OR 
ରାଜଧାନୀ ଭୁବନେଶ୍ୱରର ଭରତପୁର ଥାନା ହାଜତରେ ପୁଲିସ ନିର୍ଯାତନା ଦେବା ଘଟଣାର ପ୍ରାୟ ଦୁଇମାସ ପରେ ଭାରତୀୟ ସେନା ପକ୍ଷରୁ ନିଜ ଯବାନ,ଅଫିସର ଓ ଅବସରପ୍ରାପ୍ତ ସେନାକର୍ମୀଙ୍କ ସହାୟତା ପାଇଁ ଏକ ୨୪ଘଂଟିଆ ହେଲପଲାଇନ୍ ନମ୍ବର ଜାରି କରାଯାଇଛି । ଏହି ହେଲପଲାଇନ ନମ୍ବର ହେଉଛି-୧୫୫୩୦୬ ଯାହାକୁ କେବଳ ଅତି ଜରୁରୀ ପରିସ୍ଥିତିରେ ଓ ନିର୍ଯାତନା ଘଟଣାରେ ଉପଯୋଗ କରିବା ପାଇଁ ପରାମର୍ଶ ଦିଆଯାଇଥିବା ଜାତୀୟ ଗଣମାଧ୍ୟମର ରିପୋର୍ଟରୁ ଜଣାପଡ଼ିଛି ।
ଜାତୀୟ ଗଣମାଧ୍ୟମ ସଂସ୍ଥା ‘ଇଣ୍ଡିଆଟୁଡେ’ରେ ପ୍ରକାଶିତ ରିପୋର୍ଟ ଅନୁସାରେ ଭାରତୀୟ ସେନା ପକ୍ଷରୁ ୨୪ଘଣ୍ଟିଆ ଏକ ହେଲପଲାଇନ୍ ନମ୍ବର ଜାରି ହୋଇଛି। ଯାହାକୁ ସେନାର ଯବାନ,ଅଫିସର ଓ ଅବସରପ୍ରାପ୍ତ ସେନାକର୍ମୀ ଜରୁରୀକାଳୀନ ସ୍ଥିତିରେ ସହାୟତା ପାଇବା ପାଇଁ ଉପଯୋଗ କରିପାରିବେ। ତେବେ ଜମି ବିବାଦ କିମ୍ବା ଦାମ୍ପତ୍ୟ କଳହ ଭଳି ଘଟଣାରେ ଏହି ହେଲପଲାଇନ୍ ନମ୍ବରକୁ ସହାୟତା ନମାଗିବାକୁ କୁହାଯାଇଛି । ଏହି ହେଲପଲାଇନକୁ କଲ କଲେ ତାହା ସ୍ୱତଃ ରେକର୍ଡ ହୋଇଯିବ । ପ୍ରତ୍ୟେକ ମାମଲାର ପ୍ରଭାବଶାଳୀ ଢଙ୍ଗରେ ଫଲୋଅପ୍ କରାଯିବ । ଦେଶବ୍ୟାପୀ ସେନା ଓ ସିଭିଲ କର୍ତ୍ତୃପକ୍ଷଙ୍କ ମଧ୍ୟରେ ସମନ୍ୱୟ ରଖି ଏଭଳି ମାମଲା ଉପରେ ନଜର ରଖାଯିବ । ଏହି ହେଲପଲାଇନକୁ ସେନାର ପ୍ରଶିକ୍ଷିତ ମିଲିଟାରୀ ପୁଲିସ ଅଫିସରମାନେ ପରିଚାଳନା କରିବେ। ସେନାର କର୍ମୀମାନଙ୍କ ଉପରେ ନିର୍ଯାତନା ଘଟଣା ବଢ଼ୁଥିବାକୁ ଦୃଷ୍ଟିରେ ରଖି ଏହି ସହାୟତା ଓ ସୁରକ୍ଷା ଯୋଗାଇ ଦେବାକୁ ପ୍ରୟାସ ହୋଇଥିବା କୁହାଯାଉଛି ।
Also Read
ଭୁବନେଶ୍ୱରର ଭରତପୁର ଥାନାରେ ସେପ୍ଟେମ୍ବର ୧୪-୧୫ ତାରିଖ ରାତିରେ ଜଣେ ସେନା ଅଫିସର ଓ ତାଙ୍କ ବାନ୍ଧବୀଙ୍କୁ ପୁଲିସ ଅମାନବୀୟ ନିର୍ଯାତନା ଦେଇଥିବା ନେଇ ଅଭିଯୋଗ ହୋଇଥିଲା । ଏହି ଘଟଣା ସେତେବେଳେ ଚାଂଚଲ୍ୟ ସୃଷ୍ଟି କରିବା ସହ ଉଭୟ ରାଜ୍ୟ ଓ ରାଜ୍ୟ ପୁଲିସକୁ ଅପ୍ରୀତିକର ପରିସ୍ଥିତିର ସମ୍ମୁଖୀନ କରାଇଥିଲା । ଏହି ଘଟଣାର କ୍ରାଇମବ୍ରାଂଚ ତଦନ୍ତ ସହ ଥାନାର ୫ଜଣ ଅଫିସରଙ୍କୁ ପୁଲିସ ଡିଜି ୱାଇବି ଖୁରାନିଆ ନିଲମ୍ବନ କରିଥିଲେ । ପରେ ରାଜ୍ୟ ସରକାର ଏହି ଘଟଣାର ବିଚାରବିଭାଗୀୟ ତଦନ୍ତ ନିର୍ଦ୍ଦେଶ ଦେଇଛନ୍ତି ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
