ଆଦିବାସୀଙ୍କ ଜମି ଶିଳ୍ପପତିଙ୍କ ହାତରେ ଟେକି ଦେବାକୁ ସରକାରୀ ଷଡ଼ଯନ୍ତ୍ର ଚାଲିଛି । ନିରିହ ଆଦିବାସୀଙ୍କୁ ଲୁଟିବାକୁ ରାଜ୍ୟ ସରକାର ଏଭଳି ନିଷ୍ପତ୍ତି ନେଇଛନ୍ତି । ଦୁଇ ପ୍ରମୁଖ ବିରୋଧୀ ଦଳ କଂଗ୍ରେସ ଓ ବିଜେପି ଆଜି ଏଭଳି ଢଙ୍ଗରେ ରାଜ୍ୟ ସରକାରଙ୍କୁ କଡ଼ା ସମାଲୋଚନା କରି କ୍ୟାବିନେଟ ନିଷ୍ପତ୍ତିର ପୁନର୍ବିଚାର ପାଇଁ ଦାବି କରିଛି ।
କଂଗ୍ରେସର ବରିଷ୍ଠ ବିଧାୟକ ତାରାପ୍ରସାଦ ବାହିନୀପତି ଗଣମାଧ୍ୟମକୁ ପ୍ରତିକ୍ରିୟା ଦେଇ କହିଛନ୍ତି ଯେ, ରାଜ୍ୟ କ୍ୟାବିନେଟ୍ ସିଡ୍ୟୁଲ ଏରିଆରେ ଆଦିବାସୀଙ୍କ ଜମିକୁ ବନ୍ଧକ ଓ ହସ୍ତାନ୍ତର ସଂକ୍ରାନ୍ତରେ ଯେଉଁ ନିଷ୍ପତ୍ତି ନେଇଛନ୍ତି ତାହା ନିରିହ ଆଦିବାସୀଙ୍କ ଜମିକୁ ଲୁଟ୍ ପାଇଁ ଷଡ଼ଯନ୍ତ୍ର । ସରକାର ଷଡ଼ଯନ୍ତ୍ର କରି ଶିଳ୍ପପତିଙ୍କ ହାତରେ ଆଦିବାସୀଙ୍କ ଜମିକୁ ଟେକିଦେବାର ବ୍ୟବସ୍ଥା କରିଛନ୍ତି । ବିଜେଡି ସରକାର ପୂର୍ବରୁ ଆଦିବାସୀଙ୍କ ଜମିକୁ ଅଣଆଦିବାସୀଙ୍କୁ ବିକ୍ରି ଉପରେ କଟକଣା ଜାରି କରିଥିଲେ । କଂଗ୍ରେସ ମଧ୍ୟ ଆଦିବାସୀମାନେ ଯେଭଳି ନିଜର ଜମିକୁ ଋଣ ପାଇଁ ବ୍ୟାଙ୍କରେ ବନ୍ଧକ ରଖିପାରିବେ ସେଥିପାଇଁ ପୂର୍ବରୁ ବାରମ୍ବାର ଦାବି କରିଆସୁଛି । ମାତ୍ର ଏବେ ରାଜ୍ୟ କ୍ୟାବିନେଟରେ ଆଦିବାସୀଙ୍କ ଜମି ହସ୍ତାନ୍ତରକୁ ନେଇ ଯେଉଁ ପ୍ରସ୍ତାବ ପାରିତ ହୋଇଛି ତାହା ଆଦିବାସୀଙ୍କ ଜମିକୁ ଲୁଟ ପାଇଁ ଷଡ଼ଯନ୍ତ୍ର ଭଳି ଲାଗୁଛି ବୋଲି ଶ୍ରୀ ବାହିନୀପତି କହିଛନ୍ତି ।
