କୋଲକାତା: ପଶ୍ଚିମବଙ୍ଗ ବିଧାନସଭା ନିର୍ବାଚନ ପରେ ଜାରି ରହିଛି ହିଂସା। ଏହାକୁ ନେଇ ମମତା ବାନାର୍ଜୀ ସରକାର ଉପରେ ବର୍ଷିଛନ୍ତି ହାଇକୋର୍ଟ। ଶନିବାର ଏହି ମାମଲାର ଶୁଣାଣି କରିବା ବେଳେ ହାଇକୋର୍ଟ କହିଛନ୍ତି ହିଂସା ଘଟଣାରେ ପଦକ୍ଷେପ ନେବାରେ ରାଜ୍ୟ ସରକାର ଟାଳଟୁଳ ନୀତି ଅବଲମ୍ୱନ କରିଛନ୍ତି। ଏମିତି ହେଲେ ରାଜ୍ୟ କିଭଳି ଆଗକୁ ଯିବ? ସରକାରରେ ଯିଏ ରହୁ ଲୋକଙ୍କ ବିଶ୍ୱାସ ଜିଣିବା ଦରକାର। ସରକାର ମନ ଇଚ୍ଛା ଚାଲିପାରିବ ନାହିଁ। ଲୋକଙ୍କ ଜୀବନ ଏବଂ ସମ୍ପତ୍ତି କିଭଳି ସୁରକ୍ଷିତ ରହିବ ତାହା ସରକାରଙ୍କ ଦାୟିତ୍ୱ ବୋଲି କହିଛନ୍ତି ହାଇକୋର୍ଟ। ଏବେ ନିର୍ବାଚନୀ ହିଂସା ଘଟଣାରେ ରାଜ୍ୟ ସରକାର କାର୍ଯ୍ୟାନୁଷ୍ଠାନ ନେବା ଦରକାର ବୋଲି ହାଇକୋର୍ଟ କହିଛନ୍ତି। ନିକଟରେ ସମାନ କଥା ରାଜ୍ୟପାଳ ଜଗଦୀପ ଧନଖେର ମମତା ବାନାର୍ଜୀଙ୍କୁ କହିଥିଲେ। ହେଲେ ଏହାକୁ ନେଇ ଶାସକ ଦଳ ଟିଏମସି ସେତେବେଳେ ରାଜ୍ୟପାଳଙ୍କୁ ସମାଲୋଚନା କରିଥିଲା।
ପାଞ୍ଚ ଜଣିଆ ଖଣ୍ଡପୀଠ ଏହି ମାମଲାର ଶୁଣାଣି କରି କହିଛନ୍ତି, ଯେଉଁଥିରେ ଅଭିଯୋଗ ରହିଛି ନିର୍ବାଚନ ପରବର୍ତ୍ତୀ ହିଂସା ପାଇଁ ଶତାଧିକ ଲୋକ ବିସ୍ଥାପିତ ହୋଇଛନ୍ତି। ସରକାର କାର୍ଯ୍ୟାନୁଷ୍ଠାନ ନେବାରେ ଟାଳଟୁଳ ନୀତି ଆପଣାଇବା ଏବଂ ହିଂସାର ଭୟ ପାଇଁ ଅନେକ ଘରକୁ ଫେରିବାକୁ ରାଜି ହେଉ ନାହାନ୍ତି। ମାମଲା କୋର୍ଟରେ ଚାଲିଥିବାରୁ କୌଣସି ପଦକ୍ଷେପ ନିଆଯାଇନଥିବା କୁହାଯାଇଛି।
ହାଇକୋର୍ଟର ମୁଖ୍ୟ ବିଚାରପତି ରାଜେଶ ବିନ୍ଦଲ ଶୁଣାଣି କରି କହିଛନ୍ତି, ରାଜ୍ୟର ଆଇନ୍ ଶୃଙ୍ଖଳା ବଜାୟୀ ରଖିବା ଏବଂ ଲୋକଙ୍କୁ ସୁରକ୍ଷିତ ରଖିବା ରାଜ୍ୟ ସରକାରର କାମ। ଏହା ସରକାର ଭୁଲିବା ଠିକ୍ ନୁହେଁ। ତେଣୁ ହିଂସାକୁ ପ୍ରଶମିତ କରିବାରେ ଏବଂ ହିଂସା ସୃଷ୍ଟି କରୁଥିବା ବ୍ୟକ୍ତିଙ୍କ କ୍ଷେତ୍ରରେ କାର୍ଯ୍ୟାନୁଷ୍ଠାନ ବାଧାପ୍ରାପ୍ତ ହେବା ଠିକ୍ ନୁହେଁ। ଯଦି ଏଥିରେ ବାଧାପ୍ରାପ୍ତ ହେବ ତାହେଲେ କୋର୍ଟ ଏହାକୁ ଗମ୍ଭୀରତାର ସହ ନେବେ। ଏମିତିକି ଏଭଳି ହେଲେ ଅଦାଲତ ଅବମାନନା ନିୟମ ଲାଗୁ ହେବ ବୋଲି ହାଇକୋର୍ଟ କହିଛନ୍ତି।
ବିସ୍ଥାପିତ ବ୍ୟକ୍ତିଙ୍କ ଘରକୁ ଫେରାଇ ଆଣିବା ପାଇଁ ସମସ୍ତ ବ୍ୟବସ୍ଥା ହେବା ଦରକାର। ବିସ୍ଥାପିତଙ୍କ ଅଭିଯୋଗ ଉପରେ ଗୁରୁତ୍ୱ ଦିଆଯିବ ଦରକାର। ସରକାର ସେମାନଙ୍କୁ ଫେରାଇ ଆଣିବା ପାଇଁ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି। ଏଥିସହ ବିସ୍ଥାପିତଙ୍କ ଅଭିଯୋଗର ତଦନ୍ତ ପାଇଁ ଏକ କମିଟି ଗଠନ କରିବାକୁ ଜାତୀୟ ମାନବ ଅଧିକାର ଆୟୋଗ (NHRC) କୁ କୋର୍ଟ ନିର୍ଦ୍ଦେଶ ଦେଇଛନ୍ତି।
ତେବେ ଏହି ମାମଲାରେ ପରବର୍ତ୍ତୀ ଶୁଣାଣି ଜୁନ ୩୦ରେ ହେବ। ନିର୍ବାଚନ ପରେ ହିଂସା ପାଇଁ ଅପରାଧ ପାଇଁ ଦାୟୀ ବ୍ୟକ୍ତି ଏବଂ ଏହି ପ୍ରସଙ୍ଗରେ ସୁଚିନ୍ତିତ ନୀରବତା ବଜାୟ ରଖିଥିବା ଅଧିକାରୀମାନଙ୍କୁ ଇଙ୍ଗିତ କରି ଜୁନ ୩୦ରେ ଏହି ମାମଲାର ପରବର୍ତ୍ତୀ ଶୁଣାଣି ହେବ ବୋଲି କୋର୍ଟ କହିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
