ରାଧିକାଙ୍କୁ ମିଳିଲା ନିଯୁକ୍ତି: ଗୋଟିଏ ପଦବୀରେ ୨ ବରିଷ୍ଠ ଆଇପିଏସ୍‌

କେନ୍ଦ୍ରୀୟ ଡେପୁଟେସନରୁ ଫେରି ନିଯୁକ୍ତି ଅପେକ୍ଷାରେ ଥିବା ୧୯୮୯ ବ୍ୟାଚ୍ ଆଇପିଏସ୍ ବି.ରାଧିକାଙ୍କୁ ଆଜି ରାଜ୍ୟ ସରକାର ନିଯୁକ୍ତି ଦେଇଛନ୍ତି । ଆଉ ଏହି ନିଯୁକ୍ତି ସହ ଗୋଟିଏ ପଦବୀରେ ୨ଜଣ ବରିଷ୍ଠ ଆଇପିଏସଙ୍କୁ ଅବସ୍ଥାପିତ କରାଯାଇଛି । ଗୃହ ବିଭାଗ ପକ୍ଷରୁ ଜାରି ବିଜ୍ଞପ୍ତିରେ ଏଭଳି ଉଲ୍ଲେଖ ରହିଛି ।

ଗୃହ ବିଭାଗ ପକ୍ଷରୁ ଜାରି ବିଜ୍ଞପ୍ତି ଅନୁସାରେ, କେନ୍ଦ୍ରୀୟ ଡେପୁଟେସନରୁ ଫେରିଥିବା ବି.ରାଧିକାଙ୍କୁ ଆଜି ପୁଲିସ ରିକ୍ର‌୍ୟୁଟମେଂଟ ବୋର୍ଡ ଅଧ୍ୟକ୍ଷ ଭାବେ ଅବସ୍ଥାପିତ କରାଯାଇଛି । ଏହି ପଦବୀ ସହ ରାଧିକାଙ୍କୁ ଓଡ଼ିଶା ରାଜ୍ୟ ଫୋରେନ୍ସିକ ସାଇନ୍ସ ଲାବ୍ରୋଟୋରୀ ନିର୍ଦ୍ଦେଶକ ଭାବେ ଅତିରିକ୍ତ ଦାୟିତ୍ୱ ନ୍ୟସ୍ତ କରାଯାଇଛି । ଏହି ରାଜ୍ୟ ଫୋରେନ୍ସିକ ସାଇନ୍ସ ଲାବ୍ରୋଟୋରୀର ନିର୍ଦ୍ଦେଶକ ଭାବେ ଏବେ ୨୦୦୪ ଆଇପିଏସ୍ ଆଶୀଷ କୁମାର ସିଂ କାର୍ଯ୍ୟରତ ଅଛନ୍ତି ।

ରାଜ୍ୟ ସରକାରରେ ପାୱାରଫୁଲ ଆଇପିଏସ୍ ଭାବେ ଜଣାଶୁଣା ଶ୍ରୀ ସିଂ ଏବେ ସେଂଟ୍ରାଲ ରେଞ୍ଜ ଆଇଜି ଅଛନ୍ତି । ସେ ଅତିରିକ୍ତ ଭାବେ ରାଜ୍ୟ ଫୋରେନ୍ସିକ ସାଇନ୍ସ ଲାବ୍ରୋଟୋରୀ ନିର୍ଦ୍ଦେଶକ ଦାୟିତ୍ୱ ତୁଲାଉଛନ୍ତି । ଆଜି ସରକାର ପୁଣି ତାଙ୍କୁ ଓଡ଼ିଶା ରାଜ୍ୟ ପୁଲିସ ହାଉସିଂ ୱେଲଫେୟାର କର୍ପୋରେସନର ସିଇଓ ଭାବେ ଅତିରିକ୍ତ ଦାୟିତ୍ୱ ନ୍ୟସ୍ତ କରିଛନ୍ତି । ସେ ନିଜର ପୂର୍ବ ଦାୟିତ୍ୱ ସହ ଏହି ନୂଆ ଦାୟିତ୍ୱ ତୁଲାଇବେ । ଆଉ ସେ ସିଇଓ ଭାବେ ପୁଲିସ ହାଉସିଂ ୱେଲଫେୟାର କର୍ପୋରେସନର ମୁଖ୍ୟ ପରିଚାଳନା ନିର୍ଦ୍ଦେଶକ(ସିଏମଡି)ଙ୍କୁ ରିପୋର୍ଟ କରିବେ ।

