ଓଡ଼ିଶା ପୁଲିସରେ ଟେଣ୍ଡର ଫିକ୍ସିଂ ଜଳଜଳ: ସନ୍ଦେହଘେରରେ ଗୃହ ବିଭାଗ ଓ ଡିଜିପି ଅଫିସ୍‌

ଦୁର୍ନୀତି ବିରୁଦ୍ଧରେ ରାଜ୍ୟ ସରକାରଙ୍କ ‘ଜିରୋ ଟଲେରାନ୍ସ ନୀତି’କୁ ଭୃକ୍ଷେପ ନକରି ଓଡ଼ିଶା ପୁଲିସ କ୍ରମାଗତ ଭାବେ ଟେଣ୍ଡର ଅନିୟମିତତାରେ ଲିପ୍ତ ଥିବାର ପୁଳାପୁଳା ପ୍ରମାଣ ଦାଣ୍ଡରେ ପଡ଼ି ଏବେ ହାଟରେ ଗଡ଼ିଲାଣି । କେଉଁଠି ନିର୍ଦ୍ଦିଷ୍ଟ ଘରୋଇ କମ୍ପାନୀକୁ ଅହେତୁକ ଅନୁକମ୍ପା ଦେଖାଇ ବିନା ଟେଣ୍ଡର ଓ ରାଜ୍ୟସ୍ତରୀୟ କ୍ରୟ କମିଟିର ବିନା ଅନୁମୋଦନରେ ୭.୮୪ କୋଟି ଟଙ୍କାର କାର୍ଯ୍ୟାଦେଶ ଦିଆଗଲାଣି ତ କେଉଁଠି ପୁଲିସ ଡିଜିଙ୍କ ଭାବମୂର୍ତ୍ତି ସୁଧାରିବା ପାଇଁ ବର୍ଷକୁ କୋଟିଏ ଟଙ୍କାରୁ ଅଧିକ ଟଙ୍କାର କାର୍ଯ୍ୟ ଟେକି ଦେବାକୁ ସବୁ କସରତ ସରିଲାଣି।

ସେହିପରି ‘ଉପକୂଳ ସୁରକ୍ଷା ପାଇଁ ଡ୍ରୋନକିଣା’ ହେଉ କି ‘ସିଷ୍ଟମ ଇଣ୍ଟିଗ୍ରେଟର ଚୟନ’ରେ ଟେଣ୍ଡର ପ୍ରକ୍ରିୟା, ସବୁଥିରେ ଅନିୟମିତତା ଜଳଜଳ ଦିଶୁଥିଲେ ମଧ୍ୟ ସମସ୍ତେ ନିରବଦ୍ରଷ୍ଟା ସାଜିଛନ୍ତି । କେବଳ ସେତିକି ନୁହେଁ ବିଗତ ୧୦ମାସ ମଧ୍ୟରେ ‘ଓଡ଼ିଶା ପୁଲିସ’ ନିଜର ବିଭିନ୍ନ କାର୍ଯ୍ୟ ଓ ସେବା ପାଇଁ ଯେଉଁସବୁ ଟେଣ୍ଡର ଡାକିଛି ସେଥିରୁ ଅଧିକାଂଶ ଟେଣ୍ଡରର ଚୂଡ଼ାନ୍ତରେ ଅନିୟମିତତାର ଅଭିଯୋଗ ଜଳଜଳ ଦିଶିବାରେ ଲାଗିଛି । ଆଉ ଏପଟେ ଏହି ସମସ୍ତ ଅନିୟମିତତା ଘଟଣାରେ ଗୃହ ବିଭାଗ ଓ ପୁଲିସ ଡିଜିପିଙ୍କ କାର୍ଯ୍ୟାଳୟର ଭୂମିକା ତଥା ନିରବତାକୁୁ ନେଇ ମଧ୍ୟ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି ।

