ତୁମକୁ ତୁମ ପାଖେ ଛାଡ଼ି ଚାଲି ଯାଉଛି ବହୂ ଦୂର
ଖୋଜିବନି ଆଉ -
ମୁଁ ବି ମୋତେ ମୋ ଭିତରୁ କାଢ଼ି ଫିଙ୍ଗି ଦେଉଛି…
କାଳେ ଖୋଜିବ ମନ ତୁମକୁ
ତମେ ମନେପଡିଯିବ !
ସବୁତ ପାଇଲି –
ହରେଇବାର ହଜେଇବାର ଦୁଃଖକୁ ବି
ଖୁବ୍ ପାଖରୁ ପରଖିଲି ,
ଏବେ ଚାହେଁ ମୁକ୍ତି
ଲୋଭ ଲାଭ
ମୋହ କୋହରୁ !
ସେହି ସମର୍ପଣକୁ ତୁମର
ସମାଧିସ୍ଥ କରିଦେଉଛି
ସ୍ମୃତିର ଅଭୁଲା ଇଲାକାରେ ...
ସେହି ସର୍ତ୍ତକୁ ସାଇତି ରଖୁଛି
ପୂରା କରିବାକୁ ଆଉ ଏକ ଜନ୍ମରେ !
କେବେ କାନ୍ଦିବନି …
କେବେ ଝୁରିବନି ମତେ
ଆମ ଅତୀତକୁ ଟାଣିବନି ବର୍ତ୍ତମାନକୁ
ତୁମକୁ ସେ ଅସ୍ଥିର କରିଦେବ ...
ମୋ ଅନୁପସ୍ଥିରେ ତୁମକୁ କିଏ ବୁଝେଇବ
ତୁମକୁ ତୁମ ପାଖେ ରଖିଦେଉଛି
ଫେରେଇବନି ଆଉ
ତୁମକୁ ତୁମ ପାଖେ ଛାଡ଼ି ଚାଲି ଯାଉଛି
ଖୋଜିବନି ।
ମିଳନ ପରେ ବିଚ୍ଛେଦ
ଅସ୍ତ ପରେ ବି ଉଦୟ ...
ଏହା ଗୋଟିଏ ଆପ୍ତ ବାକ୍ୟ
ସଂପର୍କର ବର୍ଣ୍ଣବୋଧ ବହିରେ ଅଭୁଲା ଶବ୍ଦ
ଆମର ବିଗତ ଦିନର
ସ୍ମୃତିର ଫର୍ଦ୍ଦ...
ପ୍ରେମ ପ୍ରତୀକ୍ଷା ତିତିକ୍ଷା ନଥିଲେ-
ସତରେ ,ଜୀବନଟା ଶୁଷ୍କ ମରୁ ଭୂଇଁଟିଏ
ପ୍ରତିଶୃତି ଓ ପ୍ରେରଣାରେ
ହଜାର ପୁଲକ ଜନ୍ମେ .... ହୃଦୟରେ
---------
ପ୍ରଦେଶ ପ୍ରତ୍ୟୁଷ , ଫୋନ୍ -୯୮୫୩୬୦୯୨୦୫
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
