ଶ୍ରୀନଗର: ଜମ୍ମୁ-କଶ୍ମୀରର ଲୋକପ୍ରିୟ ଟିଭି ତଥା ସୋଶାଲ ମିଡିଆର ମହିଳା ଷ୍ଟାରଙ୍କ ହତ୍ୟାର ବଦଲା ମାତ୍ର ୨୪ ଘଣ୍ଟା ମଧ୍ୟରେ ନେଇଛି ସେନା। ସୁରକ୍ଷାକର୍ମୀଙ୍କ ଗୁଳିରେ ଟଳିଛନ୍ତି ୪ ଲସ୍କର-ଇ-ତାଏବା ଆତଙ୍କୀ। ଏହି ୪ ନିହତ ଆତଙ୍କବାଦୀଙ୍କ ମଧ୍ୟରେ ମହିଳା ଟିଭି ଅଭିନେତାଙ୍କ ହତ୍ୟାକାଣ୍ତରେ ୨ ଜଣ ସାମିଲ ଥିଲେ। ପୁଲୱମା ଓ ଶ୍ରୀନଗରରେ ହୋଇଥିବା ପୃଥକ ଏନକାଉଣ୍ଟର୍ରେ ୪ ଜଣ ଆତଙ୍କବାଦୀ ପ୍ରାଣ ହରାଇଥିବା ଆଜି ଜମ୍ମୁ-କଶ୍ମୀର ପୁଲିସ୍ ସୂଚନା ଦେଇଛି।
ପୁଲିସ୍ ପକ୍ଷରୁ ଦିଆଯାଇଥିବା ସୂଚନା ଅନୁଯାୟୀ, ଗୁରୁବାର ବିଳମ୍ବିତ ରାତିରେ ପୁଲୱମା ଅନ୍ତର୍ଗତ ଅବନ୍ତିପୁରାର ଅଗନହାନଜିପୁରା ଠାରେ ସୁରକ୍ଷାକର୍ମୀ ଓ ଆତଙ୍କବାଦୀ ମୁହାଁମୁହିଁ ହୋଇଥିଲେ। ବଡ଼ଗାମରେ ଟିଭି ଅଭିନେତ୍ରୀ ଅମରୀନ ଭଟଙ୍କୁ ହତ୍ୟା କରିଥିବା ଦୁଇ ଜଣ ଆତଙ୍କବାଦୀଙ୍କ ସହ ଏଠାରେ ଗୁଳି ବିନିମୟ ହୋଇଥିଲା।
ଦୀର୍ଘ ସମୟ ଧରି ଚାଲି ଥିବା ଏନକାଉଣ୍ଟରରେ ୨ ଜଣ ଯାକ ଆତଙ୍କୀ ନିହତ ହୋଇଛନ୍ତି। ନିହତ ଦୁଇ ଆତଙ୍କବାଦୀ ହେଲେ ବଡ଼ଗାମ ଅନ୍ତର୍ଗତ ହାଫରୋ ଚାଦୋରାର ଶାହିଦ ମୁସ୍ତାକ ଭଟ ଓ ପୁଲୱମା ଅନ୍ତର୍ଗତ ହକିରପୋରାର ଫରହାନ ହବିବ। ଉଭୟ ଲସ୍କରର କମାଣ୍ଡର ଲତିଫର ନିର୍ଦ୍ଦେଶରେ ଅମରୀନ ଭଟଙ୍କୁ ଗୁଳି କରି ହତ୍ୟା କରିଥିଲେ। ନିହତ ଶାହିଦ ଓ ଫରହାନର ମୃତଦେହ ନିକଟରୁ ଗୋଟିଏ ଏକେ ୫୬ ରାଇଫଲ, ୪ଟି ମାଗାଜିନ ଓ ଗୋଟିଏ ପିସ୍ତଲ ଜବତ କରାଯାଇଛି।
Both killed newly joined local #terrorists identified as Shahid Mushtaq Bhat R/O Hafroo Chadoora #Budgam & Farhan Habib R/O Hakripora #Pulwama. They had #killed TV artist on the instruction of LeT Cmdr Lateef. 01 AK 56 rifle, 4 magazines and a pistol recovered: IGP Kashmir https://t.co/VeoHZRkdEO
— Kashmir Zone Police (@KashmirPolice) May 26, 2022
ସେହିପରି ଶ୍ରୀନଗର ସୌରା ଅଞ୍ଚଳରେ ମଧ୍ୟ ସୁରକ୍ଷାକର୍ମୀଙ୍କ ଗୁଳିରେ ୨ ଜଣ ଆତଙ୍କବାଦୀ ନିହତ ହୋଇଛନ୍ତି। ଏହାକୁ ମିଶାଇ ୩ ଦିନ ମଧ୍ୟରେ ୧୦ ଜଣ ଆତଙ୍କୀ ନିହତ ହେଲେଣି। ଏମାନଙ୍କ ମଧ୍ୟରେ ୩ ଜଣ ଜୈଶର ସଦସ୍ୟ ଓ ହୋଇଥିବା ବେଳେ ବାକି ୭ ଜଣ ଲସ୍କରର ସଦସ୍ୟ।
ସୂଚନାଯୋଗ୍ୟ, ୨୫ ତାରିଖ ସନ୍ଧ୍ୟାରେ ବଡ଼ଗାମରେ ରହୁଥିବା ଟିଭି ଅଭିନେତ୍ରୀ ଅମରୀନ ଭଟଙ୍କୁ ଆତଙ୍କବାଦୀମାନେ ଗୁଳିମାଡ଼ କରିଥିଲେ। ଏଥିରେ ତାଙ୍କର ମୃତ୍ୟୁ ହୋଇଥିଲା। ସେହିପରି ଗୁଳିମାଡ଼ରେ ତାଙ୍କର ୧୦ ବର୍ଷୀୟ ପୁତୁରା ଆହତ ହୋଇଥିଲେ।