ସବୁ ନିୟମକୁ ଫୁ’, ମନଇଚ୍ଛା ଦେଇଦେଲେ ୭.୮୪କୋଟିର କାମ

୨୦୨୫ ଜୁନ୍ ୩୦ତାରିଖରେ ରାଜ୍ୟ କ୍ରାଇମ ରେକର୍ଡ ବ୍ୟୁରୋ(ଏସସିଆରବି) ନିର୍ଦ୍ଦେଶିକା  ସନ୍ତୋଷ ବାଲା ଗୋଟିଏ ଚିଠି ସମସ୍ତ ପୁଲିସ ପ୍ରତିଷ୍ଠାନ(ଥାନାରୁ ଆରମ୍ଭ କରି ଆଇଜି ରେଞ୍ଜ ଅଫିସ ସମେତ)କୁ ଲେଖିଛନ୍ତି । ଏହି ଚିଠିରେ ଶ୍ରୀମତୀ ବାଲା ସବୁ ପୁଲିସ୍ ଅଫିସରମାନଙ୍କୁ ସେମାନଙ୍କ କାର୍ଯ୍ୟାଳୟରେ ଥିବା ଇଂଟରନେଟ୍ ସଂଯୋଗର ବ୍ୟାଣ୍ଡୱିଥ୍ ଅପଗ୍ରେଡେସନ୍ କାର୍ଯ୍ୟ ନିମନ୍ତେ ଏୟାରଟେଲ୍ କମ୍ପାନୀର ଟେକନିସିଆନମାନଙ୍କୁ ଆବଶ୍ୟକ କାର୍ଯ୍ୟ କରିବା ପାଇଁ ଅନୁମତି ଓ ସହଯୋଗ କରିବାକୁ ପରାମର୍ଶ ଦେଇଛନ୍ତି । ସେମାନେ ଏହି ଇନଷ୍ଟଲେସନ୍ ସମୟରେ ପୁରୁଣା ମୋଡେମ୍‌, ରାଉଟର ଓ ଆଉଟଡୋର ୟୁନିଟକୁ ମଧ୍ୟ ପରିବର୍ତ୍ତନ କରିପାରନ୍ତି ବୋଲି ସୂଚିତ କରିଛନ୍ତି ।

ସିସିଟିଏନ୍ ପ୍ରୋଜେକ୍ଟ ଅନ୍ତର୍ଗତ ଏବେ ସବୁ ପୁଲିସ ପ୍ରତିଷ୍ଠାନକୁ ସଂଯୋଗ କରୁଥିବା ଏୟାରଟେଲ୍ କମ୍ପାନୀର ଡେଡିକେଟେଡ୍ ଲିଜଡ୍ ଲାଇନ(ମଲଟି ପ୍ରୋଟୋକଲ ଲେବଲ ସ୍ୱିଚିଂ-ଏମପିଏଲଏସ କନକ୍ଟେଭିଟି)ର ଅପଗ୍ରେଡେସନ୍ ଜୁଲାଇ ପହିଲାରୁ (୪ରୁ ୧୬ ଏମବିପିଏସ୍ ପରିବର୍ତ୍ତେ ୧୦୦ରୁ ୧୫୦ ଏମବିପିଏସ୍ ସ୍ପିଡକୁ ବୃଦ୍ଧି) କରାଯିବ ବୋଲି ଚିଠି ଲେଖିବା ପରେ ଏହି କେଳେଙ୍କାରୀ ପଦାକୁ ଆସିଛି ।

ରାଜ୍ୟ ସରକାର ଓ ରାଜ୍ୟସ୍ତରୀୟ କ୍ରୟ କମିଟିର ବିନା ଅନୁମୋଦନରେ କିଏ ଓ କିଭଳି ଏହି ଅପଗ୍ରେଡେସନ୍ ପାଇଁ(୭କୋଟି ୮୪ଲକ୍ଷ ୧୮ହଜାର ୪୯୮ଟଙ୍କାର କାର୍ଯ୍ୟ ନିମନ୍ତେ) ଅନୁମତି ଦେଲା ତାକୁ ନେଇ ପ୍ରଶ୍ନ ଉଠିଛି । ପୁଲିସ ଡିଜିଙ୍କ ଅନୁମତି ବିନା ସମସ୍ତ ପୁଲିସ ପ୍ରତିଷ୍ଠାନକୁ ଶ୍ରୀମତୀ ବାଲା ଚିଠି ଲେଖି ଏହି ଅପଗ୍ରେଡେସନ୍ ନିମନ୍ତେ ସୂଚିତ କରିବା ସମ୍ଭବପର ନଥିବାବେଳେ ଓଡ଼ିଶା ସରକାରଙ୍କ ଆର୍ଥିକ ପରିଚାଳନା ନିୟମ (ଓଜିଏଫଆର) -୨୦୨୩କୁ ଖୋଲା ଉଲ୍ଲଘଂନ କରି ପ୍ରତିଯୋଗିତାମୂଳକ ବିଡିଂ ଓ ବଜାରର ମୂଲ୍ୟକୁ ବିଚାରକୁ ନନେଇ କାହିଁକି ଏୟାରଟେଲ୍ କମ୍ପାନୀକୁ ଏତେ ଟଙ୍କାର କାର୍ଯ୍ୟାଦେଶ ଟେକି ଦିଆଗଲା ତାହା ଏବେ ପୁଲିସ ଡିଜି ଓ ଗୃହ ବିଭାଗକୁ ସନ୍ଦେହଘେରକୁ ଆଣିଛି ।

