ବାର୍ଦ୍ଧକ୍ୟ ଭତ୍ତା ପାଇଁ ବୟସ ଜାଲିଆତି: ଭୋଟର କାର୍ଡ ଯାଂଚ ପାଇଁ ସବୁ ଜିଲ୍ଲାପାଳଙ୍କୁ ନିର୍ଦ୍ଦେଶ

ରାଜ୍ୟର ବିଜେପି ସରକାର ନିଜର ନିର୍ବାଚନୀ ପ୍ରତିଶ୍ରୁତି ମୁତାବକ ୮୦ବର୍ଷ ବୟସରୁ ଊର୍ଦ୍ଧ୍ୱ ବୃଦ୍ଧବୃଦ୍ଧାଙ୍କୁ ମାସିକ ୩୫୦୦ଟଙ୍କା ଭତ୍ତା ପ୍ରଦାନ କରିବାର ୩ମାସ ନପୁରୁଣୁ ଅଚାନକ ଏହି ସଂଖ୍ୟାରେ ଅହେତୁକ ବୃଦ୍ଧି ପାଇଛି ।  ଏହି ଆବେଦନକାରୀଙ୍କ ସଂଖ୍ୟା ବୃଦ୍ଧିକୁ ଦୃଷ୍ଟିରେ ରଖି ସରକାର ସମସ୍ତ  ଆବେଦନକାରୀ ବୃଦ୍ଧବୃଦ୍ଧାଙ୍କ ବୟସକୁ ଯାଂଚ ନିମନ୍ତେ ଜିଲ୍ଲାପାଳମାନଙ୍କୁ ନିର୍ଦ୍ଦେଶ ଦେଇଛନ୍ତି । ଏହାକୁ ଅତ୍ୟନ୍ତ ଜରୁରୀ ଭାବେ ବିବେଚନା କରି ପଦକ୍ଷେପ ନେବାକୁ ରାଜ୍ୟ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତିକରଣ ସଚିବ ଆର ଏସ୍ ଗୋପାଳନ ସମସ୍ତ ଜିଲ୍ଲାପାଳମାନଙ୍କୁ ସେପ୍ଟେମ୍ବର ୩ତାରିଖରେ ଚିଠି ଲେଖି ଅବଗତ କରାଇଛନ୍ତି ।

କାହିଁକି ହେବ ଆବେଦନକାରୀଙ୍କ ଭୋଟର କାର୍ଡ ଯାଂଚ

୮୦ବର୍ଷ ବୟସରୁ ଊର୍ଦ୍ଧ୍ୱ ବର୍ଗରେ ମାସିକ ଭତ୍ତା ପାଇବା ନିମନ୍ତେ ଏବେ ଆବେଦନକାରୀଙ୍କ ସଂଖ୍ୟା ଅଚାନକ ବୃଦ୍ଧି ପାଇବା ରାଜ୍ୟ ସରକାରଙ୍କୁ ଚିନ୍ତାରେ ପକାଇଛି । ଅଯୋଗ୍ୟ ହିତାଧିକାରୀମାନେ ନିଜର ଭୋଟର କାର୍ଡରେ ବୟସ ଜାଲିଆତି କରି ମାସିକ ଭତ୍ତା ପାଇଁ ଆବେଦନ କରୁଥିବା ସରକାର ସନ୍ଦେହ କରିଛନ୍ତି । ସେଥିପାଇଁ ଜିଲ୍ଲାପାଳମାନଙ୍କୁ ତୁରନ୍ତ ଏହାର ଯାଂଚ ପାଇଁ ନିର୍ଦ୍ଦେଶ ଦେଇଛନ୍ତି ।

ସମସ୍ତ ଆବେଦନକାରୀଙ୍କ ଭୋଟର ଆଇଡି(ଇପିଆଇସି) ଯାଂଚ କରିବାକୁ କୁହାଯାଇଛି । ୮୦ବର୍ଷ ବୟସରୁ ଊର୍ଦ୍ଧ୍ୱ ବର୍ଗରେ ଭତ୍ତା ପାଇବା ନିମନ୍ତେ ଅନେକ ନୂଆ ଆବେଦନକାରୀ ନିଜର ଭୋଟର ଆଇଡି କାର୍ଡରେ ଜନ୍ମ ତାରିଖ ପରିବର୍ତ୍ତନ କରୁଥିବା ସରକାର ସନ୍ଦେହ କରିଛନ୍ତି । ସେଥିପାଇଁ  ସେମାନଙ୍କର ପୁରୁଣା ଭୋଟର କାର୍ଡକୁ ଯାଂଚ କରି ବୟସର ସତ୍ୟାସତ୍ୟ ପରଖିବାକୁ କୁହାଯାଇଛି । ଆବେଦନକାରୀଙ୍କ ଜନ୍ମ ତାରିଖରେ କୌଣସି ପରିବର୍ତ୍ତନ ହୋଇଛି କି ନାହିଁ ତାହା ସୁନିଶ୍ଚିତ କରିବାକୁ ଜିଲ୍ଲାପାଳମାନଙ୍କୁ କୁହାଯାଇଛି । ଭତ୍ତା ପ୍ରଦାନରେ ସ୍ୱଚ୍ଛତା ଓ ପାରଦର୍ଶିତା ଆଣିବା ନିମନ୍ତେ ରାଜ୍ୟ ସରକାର ଏଭଳି ପଦକ୍ଷେପ ନେଇଥିବା କୁହାଯାଉଛି ।

