ଟ୍ରମ୍ପଙ୍କୁ ନୋବେଲ ଶାନ୍ତି ପୁରସ୍କାର ପାଇଁ ମନୋନୀତ କଲେ ନେତାନ୍ୟାହୁ, ଚିଠି କଲେ ହସ୍ତାନ୍ତର

ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ନୋବେଲ ଶାନ୍ତି ପୁରସ୍କାର ପାଇଁ ମନୋନୀତ କରିଛନ୍ତି। ଏକଥା ସେ ସୋମବାର ଟ୍ରମ୍ପଙ୍କୁ ଅବଗତ ମଧ୍ୟ କରିଛନ୍ତି। ଏଥିସହ ହ୍ୱାଇଟ ହାଉସରେ ଚାଲିଥିବା ଇସ୍ରାଏଲ ଓ ଆମେରିକାର ବୈଠକରେ ନେତାନ୍ୟାହୁ ମନୋନୀତ କରାଯାଇଥିବା ଗୋଟିଏ ଚିଠିକୁ ଟ୍ରମ୍ପଙ୍କୁ ହସ୍ତାନ୍ତର କରିଛନ୍ତି।

ବୈଠକ ବେଳେ ନେତାନ୍ୟାହୁ କହିଛନ୍ତି, “ମୁଁ ଆପଣଙ୍କୁ କିଛି ଦେବାକୁ ଚାହୁଁଛି ମିଷ୍ଟର ପ୍ରେସିଡେଣ୍ଟ। ନୋବେଲ ପୁରସ୍କାର କମିଟିକୁ ମୁଁ ପଠାଇଥିବା ଚିଠି ଆପଣଙ୍କୁ ଦେଉଛି। ଆପଣଙ୍କୁ ନୋବେଲ ଶାନ୍ତି ପୁରସ୍କାର ପାଇଁ ମନୋନୀତ କରାଯାଇଛି। ଏଇଟା ସେହି ଚିଠି। ନୋବେଲ ଶାନ୍ତି ପୁରସ୍କାର ପାଇବାକୁ ଆପଣ ହକଦାର ଓ ଆପଣ ଏହା ନିଶ୍ଚିତ ପାଇବେ।”

ଏକଥା କହିବା ପରେ ନେତାନ୍ୟାହୁ ମନୋନୀତ ପତ୍ରକୁ ଟ୍ରମ୍ପଙ୍କୁ ହସ୍ତାନ୍ତର କରିଛନ୍ତି। ଟ୍ରମ୍ପ ନିଜକୁ ଶାନ୍ତିର ଦୂତ ବୋଲି ପୂର୍ବରୁ କହି ବୁଲୁଥିବା ବେଳେ ନେତାନ୍ୟାହୁଙ୍କ ବୟାନ ପରେ ସେ ଆହୁରି ଉତ୍ସାହିତ ହୋଇପଡ଼ିଛନ୍ତି। ପ୍ରଥମେ ସେ ନେତାନ୍ୟାହୁଙ୍କ ଚିଠି ଦେଖି ଚକିତ ହୋଇଯାଇଥିଲେ। କିନ୍ତୁ ଏହାପରେ ସେ କହିଛନ୍ତି, “ଆପଣଙ୍କ ଠାରୁ ଏହା ଆସିବା ବହୁତ ଗୁରୁତ୍ୱ ବହନ କରେ। ବହୁତ ବହୁତ ଧନ୍ୟବାଦ।”

ଇସ୍ରାଏଲ ପ୍ରଧାନମନ୍ତ୍ରୀ ନେତାନ୍ୟାହୁ ନିଜ ଟିମ ସହ ହ୍ୱାଇଟ ହାଉସକୁ ଡିନର କରିବାକୁ ଆସିଥିଲେ। ଚଳିତ ବର୍ଷ ନେତାନ୍ୟାହୁ ଓ ଟ୍ରମ୍ପଙ୍କ ମଧ୍ୟରେ ଏହା ତୃତୀୟ ବୈଠକ।