ସେହିପରି ବିଜୁ ପଟ୍ଟନାୟକ ପୁଲିସ ଏକାଡେମୀର (ଆଇଜି ପ୍ରଶିକ୍ଷଣ) ୨୦୦୧ ବ୍ୟାଚ୍ ଆଇପିଏସ୍ ସାଇନି.ଏସ୍‌ଙ୍କୁ ଅତିରିକ୍ତ ଦାୟିତ୍ତବ ଭାବେ ତାଙ୍କୁ କ୍ରାଇମ ଏଗନେଷ୍ଟ ୱିମେନ୍ ଆଣ୍ଡ ଚାଇଲ୍ଡ ୱିଙ୍ଗ( ସିଏଡବ୍ଲ୍ୟୁଆଣ୍ଡ ସିଡବ୍ଲ୍ୟୁ)ର ଆଇଜି ଦାୟିତ୍ୱ ନ୍ୟସ୍ତ ହୋଇଛି ।

ତେବେ ରାଜ୍ୟ ଫୋରେନ୍ସିକ ସାଇନ୍ସ ଲାବ୍ରୋଟୋରୀର ନିର୍ଦ୍ଦେଶକ ଭାବେ ଆଇଜି ପାହ୍ୟାର ଆଇପିଏସ୍ ଶ୍ରୀ ସିଂ କାର୍ଯ୍ୟରତ ଥିବାବେଳେ ସେହି ଗୋଟିଏ ପଦବୀରେ ଡିଜି ପାହ୍ୟାର ରାଧିକା କିଭଳି କାର୍ଯ୍ୟ କରିବେ ତାହା ଜଣାପଡ଼ିନି । ମାତ୍ର ଗୃହ ବିଭାଗର

ବିଜ୍ଞପ୍ତି

ଏହି ଗୋଟିଏ ପଦବୀରେ ଉଭୟ ରାଧିକା ଓ ଶ୍ରୀ ସିଂଙ୍କୁ ନିଯୁକ୍ତି ଦେଇଛି ।

ଗୃହ ବିଭାଗ ପକ୍ଷରୁ ଏହି ବଦଳି ଓ ନିଯୁକ୍ତି ସଂକ୍ରାନ୍ତ ତଥ୍ୟକୁ ଓଡ଼ିଶା ଗେଜେଟରେ ପ୍ରକାଶ କରିବାକୁ ପ୍ରିଣ୍ଟିଂ ନିର୍ଦ୍ଦେଶକଙ୍କୁ ଅନୁରୋଧ କରାଯାଇଥିବା ସହ କେନ୍ଦ୍ର ଗୃହ ମନ୍ତ୍ରଣାଳୟକୁ ମଧ୍ୟ ଅବଗତ କରାଯାଇଛି ।

ସେହିପରି କ୍ରାଇମବ୍ରାଂଚ ଅତିରିକ୍ତ ଡିଜି ଅରୁଣ ବୋଥ୍ରା ୫ଦିନ ଛୁଟିରେ ଯିବାର ଥିବାରୁ କ୍ରାଇମବ୍ରାଂଚ ଆଇଜି ସଫିନ୍ ଅହମ୍ମଦ କେ.ଙ୍କୁ ଦାୟିତ୍ୱ ନ୍ୟସ୍ତ ମିଳିଛି । ଶ୍ରୀ ବୋଥ୍ରା ଡିସେମ୍ବର ୧୮ରୁ ୨୫ତାରିଖ ପର୍ଯ୍ୟନ୍ତ ବ୍ୟକ୍ତିଗତ କାରଣରୁ ଛୁଟିରେ ରହିବେ ବୋଲି ଜଣାପଡ଼ିଛି ।