ଲୋକଙ୍କୁ ଗୋଡ଼ାଇ ଗୋଡ଼ାଇ କାମୁଡ଼ୁଛି ପାଗଳା ମାଙ୍କଡ଼ । ମାଙ୍କଡ଼ ଆତଙ୍କରେ ୧୨ରୁ ଊର୍ଦ୍ଧ୍ୱ ଗୁରୁତର ହୋଇଥିବା ବେଳେ ଆତଙ୍କିତ ଅବସ୍ଥାରେ ଅଛନ୍ତି ଗ୍ରାମବାସୀ । ଭଦ୍ରକ ଜିଲ୍ଲା ଚରମ୍ପା ବରାଳପୋଖରୀ ଗାଁରେ ଏକ ମାଙ୍କଡ଼ ପାଗଳ ହୋଇ ଲୋକଙ୍କୁ ଗୋଡ଼ାଇ ଗୋଡ଼ାଇ କାମୁଡୁଥିବାର ଦେଖିବାକୁ ମିଳିଛି ।
ଗୁରୁତର ୧୨ ଜଣଙ୍କ ମଧ୍ୟରୁ ୧୧ ଜଣ ଭଦ୍ରକ ମେଡିକାଲରେ ଚିକିତ୍ସିତ ହୋଇ ଫେରିଥିବା ବେଳେ ଜଣେ କଟକ ବଡ଼ ମେଡିକାଲକୁ ସ୍ଥାନାନ୍ତରିତ ହୋଇଛନ୍ତି।
ସ୍ଥାନୀୟ ଅଞ୍ଚଳରେ ଏହି ମାଙ୍କଡ଼ ଆତଙ୍କରେ ଲୋକେ ଭୟଭୀତ ହୋଇ ଘରୁ ବାହାରକୁ ବାହାରୁ ନାହାନ୍ତି । ଯିଏ ବାହାରକୁ ବାହାରୁଛନ୍ତି ମାଙ୍କଡ଼ ଆକ୍ରମଣର ଶିକାର ହେଉଛନ୍ତି । ଭୟରେ ଗ୍ରାମବାସୀ ହାତରେ ବାଡି ଧରି ଵାହାରୁଛନ୍ତି।
Also Read
ଖବର ପାଇ ବନ ବିଭାଗର ଗୋଟିଏ ଟିମ୍ ପହଞ୍ଚି ମାଙ୍କଡଟିକୁ କାବୁ କରିବାକୁ ଚେଷ୍ଟା କରିଥିଲା । ହେଲେ ସେଥିରେ ବିଫଳ ହୋଇଥିଲା । ପରେ ବନବିଭାଗର ଆଉ ଏକ ଟିମ୍କୁ ଡକାଯାଇଥିଲା । ହେଲେ ଧରା ଦେଉନି ମାଙ୍କଡ଼ ।
ବନ ବିଭାଗର ଟିମ୍ ୩ ଦିନ ଧରି ଗାଁରେ ଡେରା ପକାଇଥିବା ବେଳେ ବନ ବିଭାଗର ଅଧିକାରୀମାନେ ମଧ୍ୟ ଜଗି ରହିଛନ୍ତି। ବନ ବିଭାଗ ପକ୍ଷରୁ ଗାଁରେ ଜନ୍ତା ବିଛାଯାଇଛି, ହେଲେ ତା’ ମଧ୍ୟରେ ମାଙ୍କଡ଼ ଧରା ଦେଉ ନାହିଁ । ତେବେ ପାଗଳ ମାଙ୍କଡଟିକୁ ବନ ବିଭାଗ କେବେ କାବୁ କରୁଛି ତାହା ଉପରେ ସମସ୍ତଙ୍କ ନଜର । ୩ ଦିନ ହେଲାଣି ମାଙ୍କଡିଟି ଜନ୍ତାରେ ପଡ଼ୁ ନ ଥିବାରୁ ଆଜି ଟ୍ରାଙ୍କୁଲାଇଜ କରିବାକୁ ଭୁବନେଶ୍ୱରରୁ ଏକ ଟିମ୍ ଆସୁଥିବା ଜଣାଯାଇଛି।
ଅନ୍ୟ ପକ୍ଷରେ ମାଙ୍କଡ ଭୟରେ ଗାଁରେ ଲୋକେ ଆଉ ଘରୁ ଵାହାରିବାକୁ ସୁରକ୍ଷିତ ମଣୁ ନାହାନ୍ତି। ଯିଏ ବାହାରକୁ ବାହାରୁଛନ୍ତି ହାତରେ ବାଡ଼ି ଧରି ବାହାରୁଛନ୍ତି।
(ରିପୋର୍ଟ- ଭଦ୍ରକରୁ ପାର୍ଥସାରଥୀ ନାୟକ)
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
