ଲୋକସେବା ଭବନର ହେବ ନବକଳେବର, ମାଷ୍ଟରପ୍ଲାନ ପ୍ରସ୍ତୁତ କରୁଛି ଓବିସିସି

ରାଜ୍ୟ ପ୍ରଶାସନର ପ୍ରାଣକେନ୍ଦ୍ର ଭାବେ ପରିଚିତ ଲୋକସେବା ଭବନ ବା ସଚିବାଳୟର ନବକଳେବର ହେବ । ନୂଆ ଲୋକସେବା ଭବନ ନିର୍ମାଣ କରିବା ନିମନ୍ତେ ରାଜ୍ୟ ସରକାର ନିଷ୍ପତ୍ତି ନେଇ ଏହାର ପରିବର୍ଦ୍ଧିତ ମାଷ୍ଟର ପ୍ଲାନ୍ ପ୍ରସ୍ତୁତ କରିବାକୁ ଓଡ଼ିଶା ସେତୁ ଓ ନିର୍ମାଣ ନିଗମ(ଓବିସିସି)କୁ ନିର୍ଦ୍ଦେଶ ଦେଇଛନ୍ତି ।  ସଚିବାଳୟ, ରାଜୀବ ଭବନ, ବିଭାଗୀୟ ମୁଖ୍ୟ କାର୍ଯ୍ୟାଳୟ, ଖାରବେଳ ଭବନ, କୃଷି ଭବନ ଆଦି ଅଂଚଳକୁ ମିଶାଇ ଏହି ନୂଆ ଲୋକସେବା ଭବନ କମ୍ଲେକ୍ସ ତିଆରି ହେବ ବୋଲି ଜଣାପଡ଼ିଛି ।

ରାଜ୍ୟ ପୂର୍ତ୍ତ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ଆଜି ବିଧାନସଭାରେ ଏକ ଲିଖିତ ପ୍ରଶ୍ନର ଉତ୍ତର ଦେଇ କହିଛନ୍ତି ଯେ, “ନୂଆ ଲୋକସେବା ଭବନ ନିର୍ମାଣ କରିବା ନିମନ୍ତେ ତା’ର ମାଷ୍ଟର ପ୍ଲାନ ପ୍ରସ୍ତୁତ କରିବାକୁ ଓବିସିସିକୁ ରାଜ୍ୟ ସରକାର ନିର୍ଦ୍ଦେଶ ଦେଇଛନ୍ତି । ଏହି ମାଷ୍ଟର ପ୍ଲାନଟି ଅନୁମୋଦନ ହେଲା ପରେ ପରବର୍ତ୍ତୀ ପଦକ୍ଷେପ ନିଆଯିବ । ବ୍ୟୟ ଅଟକଳ କରି ସରକାରଙ୍କ ଅନୁମୋଦନ ପାଇଁ ପଠାଯିବ । ବର୍ତ୍ତମାନର ଲୋକସେବା ଭବନ କୋଠା ୬୮ବର୍ଷ ପୁରୁଣା ଓ ଏବେ ପାର୍କିଂ ସମସ୍ୟା ଗୁରୁତର ହେଉଛି ବୋଲି ଶ୍ରୀ ହରିଚନ୍ଦନ ବିଧାୟିକା ସୁବାସିନୀ ଜେନାଙ୍କ ପ୍ରଶ୍ନର ଉତ୍ତରରେ କହିଛନ୍ତି ।

