ରାଜ୍ୟର ସବୁ ଜଳଭଣ୍ଡାରଗୁଡ଼ିକରେ ସ୍ୱୟଂଚାଳିତ ହାଇଡ୍ରୋଲିକ୍ ଗେଟ୍ (ଫାଟକ) ଲଗାଇ ଜଳଭଣ୍ଡାରରେ ଅଧିକ ଜଳ ସଂରକ୍ଷଣ କରିବା ପାଇଁ ମୋହନ ଚରଣ ମାଝୀ ଆଜି ଆଉ ଏକ ନୂଆ ଯୋଜନା କାର୍ଯ୍ୟକାରୀ କରିଛନ୍ତି । ‘ଫାଟକବିହୀନ ଡ୍ୟାମରେ ଫାଟକ ସଂଯୋଗୀକରଣ ଯୋଜନା’ରେ ଆସନ୍ତା ୩ବର୍ଷ ମଧ୍ୟରେ ରାଜ୍ୟ ସରକାର ମୋଟ ୨୩୯.୬୦କୋଟି ଟଙ୍କା ବ୍ୟୟବରାଦ କରିଛନ୍ତି । ୨୦୨୪-୨୫ରୁ ୨୦୨୬-୨୭ ମସିହା ମଧ୍ୟରେ ଏହି ଅର୍ଥ ଖର୍ଚ୍ଚ କରାଯିବ ।
ଆଜି ଜଳସମ୍ପଦ ବିଭାଗ ପକ୍ଷରୁ ଜାରି ‘ସଂକଳ୍ପ ପତ୍ର’ ଅନୁସାରେ ଜଳଭଣ୍ଡାରର ସମ୍ପୂର୍ଣ୍ଣ ଜଳଧାରଣ କ୍ଷମତା ଓ ସର୍ବାଧିକ ଜଳସ୍ତର ମଧ୍ୟରେ ଥିବା ପାର୍ଥକ୍ୟକୁ ଦୃଷ୍ଟିରେ ରଖି ଜଳର ଅତିରିକ୍ତ ସଂରକ୍ଷଣ କରାଯାଇପାରିବ । ଯାହାକୁ ପାନୀୟ ଜଳ, ସେଂଚାଂଚଳର ସ୍ଥିରୀକରଣ, ଅତିରିକ୍ତ ସେଚାଂଚଳ ସୃଷ୍ଟି ତଥା ଶିଳ୍ପ ଆବଶ୍ୟକତା ଇତ୍ୟାଦିରେ ବ୍ୟବହୃତ କରିହେବ । ଏହାକୁ ଦୃଷ୍ଟିରେ ରଖି ଜଳର ସର୍ବୋତ୍କୃଷ୍ଟ ବ୍ୟବହାର ପାଇଁ ମହଜୁଦ୍ ଥିବା ‘ଫାଟକବିହୀନ ଡ୍ୟାମରେ ଫାଟକ ସଂଯୋଗୀକରଣ ଯୋଜନା’କୁ ଆସନ୍ତା ୩ବର୍ଷ ପାଇଁ କାର୍ଯ୍ୟକାରୀ କରାଯିବ । ଏଥିରେ ୨୩୯.୬୦କୋଟି ଟଙ୍କା ବ୍ୟୟବରାଦ କରାଯାଇଛି ।
ଏହାଦ୍ୱାରା ୧୯୦୯୭ ହେକ୍ଟର ସେଚାଂଚଳ ସ୍ଥିରୀକରଣ ହେବାସହିତ ୨୭୫୦ହେକ୍ଟର ଅତିରିକ୍ତ ସେଚାଂଚଳ ସୃଷ୍ଟି କରାଯାଇପାରିବ । ଏହି ଯୋଜନା ମାଧ୍ୟମରେ ଜଳଭଣ୍ଡାର ନିଷ୍କାସନ ପଥର ଶୀର୍ଷ ଭାଗରେ କବଜା ଦ୍ୱାରା ଲଗାଯିବାକୁ ଥିବା ସ୍ୱୟଂଚାଳିତ ହାଇଡ୍ରୋଲିକ୍ ଫାଟକ ଭଳି ନୂଆ ଟେକ୍ନୋଲୋଜି ବ୍ୟବହାର କରି ଜଳଭଣ୍ଡାରରେ ଅଧିକ ଜଳ ସଂରକ୍ଷିତ କରିହେବ । ଜମି ଅଧିଗ୍ରହଣ ତଥା ପୁନଃ ଥଇଥାନ ଓ ପୁନର୍ବସତିର କୌଣସି ସମସ୍ୟା ଜଡ଼ିତ ନୁହେଁ କିମ୍ବା ଏହା ପୂର୍ବ ବିଦ୍ୟମାନ ସ୍ପିଲୱେ ତଥା ପ୍ରମୁଖ କାର୍ଯ୍ୟକୁ ମଧ୍ୟ ପ୍ରଭାବିତ କରିବ ନାହିଁ ।
ଏହି ଯୋଜନା ମାଧ୍ୟମରେ ୧୨ଟି ମଧ୍ୟମ ଜଳସେଚନ ପ୍ରକଳ୍ପ ଓ ୪୭ଟି କ୍ଷୁଦ୍ର ଜଳସେଚନ ପ୍ରକଳ୍ପରେ ପ୍ରାୟତଃ ୧୨୪ ମିଲିୟନ କ୍ୟୁବିକ୍ ମିଟରର ଅତିରିକ୍ତ ଜଳଧାରଣ କ୍ଷମତା ସୃଷ୍ଟି କରାଯିବା ସହ ୧୯୦୯୭ ହେକ୍ଟର ସେଚାଂଚଳ ସ୍ଥିରୀକରଣ ଓ ୨୭୫୦ ହେକ୍ଟର ଅତିରିକ୍ତ ସେଚାଂଚଳ ସୃଷ୍ଟି କରାଯାଇପାରିବ ।
ଜଳଭଣ୍ଡାରରେ ଜଳସ୍ତର ନିୟନ୍ତ୍ରଣ ଦ୍ୱାରା ଜଳାଭାବ ଦୂର ହେବାସହିତ ଜଳର ଗୁଣବତ୍ତାରେ ଉନ୍ନତି ପରିଲକ୍ଷିତ ହେବ । ଏହି ଯୋଜନା ଦ୍ୱାରା ଡ୍ୟାମର ତଳମୁଣ୍ଡରେ ଜଳପ୍ରବାହକୁ ନିୟନ୍ତ୍ରଣ କରାଯାଇ ଜଳର ସର୍ବୋତ୍କୃଷ୍ଟ ବ୍ୟବହାର କରିହେବ । ରାଜ୍ୟ ସରକାରଙ୍କ ନିଜସ୍ୱ ସମ୍ବଳରୁ ଜଳସମ୍ପଦ ବିଭାଗର ଯୋଜନା ପାଣ୍ଠି ମାଧ୍ୟମରେ ୨୦୨୪-୨୫ରୁ ୨୦୨୬-୨୭ରୁ ଏହି ୨୩୯.୬୦କୋଟି ଖର୍ଚ୍ଚ କରାଯିବ ।