ନୂଆଦିଲ୍ଲୀ: ଯାହା ଆଶା କରାଯାଉଥିଲା ଠିକ୍ ସେଇଆ ହେଲା। ପଶ୍ଚିମବଙ୍ଗ ସମେତ ବିଭିନ୍ନ ରାଜ୍ୟର ବିଧାନସଭା ନିର୍ବାଚନ ଶେଷ ହେବା ସହ ଫଳାଫଳ ପ୍ରକାଶ ପାଇବା କ୍ଷଣି ଆଜି ଉଭୟ ପେଟ୍ରୋଲ ଓ ଡିଜେଲ ଦର ବୃଦ୍ଧି ପାଇଛି। ଦୀର୍ଘଦିନ ଧରି ଦର ସ୍ଥିର ରହିଥିବା ବେଳେ ଆଜି ଲୋକେ ମହଙ୍ଗା ମାଡ଼ର ଶିକାର ହୋଇଛନ୍ତି।
ତୈଳ କମ୍ପାନୀଗୁଡ଼ିକ ପକ୍ଷରୁ ମିଳିଥିବା ସୂଚନା ଅନୁଯାୟୀ, ଆଜି ଦିଲ୍ଲୀରେ ପେଟ୍ରୋଲର ଲିଟର ପିଛା ୧୫ ପଇସା ଓ ଡିଜେଲ ଲିଟର ପିଛା ୧୮ ପଇସା ମହଙ୍ଗା ହୋଇଛି। ଏପ୍ରିଲ ୧୫ରେ ପେଟ୍ରୋଲର ଲିଟର ପିଛା ଦର ୧୫ ପଇସା ଓ ଡିଜେଲର ଦର ୧୪ ପଇସା ହ୍ରାସ ପାଇଥିଲା। କିନ୍ତୁ ଆଜି ହଠାତ୍ ଦର ବୃଦ୍ଧି ହୋଇଛି।
ବର୍ଦ୍ଧିତ ଦର ପରେ ଦିଲ୍ଲୀରେ ପେଟ୍ରୋଲର ଲିଟର ପିଛା ଦର ୯୦.୫୫ ଟଙ୍କା ଓ ଡିଜେଲର ଲିଟର ପିଛା ଦର ୮୦.୯୧ ଟଙ୍କାରେ ପହଞ୍ଚି ଯାଇଛି। ଗତକାଲି ପେଟ୍ରୋଲ ଓ ଡିଜେଲର ଦର ଯଥାକ୍ରମେ ୯୦.୪୦ ଟଙ୍କା ଓ ୮୦.୭୩ ଟଙ୍କା ରହିଥିଲା। କୋଲକାତାରେ ପେଟ୍ରୋଲର ଲିଟର ପିଛା ଦର ୯୦.୭୬ ଟଙ୍କା, ମୁମ୍ବାଇରେ ୯୬.୯୫ ଟଙ୍କା, ଚେନ୍ନାଇରେ ୯୨.୫୫ ଟଙ୍କା ଓ ଭୁବନେଶ୍ୱରରେ ପେଟ୍ରୋଲର ଲିଟର ପିଛା ଦର ୯୧.୨୭ ଟଙ୍କା ରହିଛି।
ସେହିପରି ଏହି ସବୁ ସହରରେ ଡିଜେଲର ଲିଟର ପିଛା ଦର ଯଥାକ୍ରମେ ୮୩.୭୮ ଟଙ୍କା, ୮୭.୯୮ ଟଙ୍କା, ୮୫.୯୦ ଟଙ୍କା ଓ ୮୮.୧୭ ଟଙ୍କା ରହିଛି।
ସୂଚନାଯୋଗ୍ୟ, ନିର୍ବାଚନ ତାରିଖ ଘୋଷଣା ହେବାର କିଛି ଦିନ ପରେ ହଠାତ୍ ପେଟ୍ରୋଲ ଓ ଡିଜେଲ ଦାମ ବଢ଼ିବା ବନ୍ଦ ହୋଇଯାଇଥିଲା। ଏହା ପୂର୍ବରୁ କ୍ରମାଗତ ଭାବେ ତୈଳ ଦର ବଢ଼ି ଚାଲିଥିଲା। ଶେଷ ଥର ପାଇଁ ୨୭ ଫେବୃଆରୀରେ ପେଟ୍ରୋଲର ଲିଟର ପିଛା ଦାମ ୨୪ ପଇସା ଓ ଡିଜେଲ ଦାମ ୧୭ ପଇସା ମହଙ୍ଗା ହୋଇଥିଲା। ଏହି ଦୁଇ ମାସ ମଧ୍ୟରେ ଅନ୍ତର୍ଜାତୀୟ ବଜାରରେ ଅଶୋଧିତ ତୈଳର ଦାମ ବୃଦ୍ଧି ଘଟିଥିଲା। କିନ୍ତୁ ଭାରତରେ ଉଭୟ ପେଟ୍ରୋଲ ଓ ଡିଜେଲ ଦର ଅପରିବର୍ତ୍ତି ରହିଥିଲା।
ବର୍ଷକ ମଧ୍ୟରେ ପେଟ୍ରୋଲର ଲିଟର ପିଛା ଦର ପ୍ରାୟ ୨୧.୫୮ ଟଙ୍କା ବଢ଼ିଥିବା ବେଳେ ଡିଜେଲର ଲିଟର ପିଛା ଦାମ ୧୯.୧୮ ଟଙ୍କା ମହଙ୍ଗା ହୋଇଛି।