ସିଏମଓ ଅଫିସର ତାଲିକାରୁ ହଟିଲା ପାଣ୍ଡିଆନଙ୍କ ନାଁ: ସରକାରୀ ସୁରକ୍ଷା ହଟିବ ତ?

ବିଜେଡି ନେତା ଭିକେ ପାଣ୍ଡିଆନ ଅଫିସର କି ନେତା ତାହା ସରକାର ସ୍ଥିର କରନ୍ତୁ ବୋଲି ବିଜେପିର ଅଭିଯୋଗ ପରେ ଆଜି ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ(ସିଏମଓ) ଅଫିସର ତାଲିକାରୁ ପାଣ୍ଡିଆନଙ୍କ ନାଁକୁ ସରକାର ହଟାଇ ଦେଇଛନ୍ତି । ରାଜ୍ୟରେ ନିର୍ବାଚନ ଆଚରଣ ବିଧି ବଳବତ୍ତର ଥିବାରୁ ‘ଫାଇଭ-ଟି ଓ ଆମ ଓଡ଼ିଶା ନବୀନ ଓଡ଼ିଶା’ ଅଧ୍ୟକ୍ଷ ଭାବେ ସେ କୌଣସି ସରକାରୀ ସୁବିଧା ପାଇପାରିବେ ନାହିଁ । ପାଣ୍ଡିଆନ ଏବେ କେବଳ ଜଣେ ରାଜନୀତିକ ବ୍ୟକ୍ତି ଭାବେ ପରିଚିତ ହେବେ । ତେବେ ପାଣ୍ଡିଆନଙ୍କୁ ମିଳିଥିବା ବ୍ୟାପକ ପୁଲିସ୍ ସୁରକ୍ଷାକୁ ରାଜ୍ୟ ସରକାର ପ୍ରତ୍ୟାହାର କରିଛନ୍ତି କି ନାହିଁ ତାହା ଜଣାପଡ଼ିନି ।

ରାଜ୍ୟ ବିଜେପି ମୁଖପାତ୍ର ଅନୀଲ ବିଶ୍ୱାଳ ଆଜି ଟ୍ୱିଟ୍ କରି ଦର୍ଶାଇଛନ୍ତି ଯେ, ‘ଫାଇଭ-ଟି’ ଓ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରୁ ଭିକେ ପାଣ୍ଡିଆନ ବିଦା ହୋଇଛନ୍ତି । ଗତ ୪ଦିନ ତଳେ ବିଜେପି ଏକ ସାମ୍ବାଦିକ ସମ୍ମିଳନୀ କରି ପାଣ୍ଡିଆନ ନେତା ନା ଅଫିସର ତାହା ସରକାର ସ୍ଥିର କରନ୍ତୁ ବୋଲି ଦାବି କରିଥିଲା ।

ଅନ୍ୟପକ୍ଷରେ ଗତ ନଭେମ୍ବର ମାସରେ ସରକାରୀ ଚାକିରି ଛାଡ଼ି ବିଜେଡିର ସଦସ୍ୟତା ଗ୍ରହଣ କରିଥିବା ପାଣ୍ଡିଆନଙ୍କୁ ରାଜ୍ୟ ସରକାର ‘ଫାଇଭ-ଟି, ଆମ ଓଡ଼ିଶା ନବୀନ ଓଡ଼ିଶା’ ଅଧ୍ୟକ୍ଷ ଭାବେ କ୍ୟାବିନେଟ୍ ମନ୍ତ୍ରୀ ପାହ୍ୟାରେ ନିଯୁକ୍ତି ଦେଇଥିଲେ । ମାତ୍ର ତାଙ୍କ ନାଁ ମୁଖ୍ୟମନ୍ତ୍ରୀ କାର୍ଯ୍ୟାଳୟର ଅଫିସର ତାଲିକାର ଶୀର୍ଷରେ ରହିଥିଲା । ଯାହାକୁ ନେଇ ବିଜେପି ନିକଟରେ ରାଜ୍ୟ ସରକାରଙ୍କୁ ଘେରିଥିଲା । ଆଉ ପାଣ୍ଡିଆନଙ୍କୁ ମିଳିଥିବା ବ୍ୟାପକ ପୁଲିସ ସୁରକ୍ଷାକୁ ନେଇ ମଧ୍ୟ ବିଜେପି ରାଜ୍ୟ ମୁଖ୍ୟ ନିର୍ବାଚନ ଅଧିକାରୀଙ୍କୁ ଭେଟି ଅଭିଯୋଗ କରିଥିଲା ।

ଏହି ବିବାଦ ବଢ଼ିବା ପରେ ଆଜି ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ୱେବସାଇଟରୁ ପାଣ୍ଡିଆନଙ୍କ ନାଁ ହଟାଇ ଦିଆଯାଇଛି ।

ସୂଚନାଯୋଗ୍ୟ, ନିର୍ବାଚନ ଆଦର୍ଶ ଆଚରଣ ବିଧି ବଳବତ୍ତର ଥିବାରୁ ପାଣ୍ଡିଆନଙ୍କୁ ସରକାର ଦେଇଥିବା କ୍ୟାବିନେଟ୍ ମନ୍ତ୍ରୀ ପାହ୍ୟାର ସୁବିଧାସୁଯୋଗ ମଧ୍ୟ ମିଳିପାରିବ ନାହିଁ । ସେ ଏବେ ଜଣେ ସାଧାରଣ ବିଜେଡି କର୍ମୀ ଭାବେ ରହିବେ । ତାଙ୍କୁ ମିଳିଥିବା ବ୍ୟାପକ ସୁରକ୍ଷା ବ୍ୟବସ୍ଥା ଜାରି ରହିବ ନା ପ୍ରତ୍ୟାହାର ହେବ ସେ ନେଇ କୌଣସି ସୂଚନା ମିଳିପାରିନାହିଁ ।