କ୍ୟାବିନେଟ୍ ନିଷ୍ପତ୍ତି: ଶୀତଳଭଣ୍ଡାର ପାଇଁ ୬୦% ସବସିଡି, ଗ୍ରୀଡ଼କୋକୁ ୩୧୦୮କୋଟି ଟଙ୍କାର ବ୍ୟାଙ୍କ ଗ୍ୟାରେଣ୍ଟି

ରାଜ୍ୟରେ ଶୀତଳଭଣ୍ଡାର ନିର୍ମାଣକୁ ପ୍ରୋତ୍ସାହିତ କରିବା ନିମନ୍ତେ ‘ଶୀତଳ ଭଣ୍ଡାର ପାଇଁ  ଆର୍ଥିକ ସହାୟତା’ ଯୋଜନାକୁ ମଙ୍ଗଳବାର ରାଜ୍ୟ କ୍ୟାବିନେଟ୍ ଅନୁମୋଦନ କରିଛନ୍ତି । ଏହାସହିତ ଶକ୍ତି ବିଭାଗ ଦ୍ୱାରା ଗ୍ରୀଡକୋକୁ ଦିଆଯାଇଥିବା ୩୧୦୮.୨୧କୋଟି ଟଙ୍କାର ବ୍ୟାଙ୍କ ଗ୍ୟାରେଣ୍ଟିକୁ ମଧ୍ୟ ପିଛିଲା ଭାବେ କ୍ୟାବିନେଟ୍ ମଞ୍ଜୁରୀ ମିଳିଛି । ଏହି ପ୍ରସ୍ତାବଗୁଡ଼ିକ ସମେତ ମୋଟ ୧୦ଟି ପ୍ରସ୍ତାବକୁ କ୍ୟାବିନେଟ୍ ଅନୁମୋଦନ ମିଳିଛି ।

ମୁଖ୍ୟମନ୍ତ୍ରୀ ମୋହନ ମାଝୀଙ୍କ ଅଧ୍ୟକ୍ଷତାରେ ଲୋକସେବା ଭବନରେ ଅନୁଷ୍ଠିତ କ୍ୟାବିନେଟ୍ ବୈଠକରେ ‘ଶୀତଳ ଭଣ୍ଡାର ପାଇଁ ଆର୍ଥିକ ସହାୟତା’ ଯୋଜନାକୁ ଅନୁମୋଦନ ମିଳିଛି । ରାଜ୍ୟର ୫୮ଟି ସବଡିଭିଜନରେ ଅତିକମରେ ଗୋଟିଏ ଶୀତଳଭଣ୍ଡାର ନିର୍ମାଣ ଲକ୍ଷ୍ୟରେ ରାଜ୍ୟ ସରକାର ଏହି ଆର୍ଥିକ ସହାୟତା ଦେବେ । ଅନୁସୂଚିତ ଜାତି,ଜନଜାତି,କିନ୍ନର,ମହିଳା ହିତାଧିକାରୀଙ୍କ ପାଇଁ ସ୍ଥାୟୀ ପୁଞ୍ଜି ବ୍ୟୟର ୬୦% ଓ ସର୍ବାଧିକ ସାଢ଼େ ୬କୋଟି ଟଙ୍କା ମଧ୍ୟରେ ସୀମିତ ଯାହା କମ୍ ହେବ । ସାଧାରଣ ହିତାଧିକାରୀଙ୍କ ପାଇଁ ଏହି ପୁଞ୍ଜିନିବେଶ ସବସିଡି ସର୍ବାଧିକ ୫୦% ଓ ୬କୋଟି ଟଙ୍କା ମଧ୍ୟରେ ସୀମିତ,ଯାହା କମ୍ ହେବ । ସେହିପରି ୬% ପର୍ଯ୍ୟନ୍ତ ସୁଧ ରିହାତି ମିଳିବ ଯେଉଁଥିରେ ଭାରତ ସରକାରଙ୍କ ୩% ଓ ରାଜ୍ୟର ୩% ସବସିଡି ସାମିଲ ଅଛି । ରାଜ୍ୟ ସରକାର ୪ଟି ସ୍ଲାବରେ ଏହି ଆର୍ଥିକ ସହାୟତା ଯୋଗାଇ ଦେବେ । ୭ବର୍ଷ ପର୍ଯ୍ୟନ୍ତ ବିଦ୍ୟୁତ ଶୁଳ୍କରେ ୫୦% ସବସିଡି ସରକାର ଯୋଗାଇ ଦେବେ । ଅଣକାର୍ଯ୍ୟକ୍ଷମ ଶୀତଳ ଭଣ୍ଡାରକୁ ପୁନଃ କାର୍ଯ୍ୟକ୍ଷମ କରିବା ପାଇଁ ସରକାର ଯାଂଚ କରି ଚୟନ କରିବେ । ସେହି କ୍ଷେତ୍ରରେ ଆର୍ଥିକ ସହାୟତା ରାଜ୍ୟ ସରକାର ଯୋଗାଇ ଦେବେ । ଏହି ଯୋଜନାକୁ ୨୦୨୫-୨୬ରୁ ୨୦୨୯-୩୦ ପର୍ଯ୍ୟନ୍ତ ୫ବର୍ଷ ପାଇଁ ମୂଲ୍ୟାଙ୍କନ କରାଯାଇଛି ଓ ଏବାବଦରେ ୨୫୨କୋଟି ଟଙ୍କା ବରାଦ ହୋଇଥିବା ପ୍ରେସ୍ ବିଜ୍ଞପ୍ତିରେ ଉଲ୍ଲେଖ ରହିଛି ।

