- ପ୍ରଧାନମନ୍ତ୍ରୀ ଆବାସ ଯୋଜନାରେ ଦୁର୍ନୀତି: ମନ୍ତ୍ରୀ
- ଓଡ଼ିଶାରେ ୮୫% ପ୍ରତିଶତ ଅଯୋଗ୍ୟ ହିତାଧିକାରୀ: ମନ୍ତ୍ରୀ
- କେନ୍ଦ୍ର ଯୋଜନାର ଲୋଗୋକୁ ଛୋଟ ରଖି ରାଜ୍ୟ ଯୋଜନାର ଲୋଗୋକୁ ବଡ଼ ରଖାଯାଇଛି: ମନ୍ତ୍ରୀ
- ତିନି ବର୍ଷ ହେବ ରାଜ୍ୟ ସରକାର ଆବାସ ଯୋଜନା ପାଇଁ ବ୍ୟୟବରାଦ କରି ନାହାନ୍ତି: ମନ୍ତ୍ରୀ
- ତୃଣମୂଳ ସ୍ତରରେ କେନ୍ଦ୍ରର ଏହି ଯୋଜନା ବୋଲି ଉଲ୍ଲେଖ କରାଯାଇ ନାହିଁ: ମନ୍ତ୍ରୀ
- ବରଗଡ଼ ସାଂସଦ ସୁରେଶ ପୂଜାରୀଙ୍କ ଅଣ ତାରକା ପ୍ରଶ୍ନର ଉତ୍ତର ରଖିଲେ ମନ୍ତ୍ରୀ
- ଦୋଷୀଙ୍କ ବିରୋଧରେ ହେବ କାର୍ଯ୍ୟାନୁଷ୍ଠାନ: ମନ୍ତ୍ରୀ
ନୂଆଦିଲ୍ଲୀ: ଓଡ଼ିଶାରେ ପ୍ରଧାନମନ୍ତ୍ରୀ ଆବାସ ଯୋଜନାରେ ହୋଇଛି ବଡ଼ ଧରଣର ଦୁର୍ନୀତି । ମୋଟ୍ ହିତାଧିକାରୀଙ୍କ ମଧ୍ୟରୁ ୮୫ ପ୍ରତିଶତ ହେଉଛନ୍ତି ଅଯୋଗ୍ୟ ହିତାଧିକାରୀ। ଓଡ଼ିଶାରେ ଏହି ଯୋଜନାକୁ ବ୍ୟକ୍ତିଗତ ଲାଭ ଉଦ୍ଦେଶ୍ୟରେ ବ୍ୟବହାର କରାଯାଇଛି। ସଂସଦରେ ବରଗଡ଼ ସାଂସଦ ସୁରେଶ ପୂଜାରୀଙ୍କ ଏକ ପ୍ରଶ୍ନର ଉତ୍ତର ଦେଇ ଏପରି ମତ ଦେଇଛନ୍ତି କେନ୍ଦ୍ର ଗ୍ରାମ୍ୟ ଉନ୍ନୟନ ମନ୍ତ୍ରୀ ସାଧ୍ୱୀ ନିରଞ୍ଜନ ଜ୍ୟୋତି । ମୁଖ୍ୟତଃ କେନ୍ଦ୍ର ସରକାରଙ୍କ ଏକ ଟିମ୍ ତଦନ୍ତ କରି ଯେଉଁ ରିପୋର୍ଟ ଦାଖଲ କରିଛନ୍ତି ସେହି ଆଧାରରେ ମନ୍ତ୍ରୀ ଏପରି ଉତ୍ତର ରଖିଛନ୍ତି।
ମନ୍ତ୍ରୀ କହିଛନ୍ତି, ଓଡ଼ିଶାର ୯ ଜଣ ସାଂସଦ ପ୍ରଧାନମନ୍ତ୍ରୀ ଆବାସ ଯୋଜନାରେ ଦୁର୍ନୀତି ହୋଇଥିବା ନେଇ ଅଭିଯୋଗ କରିଥିଲେ। ଏହାପରେ ଏକ ଯୁଗ୍ମ ପ୍ରତିନିଧି ଦଳ ଗତ ଫେବୃଆରୀରେ ଓଡ଼ିଶା ଯାଇ ତଦନ୍ତ କରିଥିଲା। ଯେଉଁଥିରେ ଅନିୟମିତତା ହୋଇଥିବାର ମିଳିଛି ପ୍ରମାଣ । ଓଡ଼ିଶାରେ ୧୨.୯୫ ଲକ୍ଷ ଲୋକ ଏହି ଯୋଜନାରେ ସାମିଲ୍ ହୋଇଛନ୍ତି। ଯେଉଁଥିରୁ ୮୫ ପ୍ରତିଶତ ହେଉଛନ୍ତି ସମ୍ପୂର୍ଣ୍ଣ ଅଯୋଗ୍ୟ। ବ୍ୟକ୍ତିଗତ ଲାଭ ପାଇଁ ଏହି ପାଣ୍ଠିର ଅପବ୍ୟବହାର ହୋଇଛି। ଯୋଜନାର ଲାଭ ଗୋଟିଏ ପରିବାରର ବିଭିନ୍ନ ସଦସ୍ୟ ପାଇଛନ୍ତି।
