ଜନବସତିରେ ଉତ୍ପାତ କରୁଥିବା ହାତୀକୁ ଘଉଡ଼ାଇବା ବେଳେ ଘଟିଛି ଅଘଟଣ। ହାତୀଟି ଜଙ୍ଗଲକୁ ଯିବା ପରିବର୍ତ୍ତେ ପାଲଟା ଆକ୍ରମଣ କରିଛି। ତା’କୁ ଘଉଡ଼ାଇବାକୁ ଚେଷ୍ଟା କରୁଥିବା ଦୁଇ ଜଣ ବନ କର୍ମଚାରୀଙ୍କୁ ହାତୀଟି ଟେକି କଚାଡ଼ି ଦେଇଛି। ଏଥିରେ ୨ ଜଣ ଯାକ ବନ କର୍ମଚାରୀ ଗୁରୁତର ହୋଇଛନ୍ତି। ଏଭଳି ଘଟଣା ସୁନ୍ଦରଗଡ ଜିଲ୍ଲା ବଣାଇ ବନଖଣ୍ଡର କୁଳିପୋଷ ରେଞ୍ଜର ହଳଦୀକାଞ୍ଚି ଗାଁରେ।
କୁଳିପୋଷ ରେଞ୍ଜର ବିଭିନ୍ନ ଗ୍ରାମରେ ତିନି ଟିକିଆ ହାତୀ ପଲ ବେଶ କିଛି ଦିନ ଉପଦ୍ରବ ଜାରି ରଖିଥିଲେ। ଏହାକୁ ନେଇ ଗାଁ ଲୋକ ଭୟରେ ଥିବା ବେଳେ ସହାୟତା ପାଇଁ ବନ ବିଭାଗକୁ କହିଥିଲେ। ଏହି ଖବର ମିଳିବା ପରେ ବନ ବିଭାଗର କର୍ମଚାରୀ ଓ ଗଜ ସାଥୀ ମିଳିତ ଭାବେ ହଳଦୀକାଞ୍ଚି ଗାଁରେ ହାତୀକୁ ଘଉଡ଼ାଇବା ପାଇଁ ପହଞ୍ଚି ଯାଇଥିଲେ। ସେମାନେ ହାତୀ ଘଉଡ଼ାଇବାକୁ ଚେଷ୍ଟା କରୁଥିବା ବେଳେ ହାତୀର ପାଲଟା ଆକ୍ରମଣ ଦେଖିବାକୁ ମିଳିଥିଲା।
Also Read
ଗୋଟିଏ ହାତୀ ସିଧା ଗଜ ସାଥୀ ସନ୍ତୋଷ ମୁଣ୍ଡା ଓ ବନରଖି ସନ୍ତୋଷ ମୁଣ୍ଡାଙ୍କୁ ଟେକି କଚାଡ଼ି ଦେଇଥିଲା। ତେବେ ସେମାନଙ୍କ ଉପରେ ଚଢ଼ି ନଥିଲା। ଉଭୟଙ୍କୁ ଗାଁ ଲୋକ ଓ ବନ ବିଭାଗର ଅନ୍ୟ କର୍ମଚାରୀମାନେ ଗୁରୁତର ଅବସ୍ଥାରେ ହାତୀ କବଳରୁ ଉଦ୍ଧାର କରିଥିଲେ।
ସେମାନଙ୍କୁ ତୁରନ୍ତ ବଣାଇ ଉପଖଣ୍ଡ ଚିକିତ୍ସାଳୟକୁ ଅଣା ଯାଇଥିଲା। ସେଠାରେ ଉଭୟଙ୍କ ପ୍ରାଥମିକ ଚିକିତ୍ସା କରାଯାଇଥିଲା। କିନ୍ତୁ ଗଜ ସାଥୀ ସନ୍ତୋଷ ମୁଣ୍ଡାଙ୍କ ଅବସ୍ଥା ସଙ୍କଟାପନ୍ନ ଥିବାରୁ ତାଙ୍କୁ ରାଉରକେଲା ସ୍ଥାନାନ୍ତରିତ କରାଯାଇଛି। ସେଠାରେ ତାଙ୍କର ଅଧିକ ଚିକିତ୍ସା ଆରମ୍ଭ କରାଯାଇଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