ବ୍ୟାଙ୍କ ଓ ଆର୍ଥିକ ପ୍ରତିଷ୍ଠାନରୁ ସ୍ୱାପିଂ ଆଧାରରେ ଗ୍ରୀଡକୋକୁ ମିଳିଥିବା ୩୧୦୮.୨୧କୋଟି ଟଙ୍କାର ଦୀର୍ଘ ଅବଧି ଋଣ ପାଇଁ ଶକ୍ତି ବିଭାଗ ଦେଇଥିବା ସରକାରୀ ଗ୍ୟାରେଣ୍ଟିକୁ କ୍ୟାବିନେଟ୍ ମଞ୍ଜୁରୀ ଦେଇଛନ୍ତି । ଏହାଦ୍ୱାରା ଗ୍ରୀଡକୋର ସୁଧହାର ହ୍ରାସ ପାଇବ ଓ ଉପଭୋକ୍ତାଙ୍କ ଉପରେ ବୋଝ କମିବ ବୋଲି ସରକାରଙ୍କ ପକ୍ଷରୁ କୁହାଯାଇଛି ।

ଷୋଡ଼ଶ ଅର୍ଥ କମିଶନ ଆସନ୍ତା ଫେବୃୟାରୀ ୫ରୁ ୭ତାରିଖରେ ଓଡ଼ିଶା ଆସିବେ । ରାଜ୍ୟର ୫ବର୍ଷର ଯୋଜନା ନେଇ ତାଙ୍କ ପାଖରେ ଦାବି ଉପସ୍ଥାପନ କରାଯିବ । ୧୨ଲକ୍ଷ ୫୬ହଜାର ୧୪୮କୋଟି ଟଙ୍କାର ଦାବି ଷୋଡ଼ଶ ଅର୍ଥ କମିଶନଙ୍କ ନିକଟରେ ରଖିବା ପାଇଁ ପ୍ରସ୍ତୁତ ବିଭିନ୍ନ ପ୍ରସ୍ତାବ ସମ୍ବଳିତ ମେମୋରାଣ୍ଡମକୁ ଆଜି କ୍ୟାବିନେଟ୍ ଅନୁମୋଦନ କରିଛନ୍ତି ।

ଓଡ଼ିଶା ଡାକ୍ତରୀ ଓ ସ୍ୱାସ୍ଥ୍ୟ ସେବା କ୍ୟାଡ଼ରରେ ମେଡିକାଲ ଅଫିସର ନିଯୁକ୍ତି,ପଦୋନ୍ନତି ଓ ସେବା ସର୍ତ୍ତାବଳୀକୁ ନିୟନ୍ତ୍ରଣ ପାଇଁ ଓଡ଼ିଶା ଡାକ୍ତରୀ ଓ ସ୍ୱାସ୍ଥ୍ୟସେବା ନିୟମାବଳୀ-୨୦୧୭ର ସଂଶୋଧନ ପ୍ରସ୍ତାବକୁ କ୍ୟାବିନେଟ୍ ମୋହନ ବାଜିଛି । ଏହି ସଂଶୋଧନ ଆଧାରରେ କନିଷ୍ଠ-କ ବର୍ଗ ପାହ୍ୟା ପଦବୀ ପାଇଁ ଆବେଦନ କରିବାବେଳେ ଜଣେ ପ୍ରାର୍ଥୀ ଓଡ଼ିଶା ଡାକ୍ତରୀ ପଞ୍ଜିକରଣ ଆଇନ-୧୯୬୧ ଅନୁସାରେ ଏକ ବୈଧ ପଞ୍ଜିକରଣ ପ୍ରମାପତ୍ର ହାସଲ କରିବା ଜରୁରୀ । ଏହି ନିୟମର ସଂଶୋଧନ ପରେ କନିଷ୍ଠ-କ ବର୍ଗ ପାହ୍ୟାରେ ୫ହଜାରରୁ ଅଧିକ ଡାକ୍ତରଙ୍କ ଚୟନ ପାଇଁ ଓଡ଼ିଶା ଲୋକସେବା ଆୟୋଗଙ୍କୁ ଅନୁରୋଧ କରାଯିବ । ଓଡ଼ିଶା ଡାକ୍ତରୀ ଓ ସ୍ୱାସ୍ଥ୍ୟସେବା କ୍ୟାଡ଼ରରେ ଥିବା ବରିଷ୍ଠ ପ୍ରଶାସନିକ ପଦବୀ ସଂଖ୍ୟା ୨ରୁ ୧୪କୁ ବୃଦ୍ଧି, ଏସଏଜିରେ ପାହ୍ୟାରେ ପଦବୀ ସଂଖ୍ୟା ୧୨ରୁ ୪୫କୁ ବୃଦ୍ଧି ପାଇଁ ନିଷ୍ପତ୍ତି ହୋଇଛି ।

ଓଡ଼ିଶା ଡାକ୍ତରୀ ସେବା(ଦନ୍ତ ଚିକିତ୍ସକ ଚୟନ ପ୍ରକ୍ରିୟା ଓ ସେବା ସର୍ତ୍ତ) ନିୟମାବଳୀ-୨୦୨୨ରେ ସଂଶୋଧନକୁ କ୍ୟାବିନେଟ୍ ଅନୁମୋଦନ କରିଛନ୍ତି । ଏହି ସଂଶୋଧନ ପରେ ୧୦୦ରୁ ଅଧିକ ଦନ୍ତ ଚିକିତ୍ସକ ପଦବୀ ନିମନ୍ତେ ଓଡ଼ିଶା ଲୋକସେବା ଆୟୋଗଙ୍କୁ ଚୟନ ପ୍ରକ୍ରିୟା ପାଇଁ ଅନୁରୋଧ କରାଯିବ।