କ୍ୟୁବେକ୍: କାନାଡ଼ାର କ୍ୟୁବେକ୍ ଅଞ୍ଚଳରୁ ଏକ ବଡ଼ ଆକ୍ରମଣର ଖବର ସାମ୍ନାକୁ ଆସିଛି। ଗହଳିପୂର୍ଣ୍ଣ ସ୍ଥାନରେ ଆକ୍ରମଣକାରୀଙ୍କ ଦ୍ୱାରା ମରଣାନ୍ତକ ଆକ୍ରମଣରେ ବର୍ତ୍ତମାନ ସୁଦ୍ଧା ଦୁଇଜଣଙ୍କ ମତ୍ୟୁ ଘଟିଥିବା ବେଳେ 5ଜଣ ଆହତ ହୋଇଛନ୍ତି। ପୁଲିସ ଅଭିଯୁକ୍ତକୁ ଗିରଫ କରି ତଦନ୍ତ ଚଳାଇଛି।
ପୁଲିସ୍ ସନ୍ଦିଗ୍ଧ ଆକ୍ରମଣକାରୀକୁ ଗିରଫ କରିଛି। ଗିରଫ ବ୍ୟକ୍ତି ଜଣକ ମଧ୍ୟଯୁଗୀୟ ପୋଷାକ ପିନ୍ଧିଥିବା ବେଳେ ତାଙ୍କ ନିକଟରୁ ଲମ୍ବା ଓ ଧାରୁଆ ଚାକୁ ପୁଲିସ ଜବତ କରିଛି। କ୍ୟୁବେକ୍ ଆଞ୍ଚଳିକ ସଂସଦ ଭବନ ନିକଟରେ ସେ ଛୁରାମାଡ଼ କରିଛି। ଘଟଣାର ଖବର ପାଇବା ମାତ୍ରେ ପୁଲିସ ଉକ୍ତ ଅଞ୍ଚଳକୁ ଘେରାଉ କରି ଅଭିଯୁକ୍ତକୁ ଧରିବାକୁ ଜାଲ ବିଛାଇଥିଲା।
ତେବେ ନିକଟରେ ଫ୍ରାନ୍ସରେ ଏକାଧିକ ଆତଙ୍କବାଦୀ ଆକ୍ରମଣ ହୋଇଛି। ହେଲେ କାନାଡ଼ାରେ ହୋଇଥିବା ଏହି ଆକ୍ରମଣକୁ ନେଇ ପୁଲିସ କୌଣସି ବୟାନ ଦେଇନାହିଁ।
ପୁଲିସ କହିବା ଅନୁସାରେ, ଭିଡ଼ ଭିତରେ ଆକ୍ରମଣକାରୀ ଅନେକଙ୍କୁ ଛୁରାମାଡ଼ କରିଛି। କ୍ୟୁବେକ୍ ସିଟି ପୁଲିସ ସେଣ୍ଟର ଟ୍ୱିଟରରେ ବୟାନ ଜାରି କରି କହିଛି ଯେ, ରାତି ପ୍ରାୟ 1ଟା ବେଳେ ଆକ୍ରମଣକାରୀକୁ ଗିରଫ କରିଦିଆଯାଇଛି। ତଦନ୍ତ ପ୍ରକ୍ରିୟା ଶେଷ ହେବା ପର୍ଯ୍ୟନ୍ତ ଲୋକମାନଙ୍କୁ ଘର ଭିତରେ ରହିବାକୁ ପୁଲିସ ନିର୍ଦ୍ଦେଶ ଦେଇଛି। କାରଣ ଏଭଳି ଆଉ ଏକ ଘଟଣା ଘଟିପାରେ ବୋଲି ପୁଲିସର ଆଶଙ୍କା ରହିଛି। ଅନ୍ୟପଟେ, ଆଉ ଏକ ଆକ୍ରମଣ ହେବାର ଆଶଙ୍କା ବ୍ୟକ୍ତ କରି ଗିରଫ ଆକ୍ରମଣକାରୀର କୌଣସି ପରିଚୟ ପୁଲିସ ସାର୍ବଜନୀନ କରିନାହିଁ।