ଆସନ୍ତୁ ଜାଣିବା କେମିତି ହୋଇଛି ଅନିୟମିତତା

‘କ୍ରାଇମ ଆଣ୍ଡ କ୍ରିମିନାଲ ଟ୍ରାକିଂ ନେଟୱାର୍କ ଆଣ୍ଡ ସିଷ୍ଟମସ(ସିସିଟିଏନଏସ)’ ପ୍ରୋଜେକ୍ଟ ରାଜ୍ୟର ସମସ୍ତ ଅପରାଧ ଓ ଅପରାଧୀଙ୍କ ଡାଟାବେସ୍ ସହ ନାଗରିକଙ୍କୁ ଅନଲାଇନରେ ପୁଲିସ ସେବା ପ୍ରଦାନକୁ ତ୍ୱରାନ୍ୱିତ କରାଯାଉଛି । ଏହି ସିସିଟିଏନଏସ୍  ପ୍ରୋଜେକ୍ଟ ଅନ୍ତର୍ଗତ ସବୁ ପୁଲିସ ପ୍ରତିଷ୍ଠାନକୁ ଏକ ‘ଡେଡିକେଟେଡ୍ ଲିଜଡ୍ ଲାଇନ’ ମାଧ୍ୟମରେ ସଂଯୋଗ କରାଯାଇଛି । ୨୦୨୩ ଜାନୁୟାରୀ ମାସରେ ବିଧିବଦ୍ଧ ଟେଣ୍ଡର ପ୍ରକ୍ରିୟାରେ ଏୟାରଟେଲ କମ୍ପାନୀ ଚୟନିତ ହେବାପରେ ତ୍ରୈମାସିକ ୪୬ଲକ୍ଷ ଟଙ୍କାରେ ଏହି ସେବା(ବ୍ୟାଣ୍ଡୱିଥ ୪ଏମବିପିଏସରୁ ୧୨ଏମବିପିଏସ) ୨୦୨୬ ମାର୍ଚ୍ଚ ୩୧ତାରିଖ ପର୍ଯ୍ୟନ୍ତ ଯୋଗାଇ ଦେବାକୁ ଚୁକ୍ତିବଦ୍ଧ ହୋଇଛି ।

କିନ୍ତୁ କେନ୍ଦ୍ର ଗୃହ ମନ୍ତ୍ରଣାଳୟର ନିର୍ଦ୍ଦେଶ ଓ କ୍ରିମିନାଲ ଜଷ୍ଟିସ ସିଷ୍ଟମର ଗାଇଡଲାଇନ(୨୦୨୪ ଫେବୃୟାରୀ ୧୫ରେ ଜାରି)ର ଆଳ ଦେଖାଇ ରାଜ୍ୟ କ୍ରାଇମ ରେକର୍ଡ ବ୍ୟୁରୋ ନିର୍ଦ୍ଦେଶିକା ଶ୍ରୀମତୀ ବାଲା ବିନା ଟେଣ୍ଡର ଓ ବଜାର ଦରକୁ ଅନୁଧ୍ୟାନ ନକରି ଏହି ବ୍ୟାଣ୍ଡୱିଥକୁ ୧୦୦ରୁ ୧୫୦ ଏମବିପିଏସକୁ ବୃଦ୍ଧି(୭.୮୪କୋଟି ଟଙ୍କାର କାର୍ଯ୍ୟାଦେଶ) ନିମନ୍ତେ ଏୟାରଟେଲ୍ କମ୍ପାନୀକୁ ଅନୁମତି ପତ୍ର ଜାରି କରିଥିବା ଜଣାପଡ଼ିଛି । ଏପରିକି ଏହି ସିସିଟିଏନଏସ୍ ନିମନ୍ତେ ୨୦୨୫-୨୬ ଆର୍ଥିକ ବର୍ଷ ପାଇଁ ମୋଟ ୨.୭୫ କୋଟି ଟଙ୍କା ଥିବାବେଳେ ବାକି ୯ମାସ (ଚଳିତ ଜୁଲାଇରୁ ୨୦୨୬ ମାର୍ଚ୍ଚ) ପାଇଁ ୫କୋଟି ୫୫ଲକ୍ଷ ୧୮ହଜାର ୪୯୮ଟଙ୍କା ଦେବା ନିମନ୍ତେ ପୁଲିସ ଡିଜିଙ୍କ ଅନୁମତି ଲୋଡ଼ିଥିଲେ ।

