ବିଜେପି ସହ ସମ୍ପର୍କ ଶେଷ, ଆଞ୍ଚଳିକ ଦଳ ଏକାଠି ହେବା ଦରକାର: ବାଦଲ

ନୂଆଦିଲ୍ଲୀ: ମିଶନ ୨୦୨୪ ପାଇଁ ଦିଲ୍ଲୀ ଗସ୍ତରେ ଆସୁଛନ୍ତି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ। ଏହାପୂର୍ବରୁ ପଞ୍ଜାବର ଶିରୋମଣୀ ଅକାଳୀ ଦଳ ନେତା ସୁଖବୀର ସିଂହ  ବାଦଲ କହିଛନ୍ତି ତାଙ୍କ ଦଳ ଆଉ ବିଜେପି ସହିତ ମେଣ୍ଟ କରିବ ନାହିଁ। ଏବେ ଆଞ୍ଚଳିକ ଦଳ ମିଶି ଏକ ବଡ଼ ମୋର୍ଚ୍ଚା ଗଠନ କରିବା ଦରକାର ବୋଲି ସେ କହିଛନ୍ତି। ମମତା ଦିଲ୍ଲୀ ଆସିବା ପୂର୍ବରୁ ସୁଖବୀରଙ୍କ ଏପରି ମନ୍ତବ୍ୟ ବିଜେପି ବିରୋଧୀ ମେଣ୍ଟରେ ଶିରୋମଣୀ ସାମିଲ ହେବ ବୋଲି ଇସାରା ଦେଇଛି।

ରବିବାର ଶିରୋମଣୀ ଅକାଳୀ ଦଳ ସଭାପତି ସୁଖବୀର ସିଂ ବାଦଲ କହିଛନ୍ତି ଯେ ୨୦୨୪ ଲୋକସଭା ନିର୍ବାଚନରେ ​​ବିଜେପିକୁ କାଉଣ୍ଟର କରିବା ପାଇଁ ଆଞ୍ଚଳିକ ଦଳ ଏକାଠି ହୋଇ ଏକ ଜାତୀୟ ସାମ୍ମୁଖ୍ୟ ଗଠନ କରିବା ଉଚିତ। ସେ ଆହୁରି ମଧ୍ୟ କହିଛନ୍ତି ଯେ ବିଜେପି ସହିତ ତାଙ୍କ ଦଳର ସମସ୍ତ ସମ୍ପର୍କ ଶେଷ ହୋଇଯାଇଛି।

ଚାଷୀଙ୍କ ସମସ୍ୟା ତାଙ୍କ ଦଳର ମୂଳ ଉଦ୍ଦେଶ୍ୟ ଥିଲା। ତାଙ୍କ ଦଳ ସେମାନଙ୍କ ସହ କଦାପି ଆପୋଷ ବୁଝାମଣା କରିବ ନାହିଁ ଯିଏ ତିନି କୃଷି ଆଇନକୁ ସମର୍ଥନ କରିବ। ବାଦଲ କହିଛନ୍ତି, ଶିରୋମଣୀ ଅକାଳୀ ଦଳ କୃଷକଙ୍କର ଦଳ। ସେମାନଙ୍କର ପ୍ରସଙ୍ଗ ଆମର ଆଦର୍ଶ। ଆମେ ପଞ୍ଜାବରେ ଏହି ଆଇନକୁ ଲାଗୁ ହେବାକୁ ଦେବୁ ନାହିଁ ବୋଲି ସେ କହିଛନ୍ତି।

କେନ୍ଦ୍ର ସରକାର ତିନି କୃଷି ବିଲ୍ ସଂସଦରେ ଆଗତ କରିବା ପରେ ଏହାକୁ ବିରୋଧ କରି ବାଦଲଙ୍କ ପତ୍ନୀ ହର୍ଷମିତ କୌର କେନ୍ଦ୍ର ମନ୍ତ୍ରୀ ପଦରୁ ଇସ୍ତଫା ଦେଇଥିଲେ। ଏବେ ସରକାର ଆନ୍ଦୋଳନକାରୀ ଚାଷୀଙ୍କ ସହ ୧୦ ରାଉଣ୍ଡ ବୈଠକ କରି ସାରିଛନ୍ତି କିନ୍ତୁ ସମାଧାନର ସୂତ୍ର ବାହାରି ପାରି ନାହିଁ।

ମାୟାବତୀଙ୍କ ନେତୃତ୍ୱାଧୀନ ବହୁଜନ ସମାଜ ପାର୍ଟି (ବିଏସପି) ସହିତ ତାଙ୍କ ଦଳର ମେଣ୍ଟ ଉପରେ ବାଦଲ କହିଛନ୍ତି ଯେ ଦୁଇ ଦଳ ମଧ୍ୟରେ ମେଣ୍ଟ ସ୍ଥାୟୀ। ଦଳର ଭବିଷ୍ୟତ କାର୍ଯ୍ୟକ୍ରମରେ ବାଦଲ କହିଛନ୍ତି ବିଭିନ୍ନ ଆଞ୍ଚଳିକ ଦଳ ସହ ସେ କଥାବାର୍ତ୍ତା କରୁଛନ୍ତି। ଯାହା ଦ୍ୱାରା ସେମାନେ ୨୦୨୪ ସାଧାରଣ ନିର୍ବାଚନ ପୂର୍ବରୁ ଗୋଟିଏ ମଞ୍ଚରେ ଆସି ପାରିବେ। ଆମେ ବିଭିନ୍ନ ପାର୍ଟି ସହିତ କଥା ହେଉଛୁ। ୨୦୨୪ ସାଧାରଣ ନିର୍ବାଚନ ପୂର୍ବରୁ ଆଞ୍ଚଳିକ ଦଳମାନେ ଏକାଠି ହୋଇ ଏକ ସାମ୍ମୁଖ୍ୟ ଗଠନ କରିବା ଉଚିତ୍। ୨୦୨୪ ପୂର୍ବରୁ ଏହି ସାମ୍ମୁଖ୍ୟ ଏକ ଶକ୍ତିଶାଳୀ ସାମ୍ମୁଖ୍ୟ ଭାବରେ ଏବେର ଶାସକ ଦଳ ଆଗରେ ଉଭା ହେବ।