ଚାଷୀ ନେତା ଟିକୈତଙ୍କ ପାଇଁ ଆସିଲା ଗାଁ ଖାଦ୍ୟ, ମାଠିଆ ପାଣି

ନୂଆଦିଲ୍ଲୀ: ଗାଜିପୁର ସୀମାରେ ବଦଳିଲା ମାହୋଲ। ଚାଷୀ ଆନ୍ଦୋଳନରେ ଦେଖିବାକୁ ମିଳିଲା କିଛି ନୂଆ ଦୃଶ୍ୟ। ଚାଷୀ ନେତା ରାକେଶ ଟିକୈତଙ୍କ ପାଇଁ ଗାଁରୁ ଆସିଲା ଖାଦ୍ୟ। କେବଳ ସେତିକି ନୁହେଁ ମାଠିଆ ପାଣି ମଧ୍ୟ ଆଣିଲେ ଗ୍ରାମବାସୀ। କେନ୍ଦ୍ର ସରକାରଙ୍କ ତିନି କୃଷି ଆଇନକୁ ବିରୋଧ କରି ଦିଲ୍ଲୀର ବିଭିନ୍ନ ସୀମାରେ କୃଷକ ସଙ୍ଗଠନଙ୍କ ଆନ୍ଦୋଳନ ଜାରି ରହିଛି। ଏହାରି ଭିତରେ ଚାଷୀ ଆନ୍ଦୋଳନକୁ ସମର୍ଥନ କରି ଶତାଧିକ ଚାଷୀ ଗତକାଲି ଗାଜିପୁର ସୀମାରେ ପହଁଚିଥିଲେ।

ଏହି ସମୟରେ ଭାରତୀୟ କିଷାନ ୟୁନିଅନ ନେତା ରାକେଶ ଟିକୈତଙ୍କ ପାଇଁ ଗାଁରୁ ମାଟି ମାଠିଆରେ ପାଣି ଏବଂ ଘରେ ତିଆରି ଖାଦ୍ୟ ନେଇ ସାଙ୍ଗରେ ଆସିଥିବା ଦେଖିବାକୁ ମିଳିଥିଲା। ପଶ୍ଚିମ ଉତ୍ତରପ୍ରଦେଶର ମୁଜାଫରନଗର, ଗ୍ରେଟର ନଏଡା ଏବଂ ମେରଟ ଭଳି ଅନ୍ୟ ସ୍ଥାନରୁ କେତେକ ଗ୍ରାମବାସୀ ମଧ୍ୟ ବିକ୍ଷୋଭକାରୀଙ୍କ ପାଇଁ ମାଠିଆରେ ପାଣି ଓ ଚଲ୍ହା  ଆଣିଥିଲେ। ସୂଚନାଯୋଗ୍ୟ ଯେ, ଗତକାଲି ଚାଷୀମାନେ ଗାନ୍ଧିଜୀଙ୍କ ପୂଣ୍ୟତିଥି ଅବସରରେ ସଦ୍ଭାବନା ଦିବସ ପାଳନ କରୁଥିଲେ ଏବଂ ସକାଳ୯ରୁ ୫ଟା ଯାଏଁ ଉପବାସ କରିଥିଲେ।

ଦୁଇ ଦିନ ପୂର୍ବେ ସ୍ଥାନୀୟ ପ୍ରଶାସନ ଗୁରୁବାର ରାତି ସୁଦ୍ଧା ଆନ୍ଦୋଳନ ସ୍ଥଳ ଖାଲି କରିବାକୁ ବିକ୍ଷୋଭକାରୀଙ୍କୁ ଅଲ୍ଟିମାଟମ୍ ଦେବା ପରେ ବିରୋଧ ସ୍ଥଳରେ ବିଦ୍ୟୁତ୍ ଓ ଜଳ ଯୋଗାଣ ବନ୍ଦ କରି ଦେଇଥିଲା। ଏହି କାରଣରୁ, ଟିକେଟ୍ କହିଥିଲେ ଯେ କୃଷକମାନେ ଯେତେବେଳେ ନିଜ ଗାଁରୁ ପାଣି ଆଣିବେ ସେତେବେଳେ ସେ ପାଣି ପିଇବେ, କିନ୍ତୁ ଆନ୍ଦୋଳନ ଜାରି ରଖିବେ। ଏହି ସମୟରେ ଟିକୈତ ଅଧିକ ଭାବପ୍ରବଣ ହେବା ସହ କାନ୍ଦି ମଧ୍ୟ ପକାଇଥିଲେ। ଏଥିସହ ଆନ୍ଦୋଳନ ବନ୍ଦ କରିବା ବଦଳରେ ଆତ୍ମହତ୍ୟା କରିବାକୁ ପସନ୍ଦ କରିବି ବୋଲି ସେ କହିଥିଲେ ।

ଏହାପରେ ଜାନୁଆରୀ ୨୬ ପରେ ଅଳ୍ପ ଧୀମା ପଡିଯାଇଥିବା ଚାଷୀ ଆନ୍ଦୋଳନ ପୁଣି ଥରେ ସକ୍ରିୟ ହୋଇଉଠିଛି। ଚାଷୀ ନେତା ଟିକୈତଙ୍କୁ ସମର୍ଥନ କରି ଶନିବାର ଗାଜିପୁର ସୀମାରେ ବିଭିନ୍ନ ସ୍ଥାନରୁ ଶତାଧିକ ଚାଷୀ ଆସି ଆନ୍ଦୋଳନରେ ସାମିଲ ହୋଇଥିବା ଦେଖିବାକୁ ମିଳିଛି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।