ଯଦିଓ ଏତେପରିମାଣର ଆର୍ଥିକ ଦେଣନେଣ ପାଇଁ ଅନୁମତି ଦେବା କ୍ଷମତା ପୁଲିସ ଡିଜିଙ୍କର ନାହିଁ ଓ ଏଥିପାଇଁ ରାଜ୍ୟ ସରକାରଙ୍କ ଅନୁମତି ଜରୁରୀ । ତଥାପି ଏହି ଅନୁମତି ମିଳିବା ପୂର୍ବରୁ ଏୟାରଟେଲ୍ କମ୍ପାନୀକୁ ଆବଶ୍ୟକ ଅପଗ୍ରେଡେସନ୍ କାର୍ଯ୍ୟ ଆରମ୍ଭ ନିମନ୍ତେ ଶ୍ରୀମତୀ ବାଲା କାହା ନିର୍ଦ୍ଦେଶରେ ଅନୁମତି ଦେଇଛନ୍ତି ତାହା ଏବେ ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି । ଅବଶ୍ୟ ଏହି ଅପଗ୍ରେଡେସନ୍ ନିମନ୍ତେ ନୂଆ ଟେଣ୍ଡର କରାଗଲେ ସେହି ଟେଣ୍ଡର ପ୍ରକ୍ରିୟା ଓ ଇନଷ୍ଟେଲେସନ୍ ଆଦି କାର୍ଯ୍ୟ ସରିବାକୁ ଅତିକମରେ ୬ମାସ ସମୟ ଲାଗିବ, ଯାହା ସରୁସରୁ ୨୦୨୫ ନଭେମ୍ବର ମାସ ହୋଇଯିବ ଏବଂ ଏହା ସମ୍ଭବ ନୁହେଁ ବୋଲି ଶ୍ରୀମତୀ ବାଲା ତାଙ୍କ ନୋଟସିଟରେ ଉଲ୍ଲେଖ କରିଛନ୍ତି ।

ଅମୀମାସିଂତ ପ୍ରଶ୍ନ, ନିର୍ଦ୍ଦେଶିକାଙ୍କ ଭୂମିକାକୁ ନେଇ ସନ୍ଦେହ

୧- ଯଦି ଏହି ଅପଗ୍ରେଡେସନ୍ ଜରୁରୀ ଥିଲା ତା’ହେଲେ ରାଜ୍ୟ ସରକାର ଓ ରାଜ୍ୟସ୍ତରୀୟ କ୍ରୟ କମିଟି(ଏସଏଲପିସି)ର ପୂର୍ବ ଅନୁମତି କାହିଁକି ନିଆଗଲାନି? ବର୍ତ୍ତମାନର ବଜାର ଦରକୁ ଅନୁସନ୍ଧାନ ନକରି ଏୟାରଟେଲକୁ ଆନୁପାତିକ ଦରରେ ଏହି କାର୍ଯ୍ୟାଦେଶ ଟେକି ଦେବାପଛରେ କ’ଣ ଉଦ୍ଦେଶ୍ୟ ରହିଛି?

୨- ଶ୍ରୀମତୀ ବାଲା ୨୦୨୪ ଅଗଷ୍ଟ ମାସରୁ ନିର୍ଦ୍ଦେଶିକା ଦାୟିତ୍ୱରେ ଥିଲେ ମଧ୍ୟ ସେବେଠୁ ଏହି ଅପଗ୍ରେଡେସନ୍ ନିମନ୍ତେ ପଦକ୍ଷେପ ନନେଇ କାହିଁକି ଶେଷ ମୁହୂର୍ତ୍ତକୁ ନେଲେ ଓ ପୁଲିସ ଡିଜି କିଭଳି ଏହା ଉପରେ ଆପତ୍ତି ଉଠାଇଲେ ନାହିଁ?

