ରାଜ୍ୟରେ ବିଗତ ୫ବର୍ଷ ମଧ୍ୟରେ ପାଣିରେ ବୁଡ଼ି ମୋଟ ୭୮୭୪ଜଣ ଜୀବନ ହରାଇବା ପରେ ରାଜ୍ୟ ସରକାରଙ୍କ ଚେତା ପଶିଛି । ମହାନଦୀ,କାଠଯୋଡ଼ି, ବୈତରଣୀ, ବ୍ରାହ୍ମଣୀ ଆଦି ନଦୀ ସମେତ ଏହାର ଶାଖା ନଦୀଗୁଡ଼ିକରେ ଥିବା ଘାଟଗୁଡ଼ିକୁ ଅଧିକ ସୁରକ୍ଷିତ କରାଯିବ । ରାଜ୍ୟରେ ନଦୀରେ ବୁଡ଼ି ଲୋକମାନେ ପ୍ରାଣ ହରାଉଥିବା ମାମଲା ବୃଦ୍ଧି ପାଉଥିବାରୁ ରାଜ୍ୟ ସରକାର ଏବେ ପ୍ରାୟ ୧୦୦ଟି ନଦୀ ଘାଟକୁ ଚିହ୍ନଟ କରି ସେଠାରେ ଆବଶ୍ୟକ ସୁରକ୍ଷା ବ୍ୟବସ୍ଥା ଗ୍ରହଣ କରିବାକୁ ନିଷ୍ପତ୍ତି ନେଇଛନ୍ତି । ଏଥିପାଇଁ ରାଜ୍ୟ ସ୍ୱତନ୍ତ୍ର ରିଲିଫ କମିଶନର(ଏସଆରସି) ଏକ ନୋଟସିଟ ପଠାଇବା ପରେ ଜଳସମ୍ପଦ ବିଭାଗ ପକ୍ଷରୁ ଏହି ନଦୀଘାଟଗୁଡ଼ିକର ଚିହ୍ନଟ ପ୍ରକ୍ରିୟା ତ୍ୱରାନ୍ୱିତ ହୋଇଛି ।
ମିଳିଥିବା ସୂଚନା ଅନୁସାରେ, ରାଜ୍ୟରେ ନଦୀରେ ବୁଡ଼ି ପ୍ରାଣ ହରାଉଥିବା ଘଟଣାକୁ ନେଇ ରାଜ୍ୟ ସ୍ୱତନ୍ତ୍ର ରିଲିଫ କମିଶନର ଉଦବେଗ ବ୍ୟକ୍ତ କରିବା ସହ ଅଧିକ ବୁଡ଼ି ଘଟଣା ହେଉଥିବା ନଦୀ ଘାଟଗୁଡ଼ିକର ଚାରିପାଶ୍ୱର୍ରେ ଷ୍ଟ୍ରକ୍ଚର ନିର୍ମାଣ କରିବାକୁ ନିଷ୍ପତ୍ତି ନେଇଛନ୍ତି । ଏସବୁ ସମ୍ବେଦନଶୀଳ ନଦୀଘାଟଗୁଡ଼ିକୁ ଚିହ୍ନଟ କରିବା ପାଇଁ ଏବେ ଜଳସମ୍ପଦ ବିଭାଗ ପଦକ୍ଷେପ ନେଇଛି । ସ୍ଥାନୀୟସ୍ତରରେ ଲୋକଙ୍କ ମତାମତ ନେଇ ସମ୍ପୃକ୍ତ ନଦୀ ଘାଟର ଜିଓଟ୍ୟାଗିଂ କରି ଫଟୋଚିତ୍ର ପଠାଇବାକୁ ଜଳସମ୍ପଦ ବିଭାଗ ପକ୍ଷରୁ ମହାନଦୀ-କାଠଯୋଡ଼ି ସିଷ୍ଟମ, ମହାନଦୀ, ବୈତରଣୀ ଓ ବ୍ରାହ୍ମଣୀ ବେସିନ୍ ମୁଖ୍ୟଯନ୍ତ୍ରୀ ତଥା ବେସିନ୍ ମ୍ୟାନେଜରମାନଙ୍କୁ ନିର୍ଦ୍ଦେଶ ଦିଆଯାଇଛି । ଏକ ନିର୍ଦ୍ଧାରିତ ଫର୍ମାଟରେ ତଥ୍ୟ ଦେବା ସହ ସମ୍ପୃକ୍ତ ନଦୀ ଘାଟର ଜିଓଟ୍ୟାଗିଂ ଫଟୋଚିତ୍ର ଦେବାକୁ କୁହାଯାଇଛି । ଫର୍ମାଟରେ ଡିଭିଜନ, ନଦୀର ନାଁ, ସ୍ଥାନର ନାଁ, ବ୍ଲକ୍ ଓ ଜିଲ୍ଲାର ନାଁ ସମେତ ନିର୍ବାଚନମଣ୍ଡଳୀ, ଅକ୍ଷାଂଶ-ଦ୍ରାଘିମା ଆଦି ଉଲ୍ଲେଖ କରିବାକୁ ନିର୍ଦ୍ଦେଶ ଦିଆଯାଇଛି ।
ସୂଚନାଯୋଗ୍ୟ, ୨୦୧୮-୧୯ରୁ ୨୦୨୨-୨୩ ମସିହା ମଧ୍ୟରେ ରାଜ୍ୟରେ ମୋଟ ୭୮୭୪ଜଣ ପାଣିରେ ବୁଡ଼ି ପ୍ରାଣ ହରାଇଛନ୍ତି ।