ଅର୍ଣ୍ଣବଙ୍କ ସମର୍ଥନରେ ସୁଶାନ୍ତଙ୍କ ପରିବାରର ଓକିଲ

ମୁମ୍ବାଇ: ରିପବ୍ଲିକ୍ ଟିଭି ଏଡିଟର ଇନ୍ ଚିଫ୍ ଅର୍ଣ୍ଣବ ଗୋସ୍ୱାମୀଙ୍କୁ ମୁମ୍ବାଇ ପୁଲିସ ଗିରଫ କରିବା ପରେ ଚାରିଆଡ଼େ ଆକ୍ରୋଶ ଦେଖିବାକୁ ମିଳିଛି। ଅର୍ଣ୍ଣବଙ୍କ ସମର୍ଥନରେ ଦେଶର ଭିନ୍ନ ଭିନ୍ନ ସ୍ଥାନରେ ଲୋକେ ବିକ୍ଷୋଭ ପ୍ରଦର୍ଶନ କରିଛନ୍ତି। ଏହି କ୍ରମରେ ସୁଶାନ୍ତ ସିଂହ ରାଜପୁତଙ୍କ ପରିବାରର ଓକିଲ ବିକାଶ ସିଂହ ମଧ୍ୟ ନିଜ ପ୍ରତିକ୍ରିୟା ଦେଇଛନ୍ତି। ସେ ଏକାଧିକ ଟ୍ୱିଟ୍ ଜରିଆରେ ଅର୍ଣ୍ଣବଙ୍କ ପ୍ରତି ନିଜ ସମର୍ଥନ ଜଣାଇଛନ୍ତି।

ବିକାଶ ଟ୍ୱିଟ୍ କରି କହିଛନ୍ତି, “ମୁଁ ଯେକୌଣସି ସରକାର ଦ୍ୱାରା ପ୍ରେସ୍ ଉପରେ ଲଗାମ୍ ଲଗାଇବାର ଯେକୌଣସି ପ୍ରୟାସକୁ ବିରୋଧ କରୁଛି। ସାରା ଦେଶରେ ପ୍ରେସର ଲୋକମାନଙ୍କ ବିରୁଦ୍ଧରେ ମିଥ୍ୟା ମାମଲା ରୁଜୁ କରିବାର ପ୍ରବୃତ୍ତି ରହିଛି। ଏହି ପ୍ରବୃତ୍ତି ଆମ ଗଣତନ୍ତ୍ର ଉପରେ ଖରାପ ପ୍ରଭାବ ପକାଇଥାଏ। ମୁଁ ଏଭଳି ମାମଲାଗୁଡ଼ିକୁ ସାମ୍ନା କରୁଥିବା ପ୍ରେସ୍ ଲୋକମାନଙ୍କ ସହ ଅଛି।”

ସୂଚନାଯୋଗ୍ୟ, ଗତକାଲି ମୁମ୍ବାଇ ଓ ରାୟଗଡ଼ ପୁଲିସର ମିଳିତ ଟିମ୍ ଅର୍ଣ୍ଣବଙ୍କ ମୁମ୍ବାଇ ଲୋୟର ପରେଲସ୍ଥିତ ଘରେ ପଶି ଜୋର ଜବରଦସ୍ତ ତାଙ୍କୁ ଗିରଫ କରିଥିଲେ। କୋର୍ଟ କି ଅନ୍ୟ ଆଇନଗତ କାଗଜପତ୍ର ଦେଖାଇ ନ ଥିଲା ପୁଲିସ୍ ଟିମ୍। ଏପରି କି ତାଙ୍କ ଘରେ ତାଙ୍କୁ ଜବରଦସ୍ତି ଟଣା ଓଟରା କରିଥିଲା ପୁଲିସ। ପରେ ଜବରଦସ୍ତ ତାଙ୍କୁ ଭ୍ୟାନରେ ପୂରାଇ ନିଆଯାଇଥିଲା। ତେବେ ଅର୍ଣ୍ଣବଙ୍କୁ ବର୍ତ୍ତମାନ ଅଲିବାଗର ଏକ ସ୍ଥାନୀୟ କୋର୍ଟ ୧୪ ଦିନ ପାଇଁ ବିଚାର ବିଭାଗୀୟ ହାଜତକୁ ପଠାଇବାକୁ ନିଷ୍ପତ୍ତି ନେଇଛନ୍ତି। ଅର୍ଣ୍ଣବଙ୍କ ସହ ଆଉ ଦୁଇଜଣଙ୍କୁ ମଧ୍ୟ ବିଚାର ବିଭାଗୀୟ ହାଜତକୁ ପଠାଯାଇଛି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।