୩- ଏୟାରଟେଲ୍ ଭଳି ଘରୋଇ କମ୍ପାନୀକୁ ଏବେ ଏତେ ଟଙ୍କାର କାର୍ଯ୍ୟାଦେଶ ଦେଇ ସରକାରୀ ଟଙ୍କାରେ ତାକୁ ନିଜର ଭିତ୍ତିଭୂମି ସୁଦୃଢ଼ କରିବାର ସୁଯୋଗ ଦିଆଯାଇ ଭବିଷ୍ୟତରେ ତା’ପାଇଁ ଟେଣ୍ଡର ହାସଲ କରିବାର ମାର୍ଗ ପ୍ରଶସ୍ତ କରାଯାଉଛି କି?

ପୁଲିସ ଡିଜିଙ୍କ ଭାବମୂର୍ତ୍ତି ବୃଦ୍ଧି ପାଇଁ ବର୍ଷକୁ କୋଟିଏ ଟଙ୍କା

ରାଜ୍ୟ ପୁଲିସ ଡିଜି ୱାଇବି ଖୁରାନିଆଙ୍କ ଭାବମୂର୍ତ୍ତି ବୃଦ୍ଧି ପାଇଁ ରାଜକୋଷରୁ ବର୍ଷକୁ ପ୍ରାୟ ଏକ କୋଟି ଟଙ୍କାରୁ ଅଧିକ ଅର୍ଥ ଖର୍ଚ୍ଚ ହେବ । ଏନେଇ ଆବଶ୍ୟକ ଟେଣ୍ଡର ପ୍ରକ୍ରିୟା ଶେଷ ହୋଇଛି । ପୁଲିସ ଡିଜି କାର୍ଯ୍ୟାଳୟର ସୋସିଆଲ ମିଡିଆ ମ୍ୟାନେଜମେଂଟ୍ ଓ କଂଟେଣ୍ଟ ଜେନେରେସନ୍ ପାଇଁ ଭୁବନେଶ୍ୱରସ୍ଥିତ ଓମକମ ମିଡିଆ ପ୍ରାଇଭେଟ୍ ଲିମିଟେଡ୍ ନାମକ ସଂସ୍ଥାକୁ ବାର୍ଷିକ ୧କୋଟି ୬ଲକ୍ଷ ୨୦ହଜାର ଟଙ୍କା ବିନିମୟରେ କାର୍ଯ୍ୟାଦେଶ ଦିଆଯିବାକୁ ଆପାତତଃ ନିଷ୍ପତ୍ତି ହୋଇଛି । କ୍ୟୁସିବିସି(କ୍ୱାଲିଟି ଆଣ୍ଡ କଷ୍ଟ ବେସଡ୍ ସିଲେକ୍ସନ) ମାଧ୍ୟମରେ ଗୃହ ସଚିବଙ୍କ ଅଧ୍ୟକ୍ଷତା ବିଶିଷ୍ଟ ରାଜ୍ୟସ୍ତରୀୟ କ୍ରୟ କମିଟି ଗତ ମେ’ ୫ତାରିଖରେ ଏହି ସଂସ୍ଥାକୁ ଚୟନ କରିଛନ୍ତି ।

ଏକାଡେମି ଫର ମିଡିଆ ଲର୍ଣ୍ଣିିଂ ପ୍ରାଇଭେଟ୍ ଲିିମିଟେଡ, କ୍ୟାଣ୍ଟିକ୍ସ ସଫ୍ଟୱେୟାର ପ୍ରାଃ ଲିମିଟେଡ ଓ ହାଟ୍  ମିଡିଆ ପ୍ରାଇଭେଟ୍ ଲିମିଟେଡ୍ ଭଳି ସଂସ୍ଥା ତୁଳନାରେ ଓମକମକୁ ୧୦୦ରୁ ୯୫ମାର୍କ(ଟେକନିକାଲ ମାର୍କ) ଦେଇ ଚୟନ କରାଯାଇଥିବାର ଦସ୍ତାବିଜ ହସ୍ତଗତ ହୋଇଛି । ଅବଶ୍ୟ ଜୁନ୍ ୬ତାରିଖରେ ରାଜ୍ୟ ଗୃହ ବିଭାଗ ଏନେଇ ପୁଲିସ ଡିଜିଙ୍କୁ ସ୍ପଷ୍ଟୀକରଣ ମାଗି ୨୦୨୩ ସେପ୍ଟେମ୍ବର ୪ରେ ଯେଉଁ ସଂସ୍ଥା ୩ବର୍ଷ ପାଇଁ ୨.୭୩କୋଟି ଟଙ୍କାରେ ଏହି କାର୍ଯ୍ୟ କରିବାକୁ ଅନୁମତି ନେଇଥିଲା ତା’ଠୁ ଏହା ଭିନ୍ନ କି ଜାଣିବାକୁ ଚାହିଁଛି । ତା’ଛଡ଼ା ଓମକମ୍ ସଂସ୍ଥା ଯେଉଁ ଖର୍ଚ୍ଚ ତାଲିକା ଦାଖଲ କରିଛି ତାହା ଆଖିଖୋସି ହୋଇପଡ଼ିବା ଭଳି ହୋଇଛି । କାରଣ ଏହି ସଂସ୍ଥା ମାସକୁ ସୋସିଆଲ ମିଡିଆ ବାବଦରେ ୮.୮୫ଲକ୍ଷ ଟଙ୍କା ଖର୍ଚ୍ଚ ହେବ ବୋଲି ଆର୍ଥିକ ବିଡ୍ ଦାଖଲ କରିଥିଲା ।

