ଦହି ଏକ ପୁଷ୍ଟିକର ଖାଦ୍ୟ ପଦାର୍ଥ। ବିଶେଷଜ୍ଞମାନେ ଏହାକୁ ସ୍ୱାସ୍ଥ୍ୟ ଦୃଷ୍ଟିରୁ ପ୍ରତ୍ୟେକ କ୍ଷେତ୍ରରେ ଲାଭଦାୟକ ବୋଲି ବିବେଚନା କରନ୍ତି। ଦହିରେ ପ୍ରୋଟିନ୍, କ୍ୟାଲସିୟମ୍, ଭିଟାମିନ୍ B12 ଥାଏ। କିନ୍ତୁ ଗର୍ଭବତୀ ମହିଳାମାନେ ଏହାକୁ ଖାଦ୍ୟରେ ଅନ୍ତର୍ଭୁକ୍ତ କରିବାକୁ ନେଇ ଅନେକ ସମୟରେ ଦ୍ୱନ୍ଦ୍ୱ ଉପୁଜେ। ଅଧିକାଂଶ ଲୋକେ ଭାବନ୍ତି ଯେ, ଦହି ଖାଇବା ଦ୍ୱାରା ଗର୍ଭସ୍ଥ ଶିଶୁ ଉପରେ କୁପ୍ରଭାବ ପଡିଥାଏ ବୋଲି। ଯଦି ଆପଣ ମଧ୍ୟ ଏହି ଦ୍ୱନ୍ଦ୍ୱରେ ଅଛନ୍ତି, ତେବେ ପଢନ୍ତୁ ଏହି ଆଲେଖ୍ୟ।
ଗର୍ଭାବସ୍ଥାରେ ଦହି ଖାଇବା ନିରାପଦ କି? ଏହାର ଉତ୍ତର ହେବ ହଁ। ଗର୍ଭାବସ୍ଥାରେ ଦହି ଖାଇବା ନିରାପଦ। କାରଣ ବିଶ୍ୱ ସ୍ୱାସ୍ଥ୍ୟ ସଂଗଠନ ଦହିକୁ ଗର୍ଭଧାରଣ ପାଇଁ ଏକ ସୁସ୍ଥ ଖାଦ୍ୟ ବୋଲି ବର୍ଣ୍ଣନା କରିଛନ୍ତି। ଏଥି ସହିତ ଅଷ୍ଟ୍ରେଲିଆର ଜାତୀୟ ସ୍ୱାସ୍ଥ୍ୟ ଏବଂ ଚିକିତ୍ସା ଅନୁସନ୍ଧାନ ପରିଷଦ ମଧ୍ୟ ଗର୍ଭବତୀ ମହିଳାମାନଙ୍କୁ ପ୍ରତିଦିନ ଖାଦ୍ୟରେ ଦହି ଅନ୍ତର୍ଭୁକ୍ତ କରିବାକୁ ପରାମର୍ଶ ଦେଇଥାଏ। ତେଣୁ ଗର୍ଭାବସ୍ଥାରେ ଦହିର ଏହି ବ୍ୟବହାର କେବଳ ସୁରକ୍ଷିତ ନୁହେଁ ବରଂ ବହୁତ ଲାଭଦାୟକ। ତେବେ ଜାଣନ୍ତୁ ଦହିରେ କଣ ଉପକାରିତା ରହିଛି..
ଦହିର ଉପକାରିତା
- ଦହି ଖାଇବା ଦ୍ୱାରା ରୋଗ ପ୍ରତିରୋଧ ପ୍ରଣାଳୀ(ଇମ୍ୟୁନିଟି) ଦୃଢ଼ ହୁଏ। ଦହିରେ ଥିବା ପ୍ରୋବାୟୋଟିକ୍ସ ଅର୍ଥାତ୍ ଭଲ ଜୀବାଣୁ ଶରୀରର ରୋଗ ପ୍ରତିରୋଧକ ଶକ୍ତି ବୃଦ୍ଧି କରି ସଂକ୍ରମଣ ସହିତ ଲଢ଼ିବାରେ ସାହାଯ୍ୟ କରେ।
- ଗର୍ଭାବସ୍ଥାରେ ମୁଡ୍ ସୁଇଙ୍ଗ୍ ଏବଂ ଚାପରୁ ରକ୍ଷା ପାଇବା ପାଇଁ ଦହି ଖାଇବା ଲାଭଦାୟକ। ଦହିରେ ଥିବା ପ୍ରୋବାୟୋଟିକ୍ସ ମନୋବଳକୁ ଉନ୍ନତ କରିଥାଏ ଏବଂ ଚିନ୍ତା ଦୂର କରେ। ଉଦାସୀନତା ସମ୍ବନ୍ଧୀୟ ଲକ୍ଷଣରୁ ମୁକ୍ତି ପାଇଁ ଦହି ଉତ୍ତମ।
- ଗର୍ଭାବସ୍ଥାରେ ବ୍ଲଡ୍ ପ୍ରେସର(ରକ୍ତଚାପ) ବୃଦ୍ଧି ସମସ୍ୟା କାରଣରୁ ଜଟିଳତା ଆସିପାରେ। ଏଭଳି ପରିସ୍ଥିତିରେ ଦହି ଖାଇବା ଲାଭଦାୟକ ହୋଇପାରେ। ଏଥିରେ ଥିବା ଆଣ୍ଟି-ହାଇପରଟେନ୍ସିଭ୍ ପ୍ରଭାବ ରକ୍ତଚାପକୁ ବଜାୟ ରଖିବାରେ ସାହାଯ୍ୟ କରିଥାଏ।
- ଅସ୍ଥି ଏବଂ ମାଂସପେଶୀକୁ ଶକ୍ତିଶାଳୀ କରେ ଦହି। ଏଥିରେ ଥିବା ପ୍ରୋଟିନ୍ ଏବଂ କ୍ୟାଲସିୟମ୍ ହାଡକୁ ଦୁର୍ବଳ ହେବାରୁ ରକ୍ଷା କରିଥାଏ। ସୁସ୍ଥ ମାଂସପେଶୀ ଗଠନ କରିବାରେ ସାହାଯ୍ୟ କରେ।
- ଗର୍ଭାବସ୍ଥାରେ ଅମ୍ଳତା ଏବଂ ହଜମ ସମ୍ବନ୍ଧୀୟ ସମସ୍ୟା ଦେଖାଯାଏ। ଏପରି ପରିସ୍ଥିତିରେ, ଯଦି ଦହି ଖାଆନ୍ତି, ତେବେ ଏହା ହଜମ ସମ୍ବନ୍ଧୀୟ ସମସ୍ୟାକୁ ନିୟନ୍ତ୍ରଣ କରିବାରେ ସାହାଯ୍ୟ କରିଥାଏ।
Disclaimer: ଉପରସ୍ଥ ସମସ୍ତ ବିବରଣୀ ସାଧାରଣ ସୂଚନା ଉପରେ ଆଧାରିତ। କୌଣସି ସ୍ୱାସ୍ଥ୍ୟଗତ ସମସ୍ୟା ପାଇଁ ଡାକ୍ତରଙ୍କ ପରାମର୍ଶ ଗ୍ରହଣ କରିବା ଉପାଦେୟ।