ବିଜେପିରେ ସାମିଲ୍ ହେଲେ ହାଇକୋର୍ଟର ପୂର୍ବତନ ବିଚାରପତି

ଥିରୁଅନନ୍ତପୁରମ: କେରଳ ହାଇକୋର୍ଟର ପୂର୍ବତନ ବିଚାରପତି ପିଏନ୍ ରବିନ୍ଦ୍ରନ, ବି ଚିତାମ୍ୱେରେଶ ରବିବାର ବିଜେପିରେ ସାମିଲ୍ ହୋଇଛନ୍ତି। ରବିବାର କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ଉପସ୍ଥିତିରେ ବିଜେପିରେ ସାମିଲ୍ ହୋଇଛନ୍ତି ଏହି ପୂର୍ବତନ ବିଚାରପତି। କୋଚ୍ଚି ସ୍ଥିତ ତ୍ରିପୁନିଥୁରାରେ ରାଜ୍ୟ ବିଜେପି ଅଧ୍ୟକ୍ଷ ସୁରେନ୍ଦ୍ରନଙ୍କ ବିଜୟ ଯାତ୍ରା ବେଳେ ସୀତାରମଣ ରବିନ୍ଦ୍ରନଙ୍କୁ ବିଜେପିକୁ ସ୍ୱାଗତ କରିଛନ୍ତି।

ପୂର୍ବତନ ବିଚାରପତି ଚିତାମ୍ୱେରେଶ ଦିଲ୍ଲୀରେ ଥିବାରୁ କେରଳରେ ବ୍ୟକ୍ତିଗତ ଭାବରେ ଏହି ସଭାରେ ସାମିଲ୍ ହୋଇପାରିନଥିଲେ। ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ଲଭ୍ ଜିହାଦ ଆଇନକୁ ମଧ୍ୟ ସମର୍ଥନ କରିଥିଲେ ଏହି ପୂର୍ବତନ ଦୁଇ ବିଚାରପତି।

ତେବେ ପ୍ରତିକ୍ରିୟାରେ ଚିତାମ୍ୱେରେଶ କହିଥିଲେ ମୁଁ ବିଜେପି ସହିତ ଥିଲି ଏବେ ସମସ୍ତ ପ୍ରକ୍ରିୟା ସହିତ ବିଜେପିରେ ସାମିଲ୍ ହୋଇଛି। ହେଲେ ଦିଲ୍ଲୀରେ ଥିବାରୁ କୋଚ୍ଚିରେ ଆୟୋଜିତ ସଭାରେ ଯୋଗ ଦେଇପାରିଲି ନାହିଁ। ପାଠ ପଢ଼ୁଥିବା ବେଳେ ସେ ଏଭିବିପି ସହିତ ଯୋଡ଼ି ହୋଇଥିଲେ ବୋଲି ସେ କହିଛନ୍ତି।

ସୂଚନାଯୋଗ୍ୟ, କେରଳରେ ବିଧାନସଭା ନିର୍ବାଚନ ପାଇଁ ତାରିଖ ଘୋଷଣା ହୋଇସାରିଛି। ଗୋଟିଏ ପର୍ଯ୍ୟାୟରେ ବିଧାନସଭା ନିର୍ବାଚନ ହେବ। ରାଜ୍ୟରେ ବିଜେପି ନିଜକୁ ସଶକ୍ତ କରିବା ପାଇଁ ଅଣ୍ଟା ଭିଡିଛି। ନିକଟରେ ‘ମେଟ୍ରୋ ମ୍ୟାନ୍’ ଭାବରେ ପରିଚିତ ଶ୍ରୀଧରନ ଫେବୃଆରୀ ୨୫ରେ କେନ୍ଦ୍ରମନ୍ତ୍ରୀ ଆରକେ ସିଂହଙ୍କ ଉପସ୍ଥିତିରେ ବିଜେପିରେ ସାମିଲ୍ ହୋଇଛନ୍ତି।