବଜାର 'ଏଆଇ' ଦ୍ୱାରା ସାମାନ୍ୟ ପ୍ରଭାବିତ ହେବ। ସେମାନେ ମଧ୍ୟ ବର୍ଦ୍ଧିତ ଉତ୍ପାଦକତା ଲାଭ କରିବାର ସମ୍ଭାବନା କମ୍, ଯାହା କର୍ମକ୍ଷେତ୍ରରେ ଏହାର ଏକୀକରଣ ଦ୍ୱାରା ଉତ୍ପନ୍ନ ହେବ ବୋଲି ଆଇଏମ୍ଏଫ୍ ରିପୋର୍ଟ ପୂର୍ବାନୁମାନ କରିଛି।
ଆମେ ବିଶେଷ ଭାବରେ ସ୍ୱଳ୍ପ ଆୟକାରୀ ଦେଶଗୁଡିକୁ ଶୀଘ୍ର ଗତି କରିବାରେ ସାହାଯ୍ୟ କରିବା ଉପରେ ଧ୍ୟାନ ଦେବା ଉଚିତ୍ ଯାହା ଦ୍ୱାରା ସେମାନେ କୃତ୍ରିମ ବୁଦ୍ଧିମତା ଦ୍ୱାରା ପ୍ରଦାନ କରାଯାଇଥିବା ସୁଯୋଗର ଲାଭ ଉଠାଇ ପାରିବେ। ଏଆଇ ଟିକେ ଭୟଭୀତ କିନ୍ତୁ ଏହା ସମସ୍ତଙ୍କ ପାଇଁ ଏକ ଜବରଦସ୍ତ ସୁଯୋଗ ବୋଲି ଆଇଏମ୍ଏଫ୍ ମୁଖ୍ୟ କହିଛନ୍ତି।