୩ ଆଇଏଏସଙ୍କ ନିଯୁକ୍ତିକୁ ନେଇ ଚର୍ଚ୍ଚା: ଭାସ୍କରଜ୍ୟୋତିଙ୍କ ପାହ୍ୟା ଖସିଲା, ୪ମାସରେ ବିଷ୍ଣୁପଦଙ୍କୁ କ୍ଲିନଚିଟ୍

ରାଜ୍ୟର ୩ଜଣ ବରିଷ୍ଠ ଆଇଏଏସ୍ ଅଫିସର ବିଷ୍ଣୁପଦ ସେଠୀ, ଭାସ୍କରଜ୍ୟୋତି ଶର୍ମା ଓ ବି.ପରମେଶ୍ୱରନଙ୍କ ନିଯୁକ୍ତିକୁ ନେଇ ଏବେ ପାୱାର କରିଡରରେ ଚର୍ଚ୍ଚା । ଶନିବାର ସାଧାରଣ ପ୍ରଶାସନ ବିଭାଗ ପକ୍ଷରୁ ଏହି ୩ ଆଇଏଏସଙ୍କ ସମେତ ମୋଟ ୮ଜଣ ଆଇଏଏସଙ୍କ ବଦଳି ବିଜ୍ଞପ୍ତି ଜାରି ହୋଇଛି । ମାତ୍ର ଏଥିରେ ବିଷ୍ଣୁପଦ,ଭାସ୍କରଜ୍ୟୋତି ଓ ପରମେଶ୍ୱରନଙ୍କ ନିଯୁକ୍ତି ଏବଂ ବଦଳି ସଂକ୍ରାନ୍ତରେ ଗୁରୁତ୍ୱପୂର୍ଣ୍ଣ ତଥ୍ୟ ପଦାକୁ ଆସିଛି । ୪ମାସରେ ବିଷ୍ଣୁପଦଙ୍କୁ କ୍ଲିନଚିଟ୍ ଦେଇ ପୁଣିଥରେ ପ୍ରମୁଖ ସଚିବ ପାହ୍ୟାରେ ଅବସ୍ଥାପିତ କରିଥିବା ରାଜ୍ୟ ସରକାର ଭାସ୍କରଜ୍ୟୋତିଙ୍କୁ କମିଶନର ତଥା ସଚିବ ପାହ୍ୟାରୁ ସ୍ୱତନ୍ତ୍ର ସଚିବ ପାହ୍ୟାକୁ ପଦବନତି କରିଛନ୍ତି ।

ସୂଚନା ଅନୁସାରେ, ୧୯୯୯ ବ୍ୟାଚ୍ ଆଇଏଏସ୍ ଭାସ୍କରଜ୍ୟୋତି ଶର୍ମାଙ୍କୁ ପାହ୍ୟାକୁ ରାଜ୍ୟ ସରକାର ହ୍ରାସ କରିଛନ୍ତି । ଶ୍ରୀ ଶର୍ମା ଓଡ଼ିଶା ସରକାରରେ କମିଶନର ତଥା ସଚିବ ପାହ୍ୟାରେ କାର୍ଯ୍ୟ କରୁଥିଲେ । କିନ୍ତୁ ଚଳିତମାସ ୭ତାରିଖରେ ସାଧାରଣ ପ୍ରଶାସନ ବିଭାଗ ଦ୍ୱାରା ଜାରି ବିଜ୍ଞପ୍ତିରେ ତାଙ୍କୁ ସ୍ୱତନ୍ତ୍ର ସଚିବ ପାହ୍ୟାକୁ ପଦବନତି କରାଯାଇଛି । ତେବେ ଶ୍ରୀ ଶର୍ମାଙ୍କୁ ତଳ ପାହ୍ୟାକୁ ଖସାଇବା ପଛରେ କ’ଣ କାରଣ ରହିଛି ତାହା ଅସ୍ପଷ୍ଟ । ମାତ୍ର କେନ୍ଦ୍ର ସରକାରଙ୍କ ଚିଠି ପରେ ଶ୍ରୀ ଶର୍ମାଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରି ତାଙ୍କର ‘ପାହ୍ୟା’ ହ୍ରାସ ହୋଇଥିବା ଜଣାପଡ଼ିଛି । ଶ୍ରୀ ଶର୍ମା ରାଜ୍ୟ ସରକାରରେ ୨୦୧୯ ମସିହାରୁ ବିଭିନ୍ନ ବିଭାଗର କମିଶନର ତଥା ସଚିବ ଭାବେ କାର୍ଯ୍ୟ କରୁଥିଲେ ।

