ଆମେରିକାର ଗ୍ରୀନ୍ କାର୍ଡ ପାଇବା ପୂର୍ବରୁ ୪ ଲକ୍ଷରୁ ଅଧିକ ଭାରତୀୟଙ୍କର ମୃତ୍ୟୁ ହୋଇ ସାରିଥିବ। ସେଠାରେ ବାସ କରୁଥୁବା ପ୍ରାୟ ୪ ଲକ୍ଷ ଭାରତୀୟ ଆମେରିକା ଗ୍ରୀନ୍ କାର୍ଡକୁ ଅପେକ୍ଷା କରି କରି ଆରପାରିକୁ ଚାଲିଯିବେ ବୋଲି ଏକ ଅନୁଧ୍ୟାନରୁ ଜଣାପଡିଛି। ରିପୋର୍ଟରେ କୁହାଯାଇଛି ଯେ, ଆମେରିକାର ରୋଜଗାର ଭିତ୍ତିକ ଗ୍ରୀନ କାର୍ଡ ବ୍ୟାକଲଗରେ ୧୧ ଲକ୍ଷରୁ ଅଧିକ ଭାରତୀୟଙ୍କ ଆବେଦନ ଏବେ ବିଚାରାଧୀନ ଅବସ୍ଥାରେ ପଡିରହିଛି।
ଏହି ଗ୍ରୀନ୍ କାର୍ଡ ବା ସ୍ଥାୟୀ ରେସିଡେଣ୍ଟ କାର୍ଡ ହେଉଛି ଆମେରିକାର ପ୍ରବାସୀମାନଙ୍କୁ ସ୍ଥାୟୀ ବାସସ୍ଥାନ ପ୍ରଦାନ କରୁଥିବା ଏକ ଦଲିଲ। ଏହି ଦଲିଲ୍ ପାଇବା ପାଇଁ ପ୍ରାୟ ୧୧ ଲକ୍ଷ ଭାରତୀୟ ଆବେଦନ କରିଥିବା ବେଳେ ବର୍ତ୍ତମାନ ସୁଦ୍ଧା ଏହାର ସମାଧାନ ହୋଇପାରି ନାହିଁ। ଏହାର ସମାଧାନ ହେବା ପୂର୍ବରୁ ପ୍ରାୟ ୪ ଲକ୍ଷ ଭାରତୀୟଙ୍କର ମୃତ୍ୟୁ ହୋଇ ସାରିଥିବ ବୋଲି ଏକ ଅଧ୍ୟୟନରୁ ପ୍ରକାଶ ପାଇଛି।
Also Read
ଆମେରିକାରେ ଥିବା ଥିଙ୍କ୍ ଟ୍ୟାଙ୍କ କ୍ୟାଟୋ ଇନଷ୍ଟିଚ୍ୟୁଟ୍ ରିପୋର୍ଟରେ କହିଛି ଯେ, ବର୍ତ୍ତମାନ ଦେଶରେ ବିଚାରାଧୀନ ଥିବା ୧୮ ଲକ୍ଷ ନିଯୁକ୍ତି ଭିତ୍ତିକ ଗ୍ରୀନ୍ କାର୍ଡ ଆବେଦନରେ ୬୩% ଭାରତୀୟ ଅଛନ୍ତି। ଏହି ବ୍ୟାକଲଗରେ ପରିବାର ପ୍ରାୟୋଜିତ(ଫ୍ୟାମିଲି-ସ୍ପୋନସୋର୍ଡ) ସିଷ୍ଟମରୁ ୮୩ ଲକ୍ଷ ବିଚାରାଧୀନ ମାମଲା ମଧ୍ୟ ଯୋଗ କରାଯାଇଛି। ଏହିସବୁ ଆବେଦନର ସମାଧାନ ସରୁ ସରୁ ଯଦି ଆମେରିକାରେ ନୂଆ ଭାରତୀୟ ଆବେଦନ କରନ୍ତି ତେବେ ତାଙ୍କୁ ଗ୍ରୀନ୍ କାର୍ଡ ପାଇବା ପାଇଁ ପ୍ରାୟ ୧୩୪ ବର୍ଷରୁ ଅଧିକ ସମୟ ଲାଗିଯିବ।
ଫଳରେ ୪ ଲକ୍ଷ ୨୪ ହଜାର ରୋଜଗାର ଭିତ୍ତିକ ଆବେଦନକାରୀ ଅପେକ୍ଷା କରି କରି ମରିଯିବେ ଏବଂ ସେମାନଙ୍କ ମଧ୍ୟରୁ 90% ରୁ ଅଧିକ ଭାରତୀୟ ଥିବେ। ବର୍ତ୍ତମାନ ସମସ୍ତ ନୂତନ ନିଯୁକ୍ତିଦାତା ପ୍ରାୟୋଜିତ ଆବେଦନକାରୀଙ୍କ ମଧ୍ୟରୁ ଅର୍ଦ୍ଧେକ ଭାରତୀୟ ବୋଲି ରିପୋର୍ଟରେ କୁହାଯାଇଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