ତେବେ ପ୍ରଶ୍ନ ଉଠୁଛି, ରାଜ୍ୟରେ ଡିଜିପିଙ୍କ ଆର୍ଥିକ କ୍ଷମତା ମାତ୍ର ୧କୋଟି ଟଙ୍କା ହୋଇଥିବାବେଳେ କେବଳ ତାଙ୍କ କାର୍ଯ୍ୟାଳୟ ବା ତାଙ୍କର ସୋସିଆଲ ମିଡିଆ ପରିଚାଳନା ପାଇଁ ବାର୍ଷିକ କୋଟିଏ ଟଙ୍କାରୁ ଅଧିକ ଅର୍ଥ ଖର୍ଚ୍ଚ ନିମନ୍ତେ କିଭଳି ଅନୁମତି ଦିଆଯାଉଛି? ମୁଖ୍ୟମନ୍ତ୍ରୀ, ମନ୍ତ୍ରୀ ଓ ମୁଖ୍ୟ ସଚିବଙ୍କ କାର୍ଯ୍ୟାଳୟର ସୋସିଆଲ ମିଡିଆ ପରିଚାଳନା ତୁଳନାରେ ଡିଜିପିଙ୍କ ସୋସିଆଲ ମିଡିଆ ପାଇଁ ରାଜକୋଷରୁ ଏତେ ଟଙ୍କା ଖର୍ଚ୍ଚ କରାଯିବା କେତେ ଯୁକ୍ତିଯୁକ୍ତ? ଏସବୁ ବ୍ୟତୀତ ଗୃହ ବିଭାଗର କାର୍ଯ୍ୟଶୈଳୀ  ଉପରେ ମଧ୍ୟ ପ୍ରଶ୍ନବାଚୀ ସୃଷ୍ଟି ହୋଇଛି । ବିଭାଗର ଫାଇନାନ୍ସ ଅଫିସର ଗଙ୍ଗାଧର ମଲ୍ଲିକ ଗତ ପ୍ରାୟ ୫-୬ବର୍ଷ ଧରି ଗୋଟିଏ ପଦବୀରେ କିଭଳି ରହିଛନ୍ତି ତାହା ମଧ୍ୟ ସାଧାରଣରେ ସନ୍ଦେହ ସୃଷ୍ଟି କରିଛି ।

ଓଡ଼ିଶା ପୁଲିସରେ ଏଭଳି ଅନିୟମିତତା ଓ ବିବାଦୀୟ ନିଷ୍ପତ୍ତି ପରୋକ୍ଷରେ ରାଜ୍ୟ ପୁଲିସ ଫୋର୍ସର ପାରଦର୍ଶିର୍ତା ଓ ସରକାରଙ୍କ ଜିରୋ ଟଲେରାନ୍ସ ନୀତି ଉପରେ ପ୍ରଶ୍ନବାଚୀ ସୃଷ୍ଟି କରିଥିବାବେଳେ ସରକାର ଏସବୁର ଉଚ୍ଚସ୍ତରୀୟ ତଦନ୍ତ ସହ କଡ଼ା କାର୍ଯ୍ୟାନୁଷ୍ଠାନ ନେବାର ଆବଶ୍ୟକତା ଥିବା ସାଧାରଣରେ ଚର୍ଚ୍ଚା ହେଉଛି ।