ଉଦୟପୁର: ରାଜସ୍ଥାନର ଉଦୟପୁରରେ ଜଣେ ଟେଲରଙ୍କୁ ନିର୍ମମ ଭାବେ ହତ୍ୟା କରିଥିବା ଦୁଇ ଯୁବକ ମୋଟରସାଇକେଲରେ ଖସି ଯିବାକୁ ଚେଷ୍ଟା କରିଥିଲେ। ସେମାନେ ହେଲମେଟ ପିନ୍ଧି ଚକମା ଦେବାକୁ ଚେଷ୍ଟା କରିଥିଲେ ମଧ୍ୟ ପୁଲିସ୍ ସେମାନଙ୍କୁ ଅଧା ରାସ୍ତାରେ କାବୁ କରିବାକୁ ସକ୍ଷମ ହୋଇଥିଲା। ଏଥିସହ ରାସ୍ତାରେ ହିଁ ସେମାନଙ୍କୁ ଭଲ କି ଛେଚି ଗାଡ଼ିରେ ଭର୍ତ୍ତି କରିଥିଲା। ଏହି ଘଟଣାର ପୂରା ଭିଡିଓ ଏବେ ସାମ୍ନାକୁ ଆସିଛି।
ମଙ୍ଗଳବାର ୪୮ ବର୍ଷୀୟ କହ୍ନେୟା ଲାଲଙ୍କୁ ଦୁଇ ଯୁବକ ଗସ ମହମ୍ମଦ ଓ ମହମ୍ମଦ ରିୟାଜ ଅନସାରୀ ଦୋକାନ ଭିତରେ ପଣି ହତ୍ୟା କରିଥିଲେ। ଏହି ଦୃଶ୍ୟକୁ କ୍ୟାମେରାରେ କଏଦ ମଧ୍ୟ କରିଥିଲେ। ହତ୍ୟା ପରେ ଉଭୟ ଭିଡିଓ ଜାରି କରି ଘଟଣାକୁ ସ୍ୱୀକାର କରିଥିଲେ। କହ୍ନେୟା ଲାଲଙ୍କ ଆକାଉଣ୍ଟରୁ ବିଜେପିରୁ ନିଲମ୍ବିତ ହୋଇଥିବା ନୂପୁର ଶର୍ମାଙ୍କ ସପକ୍ଷରେ ପୋଷ୍ଟ କରାଯାଇଥିଲା।
ନୂପୁର ଶର୍ମା ଇସଲାମ ଓ ପ୍ରଫେଟ ମହମ୍ମଦଙ୍କୁ ଅପମାନିତ କରିଥିଲେ। ସେଭଳି ଜଣେ ଲୋକଙ୍କୁ ସମର୍ଥନ କରିଥିବାରୁ ଦୁଇ ଯୁବକ ପ୍ରତିଶୋଧ ନେବା ପାଇଁ ଏପରି ଲୋମହର୍ଷଣକାରୀ ଘଟଣା ଘଟାଇଥିବା ଭିଡିଓରେ କହିଥିଲେ।
ଭିଡିଓ ଜାରି ହେବାର କିଛି ସମୟ ମଧ୍ୟରେ ହିଁ ରାଜସ୍ଥାନ ପୁଲିସ୍ ଉଭୟଙ୍କୁ ଗିରଫ କରିଥିଲା। ଘଟଣା ପରେ ଉଭୟ ବାଇକ ଯୋଗେ ଉଦୟପୁର ଉପକଣ୍ଠ ଦେଇ ରାଜୀୟ ରାଜପଥରେ ଖସି ଯିବାକୁ ଚେଷ୍ଟା କରୁଥିଲେ। ସେମାନେ ଜାତୀୟ ରାଜପଥରେ ଯାଉଥିବା ବେଳେ ରାଜସମନ୍ଦ ପୁଲିସ୍ ସେମାନଙ୍କୁ ବ୍ୟାରିକେଡ ଲଗାଇ ଅଟକାଇଥିଲା।
ସେମାନେ ପୁଲିସ୍କୁ ଚକମା ଦେଇ ଖସିଯିବାକୁ ଚେଷ୍ଟା କରିଥିଲେ। ହେଲେ ପୁଲିସ୍ କର୍ମଚାରୀମାନେ ଉଭୟଙ୍କୁ କାବୁ କରିବା ସହ ବିଧା ଗୋଇଠା ନାଦି ଦେଇଥିଲେ। ଏପରି କି ଜଣେ ପୁଲିସ୍ କର୍ମଚାରୀ ମହମ୍ମଦ ଓ ରିୟାଜ ମଧ୍ୟରୁ ଜଣଙ୍କୁ ଲାଠିରେ ପ୍ରହାର କରୁଥିବା ବେଳର ଦୃଶ୍ୟ ମଧ୍ୟ ସାମ୍ନାକୁ ଆସିଛି।
राजस्थान पुलिस ने उदयपुर हत्याकांड के दोनों हत्यारों को पकड़ लिया हैं ।
राजस्थान पुलिस ने मौक़े पर ही खातिरदारी की है। अभी और भी ख़ातिरदारी होनी है।
यह कांग्रेस शासित राजस्थान हैं यहाँ असामाजिक तत्व बिल्कुल भी बर्दाश्त नहीं किये जायेगे।#Udaipur pic.twitter.com/kBflQ0qzdB
— Nitin Agarwal (@nitinagarwalINC) June 28, 2022
କଂଗ୍ରେସ ମିଡିଆ ସଂଯୋଜକ ନୀତିନ ଅଗ୍ରୱାଲ ମୋବାଇଲରେ କଏଦ ହୋଇଥିବା ଗିରଫଦାରୀ ଦୃଶ୍ୟକୁ ଟ୍ୱିଟ କରିଛନ୍ତି। ସେ କହିଛନ୍ତି, “ରାଜସ୍ଥାନ ପୁଲିସ୍ ଉଦୟପୁର ହତ୍ୟାକାଣ୍ଡର ଦୁଇ ହତ୍ୟାକାରୀଙ୍କୁ ଧରି ନେଇଛି। ରାଜସ୍ଥାନ ପୁଲିସ୍ ଘଟଣାସ୍ଥଳରେ ହିଁ ସେମାନଙ୍କୁ ବେଶ ଭଲ ଭାବେ ଚର୍ଚ୍ଚା (ମାଡ଼ ମାରିବା) କରିଛି। ଆଗକୁ ଏମିତି ଆହୁରି ଏମିତି ଚର୍ଚ୍ଚା ବାକି ରହିଛି। ଏହା କଂଗ୍ରେସ ଶାସିତ ରାଜସ୍ଥାନ। ଏଠାରେ ଅସାମାଜିକ ତତ୍ତ୍ୱଙ୍କୁ କେବେ ହେଲେ ବରଦାସ୍ତ କରାଯିବ ନାହିଁ।”
ଘଟଣାକୁ ନେଇ ଉତ୍ତେଜନା ବଢ଼ୁଥିବାରୁ କହ୍ନେୟା ଲାଲଙ୍କ ଦୁଇ ପୁଅ(୧୮ ଓ ୨୦)ଙ୍କ ପାଇଁ ସରକାର ଚାକିରି ଘୋଷଣା କରିଛନ୍ତି। ଏଥିସହ ପରିବାର ଲୋକଙ୍କୁ ୩୧ ଲକ୍ଷ ଟଙ୍କାର କ୍ଷତିପୂରଣ ମିଳିବ ବୋଲି କହିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