ଅନ୍ୟପକ୍ଷରେ ପୂର୍ତ୍ତ ବିଭାଗ ସୂତ୍ରରୁ ମିଳିଥିବା ସୂଚନା ଅନୁସାରେ, ରାଜ୍ୟ ସରକାର ନୂଆ ଲୋକସେବା ଭବନ ନିର୍ମାଣ କରିବା ପାଇଁ ନିଷ୍ପତ୍ତି ନେଇଛନ୍ତି । ମାଷ୍ଟର ପ୍ଲାନ୍ ପ୍ରସ୍ତୁତ କାର୍ଯ୍ୟ ଓବିସିସିକୁ ଦିଆଯାଇଛି । ଲୋକସେବା ଭବନର ଅର୍ଥାତ୍  ଷ୍ଟେଟବ୍ୟାଙ୍କ ଶାଖା ଓ କ୍ୟାଣ୍ଟିନ ଥିବା ଅଂଚଳକୁ ସିଧାସଳଖ ସେଚ ସଦନ ଓ ଖାରବେଳ ଭବନ ସହ ଯୋଡ଼ିବା ପାଇଁ ମାଷ୍ଟର ପ୍ଲାନ ପ୍ରସ୍ତୁତ ହେଉଛି । ମଝିରେ ଥିବା ଖୋର୍ଦ୍ଧା ଅତିରିକ୍ତ ଜିଲ୍ଲାପାଳଙ୍କ କାର୍ଯ୍ୟାଳୟରୁ ସେଠାରୁ ସ୍ଥାନାନ୍ତର କରାଯିବ । ଭୁବନେଶ୍ୱର କ୍ଲବ ପାଖ ଟ୍ରାଫିକଠାରୁ ସଚିବାଳୟ ପଛପଟ ରାସ୍ତା ଦେଇ ପାୱାରହାଉସ୍ ଛକ ପର୍ଯ୍ୟନ୍ତ ଥିବା ସମସ୍ତ ଅଂଚଳକୁ ସମ୍ମିଳିତ କରାଯାଇ ଏହି ଲୋକସେବା ଭବନ କମ୍ଲେକ୍ସ ପ୍ରସ୍ତୁତ କରାଯିବାକୁ ଯୋଜନା ଚାଲିଛି । ଲୋକସେବା ଭବନର ପୁରୁଣା କୋଠାକୁ ମଧ୍ୟ ଭଙ୍ଗାଯିବ ବୋଲି ସୂଚନା ମିଳିଛି ।

ଏହି କମ୍ପଲେକ୍ସ ମଧ୍ୟରେ ଅତ୍ୟାଧୁନିକ ପାର୍କିଂ ବ୍ୟବସ୍ଥା ସହ ପିଲାମାନଙ୍କ ପାଇଁ କ୍ରେଚ୍ ଓ କର୍ମଚାରୀଙ୍କ ସୁବିଧା ପାଇଁ ପାର୍କ, ଜିମ୍ ଆଦି ସହ ଡିପାର୍ଟମେଂଟାଲ ଷ୍ଟୋର ଆଦି ରହିବ । ଏହି ସମଗ୍ର ଅଂଚଳକୁ ସୌରଶକ୍ତି ଚାଳିତ କରିବାକୁ ମଧ୍ୟ ମାଷ୍ଟର ପ୍ଲାନରେ ଗୁରୁତ୍ୱ ଦିଆଯାଇଛି । ସବୁଜ ଭବନ ନୀତି ଅନୁଯାୟୀ ଇନର୍ଜି ସଂଚୟ ଏବଂ ପରିବେଶ ସମ୍ରକ୍ଷଣ ଉପରେ ଗୁରୁତ୍ୱ । ପ୍ରଶାସନିକ ଆବଶ୍ୟକତାକୁ ଦୃଷ୍ଟିରେ ରଖି ଏହି ନବକଳେବର ହେବ ବୋଲି ପୂର୍ତ୍ତ ବିଭାଗ ପକ୍ଷରୁ ସୂଚନା ମିଳିଛି ।

ସୂଚନାଯୋଗ୍ୟ, ଦୀର୍ଘ ୬୮ବର୍ଷ ପୁରୁଣା ରାଜ୍ୟ ସଚିବାଳୟର ନାମ ପରିବର୍ତ୍ତନ କରି ତତକାଳୀନ ବିଜେଡି ସରକାର ୨୦୧୯ ଜୁଲାଇ ୨୯ତାରିଖରେ ‘ଲୋକସେବା ଭବନ’ର ନାଁ ଦେଇଥିଲେ । ଲୋକସେବା ଭବନରୁ କିଛି ବିଭାଗକୁ ନୂଆ କୋଠା ‘ଖାରବେଳ ଭବନ’କୁ ମଧ୍ୟ ସ୍ଥାନାନ୍ତର କରାଇଥିଲେ ।