ପୁଣି ବିଦେଶରେ ଗଡିଲା ଆଉ ଜଣେ ଭାରତୀୟଙ୍କ ମୁଣ୍ଡ। କାନାଡାରେ ହେଲା ଟାର୍ଗେଟ୍ କିଲିଂ। ପଞ୍ଜାବ ଲୁଧିଆନାରା ପଢ଼ିବା ପାଇଁ କାନାଡା ଯାଇଥିବା ଜଣେ ଭାରତୀୟ ଛାତ୍ରଙ୍କୁ ଗୁଳି କରି ହତ୍ୟା କରିଛନ୍ତି ଦୁର୍ବୃତ୍ତ।
ମୃତ ଛାତ୍ର ଜଣକ ହେଲେ ଯୁବରାଜ ଗୋଏଲ। ସେ ୨୦୧୯ ମସିହାରେ ଭିସା ନେଇ କାନାଡାରେ ପହଞ୍ଚିଥିଲେ। ନିକଟରେ ସେ କାନଡୀୟ ସ୍ଥାୟୀ ବାସିନ୍ଦା ମାନ୍ୟତା ପାଇଥିଲେ। ଜୁନ୍ ୭ ତାରିଖ ସକାଳେ ତାଙ୍କୁ ଗୁଳି କରି ହତ୍ୟା କରାଯାଇଛି। ସୁରେ ପୁଲିସ ବ୍ରିଟିଶ କଲମ୍ବିଆର ସୁରେ ସ୍ଥିତ ୧୬୪ ଷ୍ଟ୍ରିଟ୍ର ୯୦୦-ବ୍ଲକରେ ଗୁଳି ବିନିମୟ ଖବର ପାଇଥିଲା। ସେଠାରେ ପହଞ୍ଚିବା ପରେ ଅଧିକାରୀମାନେ ଯୁବରାଜଙ୍କ ମୃତଦେହ ପାଇଥିଲେ। ଏହି ମାମଲାରେ ପୁଲିସ ୪ ଜଣ ସନ୍ଦିଗ୍ଧଙ୍କୁ ଗିରଫ କରିଛି।
Also Read
ତେବେ ପ୍ରାଥମିକ ତଦନ୍ତରୁ ଯୁବରାଜଙ୍କୁ ଟାର୍ଗେଟ୍ କରି ଗୁଳି ମାଡ କରାଯାଇଥିବା ପୁଲିସ କହିଛି। ଯୁବରାଜଙ୍କର କୌଣସି ଅପରାଧିକ ରେକର୍ଡ ନଥିଲା କି କାହା ସହ ତାଙ୍କର କୌଣସି ଶତ୍ରୁତା ନଥିଲା। ତେବେ ତାଙ୍କୁ କାହିଁକି ହତ୍ୟା କରାଗଲା ତାହା ଜାଣିବା ପାଇଁ ଅନୁସନ୍ଧାନ ଜାରି ରହିଛି ବୋଲି ରୟାଲ କାନାଡୀୟ ପୁଲିସ କହିଛି।
ସୂଚନା ମୁତାବକ, ୨୮ ବର୍ଷୀୟ ଯୁବରାଜ କାନାଡାରେ ପାଠ ପଢ଼ିବା ସହ ଜଣେ ସେଲ୍ସ ଏକ୍ଜିକ୍ୟୁଟିଭ୍ ଭାବରେ କାର୍ଯ୍ୟ କରୁଥିଲେ। ତାଙ୍କ ବାପା ରାଜେଶ ଗୋଏଲ ଏକ କାଠ ବ୍ୟବସାୟ କରୁଥିବାବେଳେ ତାଙ୍କ ମା ଶକୁନ ଗୋଏଲ ଜଣେ ଗୃହିଣୀ ଅଟନ୍ତି। ଯୁବରାଜ ତାଙ୍କର ଏକମାତ୍ର ପୁଅ ଥିଲେ। ଏବେ ପୁଅର ମୃତ୍ୟୁ ଖବର ପାଇବା ପରେ ତାଙ୍କ ପରିବାର ଲୋକେ ଭାଙ୍ଗି ପଡିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
