ଜମ୍ମୁ-କଶ୍ମୀର ପ୍ରସଙ୍ଗ: ପାକ୍‌ ସହ ମିଳିତ ବିବୃତିରେ ଏମିତି କଥା କହିଲା ସାଉଦି ଆରବ

ଜମ୍ମୁ-କଶ୍ମୀରରେ ଭାରତର ଆଭିମୁଖ୍ୟ ସହ ଏକମତ ହୋଇଛି ସାଉଦି ଆରବ। ପାକିସ୍ତାନ ଓ ରିୟାଦ ପକ୍ଷରୁ ଜାରି ମିଳିତ ବିବୃତିରେ ସାଉଦି ଆରବ ବଡ଼ କଥା କହିଛି। ଭାରତ ସ୍ୱରରେ ସ୍ୱର ମିଳାଇ ନୂଆଦିଲ୍ଲୀ ଓ ଇସଲାମାବାଦ ସେମାନଙ୍କର ଦୀର୍ଘ କାଳୀନ ଦ୍ୱିପାକ୍ଷିକ ପ୍ରସଙ୍ଗକୁ ମିଳିତ ଭାବେ ସମାଧାନ କରନ୍ତୁ ବୋଲି ସାଉଦି କହିଛି।

ଏପ୍ରିଲ ୭ରେ ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ଶରିଫ ଓ ସାଉଦି ଶାସକ ପ୍ରିନ୍ସ ମହମ୍ମଦ ବିନ ସଲମାନ ମକ୍କାରେ ଥିବା ଅଲ ସାଫାରେ ଆଲୋଚନା କରିଥିଲେ। ଏହାପରେ ସାଉଦି ଓ ପାକିସ୍ତାନ ପକ୍ଷରୁ ଏକ ମିଳିତ ବିବୃତି ଜାରି କରାଯାଇଛି।

ଏଥିରେ କୁହାଯାଇଛି ଯେ “ଦୁଇ ପକ୍ଷ ଭାରତ ଓ ପାକିସ୍ତାନ ମଧ୍ୟରେ ଥିବା ସମସ୍ୟାକୁ ମିଳିତ ଭାବେ ଆଲୋଚନା ଦ୍ୱାରା ସମାଧାନ କରନ୍ତୁ ବୋଲି ଗୁରୁତ୍ୱ ଦେଉଛନ୍ତି। ବିଶେଷ କରି ଭାରତ ଓ ପାକିସ୍ତାନ ମିଳିତ ଭାବେ ଜମ୍ମୁ-କଶ୍ମୀର ବିବାଦ ପ୍ରସଙ୍ଗରେ ଆଲୋଚନା କରି ଉକ୍ତ ଅଞ୍ଚଳରେ ଶାନ୍ତି ଓ ସ୍ଥିରତା ଆଣନ୍ତୁ।”

ଭାରତ ଅନେକ ଥର ପୂର୍ବରୁ କହି ସାରିଛି ଯେ କଶ୍ମୀର ହେଉଛି ନୂଆଦିଲ୍ଲୀ ଓ ଇସଲାମାବାଦର ଦ୍ୱିପାକ୍ଷିକ ପ୍ରସଙ୍ଗ। ଏଥିରେ ତୃତୀୟ ପକ୍ଷର ମଧ୍ୟସ୍ଥତା କିମ୍ବା ହସ୍ତକ୍ଷେପର କୌଣସି କାରଣ ନାହିଁ।

ଭାରତ ଓ ପାକିସ୍ତାନ ସହ ସାଉଦିର ସମ୍ପର୍କ ଭଲ। ନୂଆଦିଲ୍ଲୀ ଓ ରିୟାଦ ମଧ୍ୟରେ ସମ୍ପର୍କ ଆହୁରି ସୁଦୃଢ଼ ହୋଇଛି। ଏହି କାରଣ ପାଇଁ ସାଉଦି ଆରବ ମିଳିତ ବିବୃତିରେ ମଧ୍ୟ ଜମ୍ମୁ-କଶ୍ମୀରକୁ ଭାରତ-ପାକିସ୍ତାନ ମଧ୍ୟରେ ଥିବା ଦ୍ୱିପାକ୍ଷିକ ପ୍ରସଙ୍ଗ ବୋଲି କହିଛି।

ଜମ୍ମୁ-କଶ୍ମୀର ପ୍ରସଙ୍ଗରେ ସାଉଦି ଆରବ ସବୁବେଳେ ବାଲାନ୍ସ ଆଭିମୁଖ୍ୟ ଗ୍ରହଣ କରିଛି। ୨୦୧୯ରେ ଯେତେବେଳେ ଜମ୍ମୁ-କଶ୍ମୀରରୁ ଧାରା ୩୭୦ ହଟିଥିଲା ସେତେବେଳେ ସାଉଦି ଚିନ୍ତା ପ୍ରକଟ କରି ଥିଲା। କିନ୍ତୁ ଖୋଲାଖୋଲି ଭାବେ ଏହାକୁ ନିନ୍ଦା କରି ନଥିଲା। ସେହିପରି ଉକ୍ତ ପ୍ରସଙ୍ଗକୁ ଭାରତର ଆଭ୍ୟନ୍ତରୀଣ ବ୍ୟାପାର ବୋଲି କହିଥିଲା।