ସ୍ୱାସ୍ଥ୍ୟ କର୍ମଚାରୀଙ୍କ ‘ଆନ୍ଦୋଳନ’ ଉପରେ କଟକଣା: ଏସମା ଅବଧିକୁ ବଢ଼ାଇଲେ ସରକାର

ରାଜ୍ୟର ସ୍ୱାସ୍ଥ୍ୟ ବିଭାଗରେ କାର୍ଯ୍ୟରତ କର୍ମଚାରୀମାନଙ୍କ କାର୍ଯ୍ୟ ବନ୍ଦ ଆନ୍ଦୋଳନ ଉପରେ ଜାରି କଟକଣା ଅବଧିକୁ ରାଜ୍ୟ ସରକାର ଆଉ ୬ମାସ ବୃଦ୍ଧି କରିଛନ୍ତି । ରାଜ୍ୟର ବିଭିନ୍ନ ସରକାରୀ ହସ୍ପିଟାଲ, ପୁଲିସ ଓ ଜେଲ୍ ହସ୍ପିଟାଲ ଆଦି ସମେତ ସରକାରଙ୍କ ଦ୍ୱାରା ପରିଚାଳିତ ସ୍ୱାସ୍ଥ୍ୟ ପ୍ରତିଷ୍ଠାନରେ କାର୍ଯ୍ୟରତ ନର୍ସ, ପାରାମେଡିକାଲ ଷ୍ଟାଫ, ଟେକନିସିଆନ, ଅନ୍ୟ ତୃତୀୟ ଓ ଚତୁର୍ଥ ଶ୍ରେଣୀ କର୍ମଚାରୀ ଓ ଚୁକ୍ତିଭିତ୍ତିକ କର୍ମଚାରୀଙ୍କ କାର୍ଯ୍ୟବନ୍ଦ ଆନ୍ଦୋଳନ ଉପରେ କଟକଣା ଜାରି ହୋଇଛି ।
ଓଡ଼ିଶା ଅତ୍ୟାବଶ୍ୟକ ସେବା ଆଇନ-୧୯୮୮ର ଧାରା ୨(ଖ) ଓ ଧାରା ୩ରେ ପ୍ରଦତ୍ତ ପ୍ରାବଧାନ ଆଧାରରେ ରାଜ୍ୟ ସରକାର ଏହି କଟକଣା ଜାରି କରିଛନ୍ତି । ରାଜ୍ୟ ଗୃହ ବିଭାଗ ପକ୍ଷରୁ ଏନେଇ ଆଜି ବିଧିବଦ୍ଧ ବିଜ୍ଞପ୍ତି ଜାରି ହୋଇଛି । ଏହି ଏସମା ଅବଧି ମଧ୍ୟ ଆଜିଠୁ ୬ମାସ ପାଇଁ ବଳବତ୍ତର ରହିଲା ବୋଲି ବିଜ୍ଞପ୍ତିରେ ଉଲ୍ଲେଖ ରହିଛି ।
ସୂଚନାଯୋଗ୍ୟ, ରାଜ୍ୟ ସରକାର ପୂର୍ବରୁ ମଧ୍ୟ ସ୍ୱାସ୍ଥ୍ୟ କର୍ମଚାରୀମାନଙ୍କ କାର୍ଯ୍ୟବନ୍ଦ ଆନ୍ଦୋଳନ ଉପରେ ଏସମା ଲାଗୁ କରିଛନ୍ତି ।