ମୁଁ ସୁରୁଜ ଦିଗାଳ

ମୁଁ ଦିନ ମଜୁରିଆ ସୁରୁଜ ଦିଗାଳ
ଜବ୍‌ କାର୍ଡ ନମ୍ବର ସାତସହ ସତୁରି

ପାଞ୍ଚ ପ୍ରାଣୀ କୁଟୁମ୍ବରେ
ମୋ ସ୍ତ୍ରୀ ଛାଲି, ଝିଅ ଲିଲି ଆଉ ବୁଢ଼ା ବାପାମାଆ..
ମହାତ୍ମା ଗାନ୍ଧୀ ନିଶ୍ଚିତ କର୍ମ ଯୋଜନାରେ
ଘର ପିଛା ୧୦୦ ଦିନ ମଜୁରୀରେ
ବରଷକ ରୋଜଗାର ଟଙ୍କା କୋଡିଏ ହଜାର..
ମୁଁ ସୁରୁଜ ଦିଗାଳ
ଗାଁ ମୋର ବିଲମାଳ
ଜିଲ୍ଲା କନ୍ଧମାଳ..

ରେସନ କାର୍ଡରେ ପାଞ୍ଚ ପ୍ରାଣୀ କୁଟୁମ୍ବ ମୋ ପୋଷିହୁଏ
ମାଗଣା ଯୋଜନାରେ ମାସକୁ ଚାଉଳ ପଚିଶ କେଜିରେ
ନିଅଣ୍ଟିଆ ଡାଲି ତେଲ ଲୁଣ ସଂସାରରେ
ଝିଅ ମୋର ଚିକିମିକି ସପନର ହାଇମାରେ
ତା’ ଇଛାର ତାଲିକାରେ ମୁଁ ଲୁହ ପୋଛେ ଗାମୁଛାରେ
ସ୍ତ୍ରୀର ତତଲା ନିଃଶ୍ୱାସରେ ମଉନରେ ଝାଳ ମାରେ

ରଜ କୁଆଁର ପୁନେଇରେ ଝିଅର ପୁରୁଣା ଜାମା ଆଉ
ମୋ ମାଆର ସାତସିଆଁ ଲୁଗା
ଡହଡ଼ହ ଖରାର ଧାସରେ ବତୁରେ ମୋ ମାଟିକାନ୍ଥ
ଅଲଣିଆ ଲାଗେ ଗାଁ ମୁଣ୍ଡ ତୋଟା କଞ୍ଚା ଆମ୍ବର ଚଟଣି
ଆଉ ପଖାଳ କଂସାର ବାସି ତୋରାଣି..

ପୋଖରୀ ଖୋଳା ମାଟିର ବୋଝ ତୁଳାବସ୍ତା ପରି ଲାଗେ
ସେମାନଙ୍କ ଆଶାର ଗଣ୍ଠିଲି ଭାରରେ
ବେଳେବେଳେ କାହାକୁ ମୁଁ ପଚାରେ କେଜାଣି
ବରଷକ ବାରମାସ କାମ ମିଳନ୍ତାନି ?

ମୁଁ ସୁରୁଜ ଦିଗାଳ
ଗାଁ ମୋର ବିଲମାଳ
ଜିଲ୍ଲା କନ୍ଧମାଳ

ଡ଼ଃ ରିନା ରାଉତରାୟ
rinaroutray@rediffmail.com