ଇଲେକ୍ଟ୍ରିଚାଳିତ ମୋଟର ଯାନ ଚଳପ୍ରଚଳକୁ ପ୍ରୋତ୍ସାହିତ କରିବା ନିମନ୍ତେ ରାଜ୍ୟ ସରକାର ନିଜର କର୍ମଚାରୀମାନଙ୍କୁ ଦେଉଥିବା ୨ରୁ ୧୫ଲକ୍ଷ ଟଙ୍କା ପର୍ଯ୍ୟନ୍ତ ସୁଧମୁକ୍ତ ଅଗ୍ରୀମ ଅର୍ଥର ଦୁରୂପଯୋଗର ଅଭିଯୋଗ ଆସିବା ପରେ ରାଜ୍ୟ ସରକାର କଠୋର ଆଭିମୁଖ୍ୟ ପୋଷଣ କରିଛନ୍ତି । ଇଲେକ୍ଟ୍ରି ଗାଡ଼ି କିଣିବା ନାଁରେ ଆଡଭାନ୍ସ ଟଙ୍କା ନେଇ ତା’ର ଦୁରୂପଯୋଗ କରିଥିବା ଅଫିସର ଓ କର୍ମଚାରୀଙ୍କଠୁ ବାର୍ଷିକ ୧୨.୫% ସୁଧ ସହ ସମସ୍ତ ଆଡଭାନ୍ସ ଟଙ୍କା ଚଳିତମାସ ଶେଷସୁଦ୍ଧା ଆଦାୟ କରିବା ଓ ସେମାନଙ୍କ ବିରୁଦ୍ଧରେ ବିଭାଗୀୟ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଅର୍ଥ ବିଭାଗ ନିର୍ଦ୍ଦେଶ ଦେଇଛି ।
ଅର୍ଥ ବିଭାଗର ସ୍ୱତନ୍ତ୍ର ସଚିବ ସତ୍ୟବ୍ରତ ରାଉତ ଏନେଇ ସମସ୍ତ ବିଭାଗର ସଚିବ,ଅତିରିକ୍ତ ମୁଖ୍ୟ ସଚିବମାନଙ୍କୁ ଚିଠି ଲେଖି ରାଜ୍ୟ ସରକାରୀ କର୍ମଚାରୀମାନେ ଇଲେକ୍ଟ୍ରି ମୋଟର ଯାନ ଆଡଭାନ୍ସ(ଅଗ୍ରୀମ ଟଙ୍କା) ନେଇ ତା’ର ଦୁରୂପଯୋଗ କରୁଥିବା ସରକାରଙ୍କ ଦୃଷ୍ଟିକୁ ଆସିଛି । ତେଣୁ ଯେଉଁ କର୍ମଚାରୀମାନେ ଇଲେକ୍ଟ୍ରି ଗାଡ଼ି କିଣିବା ପାଇଁ ଆଡଭାନ୍ସ(ଅଗ୍ରୀମ ଟଙ୍କା) ନେଇଛନ୍ତି ସେମାନେ ନିଶ୍ଚିତ ଭାବେ ଏହି ଟଙ୍କା ନେବାର ୩ମାସ ମଧ୍ୟରେ ଗାଡ଼ି କିଣାର ବିଲ୍, ରେଜିଷ୍ଟ୍ରେସନ ସାର୍ଟଫିକେଟ୍ ଓ ବୀମା ଦସ୍ତାବିଜ୍ ନିଜର କର୍ତ୍ତୃପକ୍ଷଙ୍କ ନିକଟରେ ଦାଖଲ କରିବେ । ଯିଏ ଏଥିରୁ ବିଚ୍ୟୁତ ହେବେ ତାଙ୍କଠୁ ବାର୍ଷିକ ୧୨.୫ ପ୍ରତିଶତ ସୁଧ ହାରରେ ସେ ନେଇଥିବା ଅଗ୍ରୀମ ଅର୍ଥ ଆଦାୟ କରାଯିବ ।
ସେହିପରି ଯେଉଁ କର୍ମଚାରୀମାନେ ଏହି ଅଗ୍ରୀମ ଟଙ୍କାର ଦୁରୂପଯୋଗ କରିଛନ୍ତି ସେମାନଙ୍କ ବିରୁଦ୍ଧରେ ଓଡ଼ିଶା ପ୍ରଶାସନିକ ସେବା(ସିସିଆଣ୍ଡଏ) ରୁଲସ-୧୯୬୨ ଅନୁସାରେ ନିଶ୍ଚିତ ତୁରନ୍ତ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ବିଭାଗୀୟ ସଚିବମାନଙ୍କୁ କୁହାଯାଇଛି । ଏହାସହିତ ସେମାନେ ନେଇଥିବା ଆଡଭାନ୍ସ ଟଙ୍କାକୁ ବାର୍ଷିକ ୧୨.୫ ପ୍ରତିଶତ ସୁଧ ସହ ଚଳିତମାସ ୩୧ତାରିଖ ସୁଦ୍ଧା ଆଦାୟ କରିବାକୁ କୁହାଯାଇଛି । ଏହି ଫେରସ୍ତ ଟଙ୍କାକୁ ସେମାନେ ସରକାରଙ୍କ କେଉଁ ଆକାଉଣ୍ଟରେ ଜମା କରିବେ ସେ ନେଇ ମଧ୍ୟ ଅର୍ଥ ବିଭାଗ ଆବଶ୍ୟକ ସୂଚନା ଦେଇଛି ।
ସୂଚନାଯୋଗ୍ୟ, ରାଜ୍ୟ ସରକାର ଇଲେକ୍ଟ୍ରିଚାଳିତ ମୋଟର ଯାନ ଚଳପ୍ରଚଳକୁ ପ୍ରୋତ୍ସାହିତ କରିବା ନିମନ୍ତେ ନିଜର କର୍ମଚାରୀମାନଙ୍କୁ ୨ରୁ ୧୫ଲକ୍ଷ ଟଙ୍କା ପର୍ଯ୍ୟନ୍ତ ସୁଧମୁକ୍ତ ଅଗ୍ରୀମ ଅର୍ଥ ଯୋଗାଇ ଦେବାକୁ ଦେବାକୁ ଗତ ମାର୍ଚ୍ଚ ମାସରେ ନିଷ୍ପତ୍ତି ନେଇଥିଲେ । ୨୦୨୫ ଡିସେମ୍ବର ୩୧ତାରିଖ ପର୍ଯ୍ୟନ୍ତ କର୍ମଚାରୀମାନେ ଗାଡ଼ି କିଣିବା ପାଇଁ ଏହି ଆଡଭାନ୍ସ ନେଇପାରିବେ । ପ୍ରଥମ ଓ ଦ୍ୱିତୀୟ ଶ୍ରେଣୀ କର୍ମଚାରୀଙ୍କୁ ୧୫ଲକ୍ଷ ଟଙ୍କା ପର୍ଯ୍ୟନ୍ତ ଏବଂ ତୃତୀୟ ଓ ଚତୁର୍ଥ ଶ୍ରେଣୀ କର୍ମଚାରୀଙ୍କୁ ୨ଲକ୍ଷ ଟଙ୍କା ପର୍ଯ୍ୟନ୍ତ ଆଡଭାନ୍ସ ଆକାରରେ ନେବାର ପ୍ରାବଧାନ ରହିଛି ।