ସେହିପରି ବିଜେପି ମଧ୍ୟ ଏହି ପ୍ରସଙ୍ଗରେ ରାଜ୍ୟ ସରକାରଙ୍କୁ କଡ଼ା ସମାଲୋଚନା କରିଛି । ରାଜ୍ୟ ବିଜେପି ଅନୁସୂଚିତ ମୋର୍ଚ୍ଚା ସଭାପତି ନିତ୍ୟାନନ୍ଦ ଗଣ୍ଡ ଅଭିଯୋଗ କରିଛନ୍ତି ଯେ, ଆଦିବାସୀଙ୍କ ଭୋଟ୍ ହାତେଇବା ପାଇଁ ୨୦୧୭ ମସିହାରେ ରାଜ୍ୟ ସରକାର ସ୍ୱତନ୍ତ୍ର ଉନ୍ନୟନ ପରିଷଦ ଗଠନ କଲେ । କିନ୍ତୁ ଏପର୍ଯ୍ୟନ୍ତ ଆଦିବାସୀଙ୍କ ପାଇଁ କୌଣସି ଆଖିଦୃଶିଆ କାର୍ଯ୍ୟ କରିପାରିଲେ ନାହିଁ । ପ୍ରକୃତ ବିକାଶ ଚାହୁଁଥିଲେ ଆଦିବାସୀଙ୍କ ଶିକ୍ଷା ଓ ସ୍ୱାସ୍ଥ୍ୟ କ୍ଷେତ୍ର ଉପରେ ସରକାର ଗୁରୁତ୍ୱ ଦେବାର ଆବଶ୍ୟକତା ରହିଛି । ଆଦିବାସୀବହୁଳ ଜିଲ୍ଲାଗୁଡ଼ିକର ହସ୍ପିଟାଲରେ ଡାକ୍ତର କି ଶିକ୍ଷକ ନାହାନ୍ତି । ସରକାର ଏହି ମୌଳିକ ଦିଗ ପ୍ରତି ନଜର ଦେଉନାହାନ୍ତି । ଆଉ ଆଦିବାସୀଙ୍କ ପାଇଁ କୁମ୍ଭୀରକାନ୍ଦଣା କାନ୍ଦୁଛନ୍ତି ।
ସୂଚନାଯୋଗ୍ୟ, ସିଡ୍ୟୁଲ ଏରିଆରେ ରେଗୁଲେସନ-୨,୧୯୫୬ ଆଇନରେ ପ୍ରଚଳିତ ପ୍ରାବଧାନରେ କେତେକ ସଂଶୋଧନ ପ୍ରସ୍ତାବକୁ ରାଜ୍ୟ କ୍ୟାବିନେଟ୍ ଗତକାଲି ଅନୁମୋଦନ କରିଛନ୍ତି । ଫଳରେ ସିଡ୍ୟୁଲ ଏରିଆରେ ଅନୁସୂଚିତ ଜନଜାତି ବର୍ଗର ଲୋକଙ୍କ ଜମି ଏଣିକି ଅଣଆଦିବାସୀଙ୍କୁ ହସ୍ତାନ୍ତର ହୋଇପାରିବ । ଏପରିକି ଆବାସିକ ଗୃହନିର୍ମାଣ, ଉଚ୍ଚଶିକ୍ଷା,ଆତ୍ମନିଯୁକ୍ତି, ବ୍ୟବସାୟ ଓ କ୍ଷୁଦ୍ର ଶିଳ୍ପ ସ୍ଥାପନ ପାଇଁ ମଧ୍ୟ ଏହି ଜମିକୁ ବନ୍ଧକ ରଖିହେବ । ପୂର୍ବରୁ କେବଳ କୃଷି କାର୍ଯ୍ୟ ପାଇଁ ନିଜ ଜମିକୁ ବନ୍ଧକ ରଖିବାର ଅନୁମତି ଆଦିବାସୀଙ୍କୁ ଥିଲା । ଏବେ ଆଦିବାସୀବର୍ଗର ଲୋକେ ନିଜ ଜମିକୁ ସବୁ କାର୍ଯ୍ୟ ପାଇଁ ବ୍ୟାଙ୍କରେ ବନ୍ଧକ ରଖିପାରିବେ । ଆଉ ଉପଜିଲ୍ଲ୍ଲାପାଳ ଓ ଜିଲ୍ଲାପାଳଙ୍କ ଅନୁମତି ନେଇ ନିଜ ଜମିକୁ ଅଣଆଦିବାସୀଙ୍କୁ ହସ୍ତାନ୍ତର କରିପାରିବେ ବୋଲି ଗତକାଲି ରାଜ୍ୟ କ୍ୟାବିନେଟ୍ ନିଷ୍ପତ୍ତି ନେଇଛନ୍ତି ।