ଶ୍ରୀନଗର: ଜମ୍ମୁ-କଶ୍ମୀରରେ ପଥର ଫିଙ୍ଗାଳିଙ୍କୁ ସାବାଡ୍ କରିବା ପାଇଁ ପୁଲିସ୍ ପକ୍ଷରୁ ଏକ ଅଭିନବ ଉଦ୍ୟମ ଆରମ୍ଭ କରାଯାଇଛି। ପୁଲିସ୍ ନିଜେ ପଥର ଫିଙ୍ଗାଳିଙ୍କ ବେଶ ଧରି ପ୍ରକୃତ ଦୁର୍ବୃତ୍ତମାନଙ୍କ ପାଖରେ ପହଞ୍ଚି ସେମାନଙ୍କୁ ଗିରଫ କରିବାରେ ସକ୍ଷମ ହୋଇଛି।
ଏହି ସମୟରେ ଜମ୍ମୁ-କଶ୍ମୀର ପୁଲିସ୍ର କିଛି ସଦସ୍ୟ ପଥର ଫିଙ୍ଗାଳିଙ୍କ ବେଶ ଧାରଣ କରି ଭିଡ଼ ମଧ୍ୟରେ ପ୍ରବେଶ କରିଥିଲେ। ସେମାନେ ପ୍ରଥମେ ସୁରକ୍ଷାକର୍ମୀଙ୍କ ଉପରକୁ ଟେକା ମାଡ଼ କରିଥିଲେ।
ଏହା ପରେ ସୁଯୋଗ ଦେଖି ୪ କୁଖ୍ୟାତ ପଥର ଫିଙ୍ଗାଳିଙ୍କୁ କାବୁ କରି ତୁରନ୍ତ ନିକଟସ୍ଥ ପୁଲିସ୍ ଭ୍ୟାନ୍ ନିକଟକୁ ନେଇ ଆସିଥିଲେ। ସେଠାରୁ ସେମାନଙ୍କୁ ପୁଲିସ୍ ଷ୍ଟେସନ୍ ନିଆଯାଇଥିଲା। ଗିରଫ ପଥର ଫିଙ୍ଗାଳିଙ୍କ ମଧ୍ୟରେ ଥିବା ଜଣେ ଯୁବକଙ୍କ ନିକଟରୁ ପୁଲିସ୍ ବନ୍ଧୁକ ମଧ୍ୟ ଜବତ କରିଛି।
ଏଭଳି ଅଭିନବ ଉପାୟରେ ପୁଲିସ୍ କେବଳ ଯେ ପଥର ଫିଙ୍ଗାଳିଙ୍କୁ ଗିରଫ କରିଛି ତାହା ନୁହେଁ, ବରଂ ପୁଲିସ୍ ଏଭଳି ଫିଲ୍ମ ଅନ୍ଦାଜ ଦେଖି ସେଠାରେ ଥିବା ଅନ୍ୟ ପଥର ଫିଙ୍ଗାଳିମାନେ ମଧ୍ୟ କିଛି ବୁଝି ପାରି ନଥିଲେ। ସେମାନେ ଭୟରେ ଜାମା ମସଜିଦ୍ ନିକଟରୁ ତୁରନ୍ତ ଛତ୍ରଭଙ୍ଗ ଦେଇଥିଲେ।
୨୦୧୦ରେ ମଧ୍ୟ ଗୋଟିଏ ଥର ପଥର ଫିଙ୍ଗାଳିଙ୍କୁ ଧରିବା ପାଇଁ ପୁଲିସ୍ ପକ୍ଷରୁ ଏଭଳି ଛଦ୍ମବେଶ ଧାରଣ କରାଯାଇଥିଲା।
୨ ବର୍ଷ ପୂର୍ବେ ଇସ୍ରାଏଲ୍ ସେନା ମଧ୍ୟ ପାଲେଷ୍ଟାଇନ୍ର ପଥର ଫିଙ୍ଗାଳିଙ୍କୁ ଧରିବା ପାଇଁ ଏଭଳି ଛଦ୍ମବେଶ ଧାରଣ କରିଥିଲା।