ଗତ ମେ’ ୨୨ତାରିଖରେ ରାଜ୍ୟ ସରକାର ତାଙ୍କୁ ବିଭାଗୀୟ ସଚିବ ପଦରୁ ଅଚାନକ ହଟାଇ ଦେଇଥିଲେ । ତାଙ୍କୁ ଯୋଜନା ଓ ସଂଯୋଜନ ବିଭାଗର ସ୍ୱତନ୍ତ୍ର ସଚିବ ଭାବେ ଅବସ୍ଥାପିତ କରାଯାଇଥିଲା । କିନ୍ତୁ ସେତେବେଳେ ତାଙ୍କ ବଦଳି ନିର୍ଦ୍ଦେଶକୁ ସାର୍ବଜନୀନ କରିନଥିଲେ । ତେବେ ଶନିବାର ତାଙ୍କୁ କଟକସ୍ଥିତ ଜମିଜମା ରେକର୍ଡ ଓ ବନ୍ଦୋବସ୍ତ କମିଶନର ଭାବେ ବଦଳି କରାଯାଇଛି ଓ ସେ ଉକ୍ତ ପଦବୀରେ ରାଜ୍ୟ ସରକାରଙ୍କ ଆଇଏଏସ୍ କ୍ୟାଡ଼ରରେ ସ୍ୱତନ୍ତ୍ର ସଚିବ ପାହ୍ୟାର ସୁବିଧାସୁଯୋଗ ପାଇବେ ବୋଲି ଉଲ୍ଲେଖ ଅଛି । ଶ୍ରୀ ଶର୍ମା ୨୦୧୯ ଅଗଷ୍ଟରୁ ୨୦୨୩ ମେ’ ପର୍ଯ୍ୟନ୍ତ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତିକରଣ ବିଭାଗର ସଚିବ ଭାବେ କାମ କରିବା ସହ ବିଜ୍ଞାନ ଓ କାରିଗରି କୌଶଳ, ମହିଳା ଓ ଶିଶୁ ବିକାଶ ବିଭାଗର ସଚିବ ଭାବେ ଅତିରିକ୍ତ ଦାୟିତ୍ୱ ମଧ୍ୟ ତୁଲାଇଥିଲେ । ଏବେ ତାଙ୍କ ପତ୍ନୀ ୧୯୯୯ ବ୍ୟାଚ୍ ଆଇଏଏସ୍ ଶୁଭା ଶର୍ମା ରାଜ୍ୟ ମହିଳା ଓ ଶିଶୁବିକାଶ ବିଭାଗର ସଚିବ ଭାବେ କାମ କରୁଛନ୍ତି । ରାଜ୍ୟ ସରକାରରେ ତାଙ୍କଠୁ ବହୁ ଜୁନିୟର ଅଫିସର୍ ଏପରିକି ୨୦୦୭ ବ୍ୟାଚର ଆଇଏଏସ ଅଫିସରଙ୍କୁ ଏବେ ବିଭାଗୀୟ କମିଶନର ତଥା ସଚିବ ଭାବେ କାର୍ଯ୍ୟ କରିବାର ସୁଯୋଗ ମିଳିଛି ।

ସେହିପରି ପ୍ରାୟ ୪ମାସ ଧରି ବିନା ପଦରେ ବସି ରହିଥିବା ୧୯୯୫ ବ୍ୟାଚ୍ ଆଇଏଏସ୍ ବିଷ୍ଣୁପଦ ସେଠୀଙ୍କୁ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତିକରଣ ବିଭାଗର ପ୍ରମୁଖ ସଚିବ ଭାବେ ଅବସ୍ଥାପିତ କରାଯାଇଛି । ୨୦୨୩ ଜୁନ୍ ମାସରେ ଉଚ୍ଚଶିକ୍ଷା ବିଭାଗରେ କେଳେଙ୍କାରୀର ଅଭିଯୋଗ ହୋଇଥିଲା ଓ ରାଜ୍ୟ ସରକାର ତତକାଳୀନ ଉଚ୍ଚଶିକ୍ଷା ମନ୍ତ୍ରୀ ରୋହିତ ପୂଜାରୀ ଓ ବିଭାଗର ପ୍ରମୁଖ ସଚିବ ପଦରୁ ବିଷ୍ଣୁପଦ ସେଠୀଙ୍କୁ ଅଚାନକ ହଟାଇ ଦେଇଥିଲେ । ସାଧାରଣ ପ୍ରଶାସନ ବିଭାଗରେ ଓଏସଡି ଭାବେ ବଦଳି ହୋଇଥିବା ଶ୍ରୀ ସେଠୀ ଗତ କିଛିମାସ ଧରି ନିଜର ପୋଷ୍ଟିଂ ପାଇଁ ପ୍ରୟାସ ଜାରି ରଖିଥିଲେ । ମାତ୍ର ଯେଉଁ ଅଭିଯୋଗ ଆଧାରରେ ଶ୍ରୀ ସେଠୀଙ୍କୁ ପ୍ରାୟ ୪ମାସ ବିନା କାମରେ ବସିବାକୁ ପଡ଼ିଥିଲା ଓ ପ୍ରମୁଖ ସଚିବ ପଦରୁ ହଟାଯିବାର କଳଙ୍କ ଲାଗିଥିଲା, ସେଥିରୁ ସେ କିଭଳି କ୍ଳିନଚିଟ୍ ପାଇଲେ ତାକୁ ସରକାର ସାର୍ବଜନୀନ କରିନାହାନ୍ତି ।

୨୦୦୮ ବ୍ୟାଚ୍ ବି.ପରମେଶ୍ୱରନ ୨୦୨୦ ଫେବୃୟାରୀ ମାସରେ ରାଜ୍ୟ ପାନୀୟଜଳ ଓ ପରିଚ୍ଛନ୍ନତା ନିର୍ଦ୍ଦେଶକ ତଥା ପଂଚାୟତିରାଜ ବିଭାଗର ଅତିରିକ୍ତ ସଚିବ ଭାବେ ଦାୟିତ୍ୱ ତୁଲାଇଥିଲେ । ତାଙ୍କୁ ଏହି ଦୁହାଁଳିଆ ପଦବୀରୁ ଅଚାନକ ହଟାଇ ଦେଇ କମ୍ ଗୁରୁତ୍ୱ ବହନ କରୁଥିବା ଭୁବନେଶ୍ୱରସ୍ଥିତ ଚକବନ୍ଦୀ କମିଶନର ଭାବେ ବଦଳି କରାଯାଇଛି । ଏହି ପଦବୀରେ ସେ ରାଜ୍ୟ ଆଇଏଏସ କ୍ୟାଡ଼ରରେ ଅତିରିକ୍ତ ସଚିବଙ୍କୁ ମିଳୁଥିବା ସୁବିଧାସୁଯୋଗ ପାଇବେ ।