ଜୁନରୁ ୮୦ବର୍ଷ ବୟସ୍କଙ୍କୁ ମିଳୁଛି ମାସିକ ୩୫୦୦ଟଙ୍କା ଭତ୍ତା

ବିଜେପି ସରକାର ନିଜର ପ୍ରତିଶ୍ରୁତି ରକ୍ଷା କରି ୮୦ବର୍ଷ ବୟସରୁ ଅଧିକ ଯୋଗ୍ୟ ବୃଦ୍ଧବୃଦ୍ଧା ଏବଂ ୮୦ ପ୍ରତିଶତରୁ ଅଧିକ ଭିନ୍ନକ୍ଷମଙ୍କୁ ମାସିକ ୩୫୦୦ଟଙ୍କା ଯୋଗାଇ ଦେଉଛନ୍ତି । ସରକାର ଯଦିଓ ଜୁନ୍ ମାସରୁ ଏହି ବର୍ଦ୍ଧିତ ଭତ୍ତା ନିୟମିତ ଦେଉଛନ୍ତି ମାତ୍ର ତାହା ପିଛିଲା ଭାବେ ଚଳିତବର୍ଷ ଜାନୁୟାରୀରୁ ଲାଗୁ ହୋଇଛି । ରାଜ୍ୟ ସରକାର ଏବେ ୮୦ବର୍ଷ ବୟସ ବା ତଦୁର୍ଦ୍ଧ୍ୱ ବୟସର ପ୍ରାୟ ୨.୧୧ଲକ୍ଷ ବୃଦ୍ଧବୃଦ୍ଧାଙ୍କୁ ମଧୁବାବୁ ପେନସନ୍ ଯୋଜନା(ନିଜସ୍ୱ) ଏବଂ ୧.୫୬ଲକ୍ଷ ବୃଦ୍ଧବୃଦ୍ଧାଙ୍କୁ ଜାତୀୟ ସାମାଜିକ ସୁରକ୍ଷା ଯୋଜନାରେ ମାସିକ ୩୫୦୦ଟଙ୍କା ଭତ୍ତା ପ୍ରଦାନ କରୁଛନ୍ତି ।

ରାଜ୍ୟରେ ବିଜେପି ସରକାର କ୍ଷମତାକୁ ଆସିବା ପରଠୁ ବିଗତ ୧୪ମାସ ମଧ୍ୟରେ ବିଭିନ୍ନ ବର୍ଗ ଓ ବୟସର ପ୍ରାୟ ୧.୪୦ଲକ୍ଷ ନୂଆ ହିତାଧିକାରୀଙ୍କୁ ମଧ୍ୟ ମାସିକ ଭତ୍ତା ପ୍ରଦାନ କରାଯାଉଛି । ସରକାର ଏବେ ଉଭୟ ମଧୁବାବୁ ଓ ଜାତୀୟ ସୁରକ୍ଷା ଯୋଜନାରେ ମାସିକ ପେନସନ ବା ଭତ୍ତା ପରିମାଣକୁ ସର୍ବନିମ୍ନ ୧ହଜାର ଟଙ୍କା କରିଦେଇଛନ୍ତି ।

ଅପେକ୍ଷାରେ ଅଛନ୍ତି ଅନ୍ୟ ଯୋଗ୍ୟ ହିତାଧିକାରୀ

ବିଜେପି ସରକାର ନିଜର ପ୍ରତିଶ୍ରୁତି ମୁତାବକ ୮୦ବର୍ଷ ବୟସରୁ ଉର୍ଦ୍ଧ୍ୱ ବୃଦ୍ଧବୃଦ୍ଧାଙ୍କୁ ମାସିକ ୩୫୦୦ଟଙ୍କା ଭତ୍ତା ଦେଇଥିବାବେଳେ ୬୦ବର୍ଷ ବୟସରୁ ଊର୍ଦ୍ଧ୍ୱ ହିତାଧିକାରୀମାନେ ନିଜର ବର୍ଦ୍ଧିତ ଭତ୍ତା ପାଇଁ ଅପେକ୍ଷାରତ ଅଛନ୍ତି । ବିଜେପି ଏହି ବର୍ଗର ହିତାଧିକାରୀଙ୍କୁ ମାସିକ ୩ହଜାର ଟଙ୍କା ଭତ୍ତା ଦେବ ବୋଲି ପ୍ରତିଶ୍ରୁତି ଦେଇଥିଲା । ତେବେ ସେମାନଙ୍କୁ ବର୍ଦ୍ଧିତ ଭତ୍ତା କେବେ ମିଳିତ ତାହା ଜଣାପଡ଼ିନଥିଲେ ମଧ୍ୟ ରାଜ୍ୟ ସରକାର ପଂଚାୟତ ନିର୍ବାଚନ ପୂର୍ବରୁ ଏହା ଲାଗୁ କରିବେ ବୋଲି ଜଣାପଡ଼ିଛି ।

ସୂଚନାଯୋଗ୍ୟ, ଏବେ ରାଜ୍ୟର ମୋଟ ୫୬ଲକ୍ଷ ୭୬ହଜାର ୯୧୬ଜଣ ହିତାଧିକାରୀ ବିଭିନ୍ନ ସାମାଜିକ ସୁରକ୍ଷା ଯୋଜନାରେ ମାସିକ ଭତ୍ତା ପାଉଛନ୍ତି ।