ପାଟନା: ନାରୀ ନିର୍ଯାତନାର ଆଉ ଏକ ନଗ୍ନ ଚିତ୍ରକୁ ନେଇ ଉଦ୍ବେଗ ପ୍ରକାଶ ପାଇଛି। ଜଣେ ସ୍କୁଲ ଛାତ୍ରୀ ତାଙ୍କ ବୟଫ୍ରେଣ୍ଡଙ୍କ ସହ ଯାଉଥିବା ବେଳେ ଅସଦାଚରଣର ଶିକାର ହୋଇଛନ୍ତି। କିଛି ଦୁର୍ବୃତ୍ତ ସମ୍ପୃକ୍ତ ଛାତ୍ରୀଙ୍କୁ ଟଣାଓଟରା କରିବା ସହ ତାଙ୍କ ବୟଫ୍ରେଣ୍ଡକୁ ମାରପିଟ୍ କରିଥିବା ଅଭିଯୋଗ ହୋଇଛି। ଏହି ସମୟରେ ଆଉ କିଛି ଯୁବକ ଭିଡିଓ ସୁଟ୍ କରି ଏହାକୁ ଭାଇରାଲ କରିଥିବା ଅଭିଯୋଗ ହୋଇଛି।
ବିହାରର ସହର୍ସ ଅଞ୍ଚଳରେ ଏହି ଅଭାବନୀୟ ଘଟଣା ଘଟିଛି। ପୁଲିସ ଏହି ଘଟଣାରେ ଜଣଙ୍କୁ ଗିରଫ କରିଛି। ଭାଇରାଲ ହେଉଥିବା ଭିଡିଓରେ ଯୁବତୀ ଜଣକ ନିଜକୁ ବଞ୍ଚାଇବା ପାଇଁ ଚିତ୍କାର କରୁଥିବା ଦେଖାଯାଇଛି। ତେବେ ଏହି ଘଟଣାରେ ଜଣଙ୍କୁ ଗିରଫ କରାଯାଇଥିବା ସହର୍ସ ଡେପୁଟି ସୁପରିଟେଣ୍ଡେଣ୍ଟ ପ୍ରଭାକର ରିୱାରି ସୂଚନା ଦେଇଛନ୍ତି। ଅନ୍ୟ ଅଭିଯୁକ୍ତମାନେ ଫେରାର ଥିବାରୁ ସେମାନଙ୍କୁ ଖୋଜାଯାଉଥିବା ଡେପୁଟି ସୁପରିଟେଣ୍ଡେଣ୍ଟ ପ୍ରଭାକର କହିଛନ୍ତି।
ଅଭିଯୋଗ ଅନୁଯାୟୀ ଛାତ୍ରୀ ଜଣକ ଏକ ବାଇସାଇକେଲରେ ଯାଉଥିବା ବେଳେ ବାଟରେ କିଛି ଅସାମାଜିକ ଯୁବକ ତାଙ୍କୁ ଅଟକାଇଥିଲେ। ତେବେ ଛାତ୍ରୀ ସହ ତାଙ୍କ ବୟଫ୍ରେଣ୍ଡ ଥିବା ପୁଲିସ କହିଛି। ଦୁର୍ବୃତ୍ତମାନେ ଛାତ୍ରୀ ଜଣଙ୍କୁ ଟଣାଓଟରା କରିବା ସହ ଅଶାଳୀନ ବ୍ୟବହାର କରିଥିଲେ। ଏପରିକି ସେମାନେ ଛାତ୍ରୀ ଜଣକର ଓଢଣି ଟାଣୁଥିବା ଭାଇରାଲ ହୋଇଥିବା ଭିଡିଓରେ ଦେଖାଯାଉଛି।
ସେହିପରି ଛାତ୍ରୀଙ୍କ ବୟଫ୍ରେଣ୍ଡକୁ ଆଉ କେତେକ ମାରପିଟ୍ କରୁଥିବା ବେଳେ ଏହାର ଭିଡିଓ ସୁଟ୍ କରାଯାଇଥିବା ଅଭିଯୋଗ ହୋଇଛି। ଏହି ଘଟଣାକୁ ନେଇ ବିହାରରେ ବିରୋଧୀ ଦଳ ନିତୀଶ ସରକାରଙ୍କୁ ଘେରିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
