ଶ୍ରୀଲଙ୍କାରରେ ସରିଛି ରାଷ୍ଟ୍ରପତି ନିର୍ବାଚନ। ଚାଲିଛି ଭୋଟ୍ ଗଣତି। ଶ୍ରୀଲଙ୍କାର ନୂଆ ରାଷ୍ଟ୍ରପତି ଅନୁରା କୁମାର ଦିଶାନାୟକେ ହେବେ। ଏହା ଏକ ପ୍ରକାର ସ୍ପଷ୍ଟ ହୋଇଯାଇଛି। ପ୍ରାରମ୍ଭିକ ଧାରା ଅନୁଯାୟୀ, ଜାତୀୟ ପିପୁଲ୍ସ ପାୱାର ଅନୁରା କୁମାର ଦିଶାନାୟକେ ଆଗୁଆ ଅଛନ୍ତି। ତାଙ୍କୁ ୫୩% ମିଳିଥିବା ସୂଚନା ରହିଛି।
ଶ୍ରୀଲଙ୍କାର ରାଷ୍ଟ୍ରପତି ନିର୍ବାଚନ ପାଇଁ ଭୋଟ୍ ଅନୁଷ୍ଠିତ ପରେ ରାତିର କର୍ଫ୍ୟୁ ମଧ୍ୟରେ ଗଣତି ଆରମ୍ଭ ହୋଇଥିଲା। ଜାତୀୟ ପିପୁଲ୍ସ ପାୱାର ଅନୁରା କୁମାର ଦିଶାନାୟକେ ଆଗୁଆ ଅଛନ୍ତି। ତାଙ୍କର ଆକର୍ଷଣୀୟ ପ୍ରଦର୍ଶନ ସହିତ ସେ ଆଜି ଶ୍ରୀଲଙ୍କାର ନବମ କାର୍ଯ୍ୟକାରୀ ରାଷ୍ଟ୍ରପତି ହେବାକୁ ଯାଉଛନ୍ତି।
୨୨ ଟି ନିର୍ବାଚନ ଜିଲ୍ଲାର ୧୩,୪୦୦ ମତଦାନ କେନ୍ଦ୍ରରେ ଶନିବାର ସକାଳ ୭ ଟାରୁ ଅପରାହ୍ନ ୪ ଟା ପର୍ଯ୍ୟନ୍ତ ମତଦାନ ହୋଇଥିଲା। ପ୍ରାୟ ୧୭ ମିଲିଅନ ଭୋଟର ଏଥିରେ ଭାଗ ନେଇଥିଲେ। ରାତିରୁ ଗଣତି ଜାରି ରହିଥିବା ବେଳେ ୫୬ବର୍ଷୀୟ ନେତା ତାଙ୍କ ପ୍ରତିଦ୍ୱନ୍ଦ୍ୱୀ ସାଜିଥ ପ୍ରେମାଦାସ ଏବଂ ରାନିଲ ବିକ୍ରମସିଂଘେଙ୍କ ଠାରୁ ଆଗୁଆ ଅଛନ୍ତି।
୨୨ଟି ଜିଲ୍ଲା ମଧ୍ୟରୁ ସାତଟିର ଫଳାଫଳ ତଥା ପୋଷ୍ଟାଲ ବାଲାଟ୍ ଅନୁଯାୟୀ, ଏନପିପି ନେତା ୫୭ % ଭୋଟ୍ ପାଇଥିବାବେଳେ ଅନ୍ୟ ଦୁଇ ପ୍ରାର୍ଥୀ ମାତ୍ର ୧୯ % ଭୋଟ୍ ପାଇଛନ୍ତି। ବିଶେଷଜ୍ଞମାନେ କହିଛନ୍ତି ଯେ ଦିଶାନାୟକେ ତାଙ୍କ ପ୍ରତିଦ୍ୱନ୍ଦ୍ୱୀଙ୍କ ଠାରୁ ୫୦ ପ୍ରତିଶତରୁ ଅଧିକ ଭୋଟ୍ରେ ଜିତିବା ନେଇ ସମ୍ଭାବନା ରହିଛି।
ଅନୁରା କୁମାର ଦିଶାନାୟକେ କଲମ୍ବୋ ଜିଲ୍ଲାର ସାଂସଦ ଅଟନ୍ତି। ବର୍ତ୍ତମାନ ସେ ନ୍ୟାସନାଲ ପିପୁଲ୍ସ ପାୱାର ଏବଂ ଜନତା ଭିମୁକଥୀ ପେରୁମୁନା ପାର୍ଟିର ନେତା ଅଟନ୍ତି। ଏନପିପି ମିଳିତ ମଞ୍ଚର ପ୍ରାର୍ଥୀ ଭାବରେ ସେ ରାଷ୍ଟ୍ରପତି ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିଥିଲେ। ଏହି ମିଳିତ ମଞ୍ଚରେ ମାର୍କ୍ସବାଦୀ-ଜନତା ଜନତା ଭିମୁକଟି ପେରେମୁନା (ଜେଭିପି) ପାର୍ଟି ଅନ୍ତର୍ଭୁକ୍ତ।
୨୦୨୨ ମସିହାରେ ହୋଇଥିବା ଆର୍ଥିକ ସଙ୍କଟ ପରେ ଶ୍ରୀଲଙ୍କାରେ ଏହା ହେଉଛି ପ୍ରଥମ ରାଷ୍ଟ୍ରପତି ନିର୍ବାଚନ। ଖାଦ୍ୟ ଶସ୍ୟ, ଇନ୍ଧନ ଏବଂ ଅନ୍ୟାନ୍ୟ ଜରୁରୀ ଦ୍ରବ୍ୟର ଅଭାବ ମଧ୍ୟରେ ଶ୍ରୀଲଙ୍କା ଏପ୍ରିଲ୍ ୨୦୨୨ ରେ ଦେବାଳିଆ ହୋଇଥିବା ଘୋଷଣା କରାଯାଇଥିଲା। ଦେଶରେ ମାସେ ଧରି ବିରୋଧ ପ୍ରଦର୍ଶନ ହିଂସାତ୍ମକ ରୂପ ନେବା ପରେ ରାଷ୍ଟ୍ରପତି ଗୋଟାବାୟା ରାଜପାକ୍ଷେ ଶ୍ରୀଲଙ୍କା ଛାଡି ଇସ୍ତଫା ଦେବାକୁ ବାଧ୍ୟ ହୋଇଥିଲେ। ପରେ ବିକ୍ରମସିଂଘେଙ୍କୁ ନୂତନ ରାଷ୍ଟ୍ରପତି ଭାବରେ ନିଯୁକ୍ତ କରାଯାଇଥିଲା।