୨୦୧୮-୧୯ରେ ଯେଉଁ ହିତାଧିତାକାରୀଙ୍କ ଆବେଦନ ଖାରଜ ହୋଇଥିଲା ୨୦୧୯-୨୦ରେ ସେହି ଲୋକଙ୍କୁ ଏହି ଯୋଜନାରେ ଲାଭ ମିଳିଛି। ସେହିପରି ଏହି ଯୋଜନା କେନ୍ଦ୍ର ସରକାରଙ୍କର। ହେଲେ ତୃଣମୂଳ ସ୍ତରରେ ଏହା କେନ୍ଦ୍ରର ଯୋଜନା ବୋଲି ଉଲ୍ଲେଖ କରାଯାଇ ନାହିଁ। ତିନି ବର୍ଷ ହେବ ଓଡ଼ିଶା ସରକାର ଏହି ଯୋଜନା ପାଇଁ କୌଣସି ବ୍ୟୟବରାଦ କରି ନାହାନ୍ତି।
ଫନି ବେଳେ ଅନେକ ଘର ନଷ୍ଟ ହୋଇଯାଇଥିଲା। ଏଥିପାଇଁ କେନ୍ଦ୍ର ସରକାର ୩.୮୯ ଲକ୍ଷ ଘର ପାଇଁ ସହାୟତା ରାଶି ମଞ୍ଜୁର କରିଥିଲେ। ହେଲେ ଏହି ସମୟରେ ହିତାଧିକାରୀ ଚୟନରେ ବ୍ୟାପକ ଅନିୟମିତତା ହୋଇଛି। ସେହିପରି ପ୍ରଧାନମନ୍ତ୍ରୀ ଆବାସ ଯୋଜନାରେ ବିଜୁ ପକ୍କା ଘର ଯୋଜନାର ଲୋଗୋ ଲଗାଯାଇଛି। ତା ପୁଣି କେନ୍ଦ୍ର ଯୋଜନାର ଲୋଗୋ ଅପେକ୍ଷା ବଡ଼ ରହିଛି।
ଏବେ ରାଜ୍ୟ ସରକାର ଦୁର୍ନୀତି ବିରୋଧରେ କାର୍ଯ୍ୟାନୁଷ୍ଠାନ ନେଇଥିବା ଜଣାଇଛି। କେନ୍ଦ୍ର ସରକାର ଏହା ଉପରେ ଅନୁଧ୍ୟାନ କରୁଛନ୍ତି ବୋଲି ମନ୍ତ୍ରୀ କହିଛନ୍ତି। ଯେଉଁମାନେ ଦୋଷୀ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଯାଇ ଏଫଆଇଆର ରୁଜୁ କରିବାକୁ ରାଜ୍ୟକୁ ନିର୍ଦ୍ଦେଶ ଦିଆଯାଇଛି। ଏଥିସହ ଯେଉଁ ପ୍ରଶାସନିକ ଅଧିକାରୀଙ୍କ ନାକ ତଳେ ଏହି ଦୁର୍ନୀତି ହୋଇଛି ତାଙ୍କୁ କାରଣ ଦର୍ଶାଅ ନୋଟିସ୍ ଜାରି କରାଯିବ ବୋଲି ମନ୍ତ୍ରୀ କହିଛନ୍ତି।
ସୂଚନାଯୋଗ୍ୟ, ରାଜ୍ୟରେ ବିରୋଧୀ ବିଜେପି ଏହି ପ୍ରସଙ୍ଗକୁ ନେଇ ରାଜ୍ୟ ସରକାର ତଥା ଶାସକ ଦଳ ବିରୋଧରେ ଗର୍ଜିଥିଲା। ଏପରିକି ବିଭିନ୍ନ ପ୍ରମାଣ ଦେଖାଇ ଏହାର ତଦନ୍ତ ଦାବି ମଧ୍ୟ କରିଥିଲେ।
TAGS
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
