ନୂଆଦିଲ୍ଲୀ: ଅନେକ ସମୟରେ ଦେଖାଯାଏ ଜନତାଙ୍କ ଦ୍ୱାରା ନିର୍ବାଚିତ ନେତା, ମନ୍ତ୍ରୀ, ବିଧାୟକ ଓ ସାଂସଦମାନେ ବିଭିନ୍ନ ଅପରାଧିକ ମାମଲାରେ ଜଡ଼ିତ ହୋଇରହିଥାନ୍ତି । ଭାରତ ଭଳି ଗଣତାନ୍ତ୍ରିକ ଦେଶରେ ବିଧାୟକ, ସାଂସଦଙ୍କ ନାମରେ ଏକାଧିକ ଅପରାଧିକ ମାମଲା ଥିବା କୌଣସି ନୂଆ ବିଷୟ ନୁହେଁ । ଆଉ ଏହି ମାମଲାଗୁଡ଼ିକ ମଧ୍ୟ କୋର୍ଟରେ ଦୀର୍ଘ ସମୟ ଧରି ବିତାରଧୀନ ରହିଥାଏ । ତେବେ ଏହି ପରିପ୍ରେକ୍ଷୀରେ ଦେଶର ସର୍ବୋଚ୍ଚ ଅଦାଲତ ଏକ ବଡ଼ ନିର୍ଦ୍ଦେଶ ଶୁଣାଇଛନ୍ତି ।
ବିଧାୟକ ଏବଂ ସାଂସଦଙ୍କ ନାଁରେ ଥିବା ବିଚାରଧୀନ ମାମଲା ସମ୍ପର୍କିତ ସମସ୍ତ ତଥ୍ୟ ମାଗିଛନ୍ତି ସୁପ୍ରିମକୋର୍ଟ । ସାଂସଦ ଏବଂ ବିଧାୟକଙ୍କ ବିରୁଦ୍ଧରେ ରୁଜୁ ହୋଇଥିବା ବିଭିନ୍ନ ଅପରାଧିକ ମାମଲାଗୁଡ଼ିକୁ ବାବଦରେ ଦାଖଲ କରାଯାଇଥିବା ଏକ ଜନସ୍ୱାର୍ଥ ଯାଚିକାର ଶୁଣାଣି କରି ସୁପ୍ରିମକୋର୍ଟ ଏଭଳି ନିର୍ଦ୍ଦେଶ ଦେଇଛନ୍ତି । ଏନେଇ ସମସ୍ତ ହାଇକୋର୍ଟଙ୍କୁ ୨ ଦିନ ଭିତରେ ଭ୍ରଷ୍ଟାଚାର ଏବଂ ବିଚାରଧୀନ ଥିବା ଅନ୍ୟ ଅପରାଧୀକ ମାମଲାର ସମ୍ପର୍କିତ ସମସ୍ତ ତଥ୍ୟ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି । ତେବେ ସେପ୍ଟେମ୍ୱର ୧୬ରେ ସୁପ୍ରିମକୋର୍ଟ ଏହି ମାମଲାରେ ପରବର୍ତ୍ତୀ ଶୁଣାଣି କରିବେ ।
ଏହାସହ ଅଭିଯୁକ୍ତ ଅପରାଧୀକ ରେକର୍ଡ ଥିବା ବିଧାୟକ ଏବଂ ସାଂସଦଙ୍କୁ ଆଜୀବନ ନିର୍ବାଚନ ଲଢ଼ିବାକୁ ଦିଆ ନ ଯିବା ନେଇ ଏକ ଯାଚିକାର ଶୁଣାଣି କରି କେନ୍ଦ ସରକାରରଙ୍କୁ ଜବାବ ମାଗିଛନ୍ତି ସୁପ୍ରିମକୋର୍ଟ । ଏନେଇ 6 ସପ୍ତାହ ମଧ୍ୟରେ କେନ୍ଦ୍ର ସରକାରଙ୍କୁ ଜବାବ ଦେବାକୁ ନିର୍ଦ୍ଦେଶ ଦେଇଛନ୍ତି । ଏହି ମାମଲାର ଶୁଣାଣି ବେଳେ ଦେଶରେ ବିଧାୟକ ଏବଂ ସାଂସଦଙ୍କ ବିରୁଦ୍ଧରେ ପ୍ରାୟ ୪ହଜାରୁ ଊର୍ଦ୍ଧ୍ୱ ମାମଲା ବିଚାରଧୀନ ରହିଥିବା ନେଇ ଆଶ୍ଚର୍ଯ୍ୟ ପ୍ରକଟ କରିଛନ୍ତି ।
ସୂଚନା ଯେ, ଏହି ମାମଲାର ଆବେଦନକାରୀ ଆଇନଜୀବୀ ବିକାଶ ସିଂହ ମାନ୍ୟବର ସୁପ୍ରିମକୋର୍ଟଙ୍କୁ ନିବେଦନ କରିଛନ୍ତି ଯେ, ବିଧାୟକ, ସାଂସଦଙ୍କ ନାଁରେ ଥିବା ସାଂଘାତିକ ଅପରାଧିକ ମାମଲାଗୁଡ଼ିକରେ ସେମାନଙ୍କୁ କୌଣସି ପ୍ରକାର ସଂରକ୍ଷଣ ଦିଆଯିବା ଉଚିତ୍ ନୁହେଁ ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
